2 Saúl enabun dayadu juni betsa Sibá jiwea David yuiabu jau yuixuntanunbun jatu yunua ixuntanabu xanen ibujaida David anu Sibá jua yukakin:

—¿Jabia min miamen, Sibádan?— aka

kemakin:

—Xanen ibuun, min dayadudan, en jabiaki— aka

3 xanen ibun ana yukakin:

—Saúl enabudan, ¿juni betsa texeima jiweyuamen? ean Diosun kenawen taexun en medabewatidukidan— aka

Sibán kemakin:

—Jaa, Jonatánen juni bake bestichai jiweaki. Jakia jawen tae dabe chakabuki— aka

4 Davidin yukakin:

—¿Janimen?— aka

Sibán kemakin:

—Mae betsa Lodebar anu Amielin bake Maquirin jiwe anu jiweaki— aka

5 janua jau ixuntanunbun Davidin jatu yunua buxun David anu jawen bakebidantiki nanexun iabidanaibun 6 Jonatánen bake, Saúlun baba Mefi-bóset David anu buteabu Davidki mesei ja bebun danti iki beti ikaya

benimakin Davidin yukakin:

—Jonatánen bake Mefi-bósetiin, ¿min miamen?— aka

—Jaa. Xanen ibuun, min ea kena en juxudan, min dayadudan, en jabiaki— aka

7 Davidin yuikin:

—Min epa Jonatán shinankubainkin pepawen en mia duawakubainxanaiwen taea dateyamawe. Min juchi Saúlun mae tibi bai pepa betsa betsapabu inun ji pepa xukuabu tibi inun jawen jiwe betsa betsapa en mia ibu wamaxanaii, ibu wabianibun jau mia ana inanunbun jatu mebinmakinan. Nenu Jerusalén anu jiwexun en tapu anuxun ebetan min pikubainxanaii— aka

8 jakia Mefi-bósetin kenwain ana beti ixun yuikin:

—Min en xanen ibujaidatuun, min tsumakididan, ¿jaskakin min ekidi shinain? Eadan, en kaman mawa keska bestiki— aka

9 jaska wabia Saúlun dayadu ja dukuntun dayaxunpauni Sibá jau junun Davidin kena ana jua Davidin yuikin:

—Dasibi min tsuma Saúl inun jawenabus jayanibu jawen jamapaidan, jawen baba Mefi-bóset en yunuxuki. 10 Jaskawen taexun jawen bai tibi min juni bakebu inun min dayadububetan dayaxunkubainxanwen. Min tsuma xeni Saúlun enabun jau pi jiwekubainxanunbun miban pawaibu tsekaxun janu aduti jiwe medan jatu mekexunkubainxanwen. Jaskabiaken Saúlun baban ebetan pikubainxanikiki— akaya Sibá 15 juni bakebu inun 20 dayaduyatun 11 kemakin xanen ibu yuikin:

—Dasibi min xanen ibujaidatun ea yunua en min dayaduwen taexun en axunkubainxanaii— aka

januxun xanen ibujaidatun juni bake keska Mefi-bósetin Davidbetan pikubainikiaki, jawen tapu anuxunan. 12-13 Ja dikabi Mefi-bósetin enabu inun jawen juni bakeishta jawen kena Micaías, Sibá inun jawen dayadubun jatu dayaxunkubainibukiaki, medabewakinan. Jamen Mefi-bóset Davidin duajaidawakubainxanaiwen taea Jerusalén anu jiwexun Davidbetan pikubainikiaki, jaska jawen tae dabe chakabu jawa xuxamadan.