—Eadan, kuxa jiwe jawenduawen ma en jiweaki. Jakia Jehová jatube yubakani jancha aduni bau tadi jiwe pema duakabi anu tsaua jaska medan besti tsaua pema en shinaiin— aka

3 Natánen kemakin yuikin:

—Jaska min shinain keska axunwen, Jehován jaskadada mikidi shinankin mia medabewaikikidan— akin yuiwanken

4 Davidbe janchakaini kaken jabias meshu medan Natán anu Jehová juxun yuikin:

5 —En tsuma David anu kaxun jancha wakin: “Eska Jehován mikidi ea yuikin David ea yuixunwen: ‘Ea en janu jiwexanun mian min ea kenwanti jiwe axuntidumaki, en janu jiwexanunan. 6 Min xenipabu Egipto anua en jatu taxnimabidanaitian en jatube jiwekunkidani inun na jabiatiandi kenwanti ji jiwe amisbu keska anu en jiwekunkainsmaki. Jakia tadi jiwe pekabainkin maewatidubu anu matun xenipabu inun minabuki en nukukunkainmiski. 7 Badi tibi min xenipabube en kakunkaini enabu Israelin enabu xanen ibu tibi en jatu katukubainaitian januxun kenwanti kuxa jiwe jau ea waxununbun en jawa jatu yunuamajaida ikunkidaniki.’

8 Ja dikabi en ea Jehová kushipajaida dasibi binuatun jaska en mia yuai keskadi en tsuma David ea yuixuntanxanwen: ‘Enabu Israelin enabudan, min jatu yunui xanen ibukunkainxanun chaxuwan ichapa mekekubaini nanta basi bai anu nia chaxuwan chipi jachun min nia kenatan en mia katuniki. 9 Janu min nia ketain anu en mibe kakunkaundiamiski. Jabu miki sinataibu en mia jatu tenan keyukin nemaxunkubainmiski. Xanen ibu kushipabu jiwebaunabu keska min kena dasibibu en jatu unanmakubainaii. 10-11 Ja dikabi Israelin enabu man enabudan, man jatu yunukubainxanun unanti wanika kushipa betsa betsapa matu katukubainkin jatun mai pakea betsa jatu mebintan en matu pewaxuniki. Januxun juni chakabubun matu ichakawamis inun matu bika tenemakin tsuma wamisbu jau ana jaska man jiwepauni keska jiweama unanuma man jiwenun en matu iweniki. Janua miki sinataibun mia uiainbun en mia jatu nemaxunkubainxanaii, jau mia ana bika tenemayamanunbunan. En jatu mekekubaina min bakebu jiwekubainxanaibu bebunkidi en mia tapinmaii. 12 Anibujaidakunkaini jiwea min ma debuniken jau min xantukun Israelin enabu yununikai xanen ibuxanun ean minabu anua min baba bestichai jawen xanen ibu keyutima en mia yunuxunxanaii. 13 Ja inun, min baken januxun ea kenwain eki nukuti templo jatun ea axunxanikiki. En jatu putama xanen ibu jenetiduma ipakexanaikidi en jatuki yubakaii. 14 Min juni bake Israelin enabu xanen ibukunkainaya en jatun epa keska inun jabu en bakebu keska ikubainxankanikiki. Min baken kanekin chakabuwai pewakin en jatu bika tenemaxanaii, jatu kupikinan, jaska epa pepabun jatun bake pewamis keska wakinan. 15 Kanebiaibun en pepa en jatu mebianma ixanaii, Saúl anua en pepa en mebini keskama Saúl putatan jawen xantukun en mia xanen ibu wanidan. 16 En jatu mekekubainaiwen taea minabu Israelin enabu xanen ibupakexankanikiki, niti ikamadan. Ja dikabi jaska min jatu yunumis keska jeneama ikubainxankanikiki’, iwanan, David ea yuixuntanwen”— abainaya

17 jabias uinkin ninkashinkin jawa kaneama dasibi Natánen David yuikin keyua 18 Jehová bebunxun jancha wanun ika Dioski nukuti tadi jiwe puntea anu xanen ibujaida David jikikain yuikin: “Xanen ibuun, ea inun enabu nun jawamabiaken ¿jaskadakidi ea shinankin min ea xanen ibujaida wanimen? 19 Jehováan, en min tsuma anua enabu en bababu kaindiabumabiaken xanen ibukubainxanaibu bebunkidi min ea banabimashinaki. Jehováan, min janchai keska juni betsa janchai yubakatidumaki. 20 Jehováan, ea min tsumakidi dasibi min ma unan keyuaiwen taexun ean en ana jawa yuitidumaki. 21 Jaska bebunkidi min ma ea axunkin jatu ‘¡Jabaa!’ imakubainshina chanima min ea yubashina inun jaska min bechipaiai min akubainai en unaiin. 22 Jaska nuku dasibibun nun ninkamis inun nun uinmisdan, jawa mekenika Dios betsa mia binua betsa jayamaki, mia keskadan. Jaskawen taea en mekenika Jehováan, miadan, min pepajaidaki, tsuan jaska watiduma min nuku axunmisdan. 23-24 Israel minabu wakin min jatu katuni jabu jiwepakexankanikiki. Jiweabun, miadan, Jehováan, min jatun Dios ipakexanaii. Yudabu xukua betsa betsapa jiweabu keska Israel minabu jatu keska jiweama idiaxankanikiki. Diosuun, jau minabu ikubainxanunbun jatu tsumawanibu min jatu mebikinankidankin mina min jatu waniki. Ja dikabi min kushipawen dasibi jatu datekin jatun kena ewapa wakin jabuwen ‘¡Jabaa!’ imati wakin dasibi jiwebaunabu bebunxun Egipto nawabu anua jatu taxnimabidankin nawa xukua tibibun jatun yushibu jatu sa amakin min kushipa min jatu uinmakubidaniki.

25 Jaskawen taexun Jehová Diosuun, jaska ea inun enabu min jatu yubashina jatu jeneama, jaska min yuishina akin menekubainxanwen. 26 Min kena kushipa kenwankin xabakabi yui: ‘Jehová kushipajaida dasibi binua Israelin enabu mekenika Dioski’, ikin jau mikidi janchakin dayuikubainxanunbunwen, jeneamadan. Min jatu mekea David min tsumapan enabun mia ninkai jau pe jatu xanen ibuxunkubainxanunbunwen. 27 Enabu xanen ibu ikubainxanaibu miadan, Jehová kushipa dasibi binuatun min ea tapinmaiwen taexun en min tsuma bestibia dakeama en mia yukaii. 28 Jehováan, miadan, min mekenika Dios kayabiki. Min jancha chanima kayabidiki. Min tsuma min pepa betsa betsapa min ea yubaii. 29 Min tsuma min duawaxanai jakidi shinaindawe. Miki chiti ikaibu min jatu kexexun duawaya jau jiwepakexanunbunwen. Jehová Diosuun, min ma ea yubaxuki, min jatu pepa waya enabu xanen ibui jau benimai pepakubainxanunbunwen, jeneamadan”, anikiaki.