Jehován jancha aduni bau Jerusalén anu Davidin maewanun ika inikiaki, na janchadan
(1 Cr 13.5-14)
6
Chipu dasibi Israelin enabu 30,000 detenamenikabu jawenabun jatu katumisbu Davidin ana jawenawakin dasiwakin jatu ichawatan 2 janua mae Baalá Judán mai pakea anua David jawen detenamenikabube kaxun jawen mae Jerusalén anu Dios jatube yubakani jancha aduni bau maewakatsi inikiaki, ja bau bebunua Diosbe jawenabu janchaxunika xanen ibujaidatun jatu janchaxunmis Dios dasibi binu keyuatun kena ja querubine jamamaki tsaua yukamisbudan. 3-4 Mati anu juni betsa jawen kena Abinadabin jiwe anua Diosun jancha aduni bau Jacobun bake Levín enabun jawen tsumatiwen bitan bakebainkin ina awa dabe tadanbainti bena beabuki naneabu Abinadabin juni bake dabe Uzá inun Ahiódan, jabun ja ina awa dabe tadanbaintiki bukin Ahió bebukainkin ina awa dabe dispiwen tsumaxun ninibainaya jawen betsa Uzá chipi kakin medabewabainaya 5 jabiatiandi Jehová uinmakin kenwankin arpa inun, salterios inun, panderos inun, castañuelas inun, platillos tsumatan bebubainkin jui kushipawen nawai kantakubaini bui 6 janua juni betsa jawen kena Nacónen mati napanpa janu xekiwan bimi tsekaxun katamisbu anu niti itan ina awa dabe itimaskabaunkin Diosun jancha aduni bau bedanbu tin ikai meken bestichaiwen Uzán tsumapaikin 7 tsuan metidumajaida jawa shinanma Uzán metsaiwen taea Jehová jaki sinatajaidakin tenan Diosun jancha aduni bau dapi tin itan jawaida Uzá mawaya8 Jehován Uzá tenanxuwen taea David jaska bechipaiama sinatakin ja napanpa kenakin: “Peres-uzáki”, anikiaki. Na jabiatian ja kena jakimaisbuma jayaki. 9 Jabias xabatiandi Jehováki datechakayamakin Davidin yuikin: “¿Jaskakin jawa shinanma Jehován jancha aduni bau en bexumen?”, itan “¡Ana en jadi buamaki!” iwanan, 10 Davidin jawen mae ewapa anu ana bukatsi ikama mae betsa Gat anu Obed-edomnen jiwe anu jau bununbun Davidin jatu yunua 11 Obed-edomnen jiwe anu uxe dabe inun besti Jehován jancha aduni bau tsaunbidanimawen taexun Obed-edom inun jawenabus Jehován jabu besti pe mekekin medabewakubainaya
Jerusalén anu Jehován jancha aduni bau Davidin ana jatu bimatanikiaki, na janchadan
(1 Cr 15.1–16.6)
12 xanen ibujaida David anu kaxun jawenabun David yuitantankin: “Jehován jancha aduni bau Obed-edom anu min bashibidanimawen taexun jawen bakebube jawen jamapai Jehován duawakin medabewakubainikiki”, akin shinan betsamabu uintanun ika Obed-edomnen jiwe anu David kaxun chanima jaska wai uintan jawen mae anu Dios jatube yubakani jancha aduni bau Davidin ana bukin maewadinun ixun benimakin jatu pewamatan 13 4 junibun iabaini paibaini 6ki ma tatsekebainaibun Davidin Jehová ja menuxunkatsi ina awa bene pepa inun chaxuwan bene xuadanwan ma pewa tesentan dashpexun jawen xeni bixun chiwen kuakin jawen kuinwen Davidin Jehová benimawabaini
14 jawen efod lino tadi juxupa sawea nawai xeke xeke ichakayamakunkaini 15 Israelin enabun Jehován jancha aduni bau buaibun dasibi benima chakayamai shanshanki ibainkin jatun mane trompeta chan chan ati mawakubaini buaibun
16 Davidin mae mishki kenebaunibu anu Jehován jancha aduni bau iabaini jikiaibun Saúlun ainbu bake Mical ja dukun Davidin ainwani janu niwe jikiti xui anu nixun jaska Jehová bebun David xeke xeke iki nawakunkainai Micalin uintan jaska bechipaiama jawen dakekin dananchakayamaya
17 Jehován jancha aduni bau iabaini bukin tadi jiwe ewapa ma jaki tanaxun Davidin jatu puntemashina namakis tsauanbu ana ja kachu Davidin jawaida jawen tsumabu yunua Jehová bebun chaxuwan ichapa tesenxun dashpe keyuxun xeni dasibi bixun jawen nami dasibi mexte mexte akin chudi waxun jawen nuewen Jehová benimawakin menukin taewaibun 18 Davidin menukin keyutan Jehová kushipa dasibi binuatun kenawen jancha pepawen jawenabu dasibi jatukidi pe janchakin Davidin jatu pepawatan 19 januxun Israelin enabu dasibi janu ichabu junibu inun ainbuaibudan, xekiwan trigo misi ewapa bestichai inun, nami xui tunku bestichai inun, uva bimi tsusin tunku wabu inun, bimi betsa batapadi tsusin tunku wakin kextu wabu bestichai jau jatu inanunbun Davidin jawen tsumabu jatu yunua bestibu tibi jatu inanbaunkin keyuabu, piti keyu bitan jatun jiwe anu chintunbainaibun
20 jawenabusdi jancha pepawen jatukidi pe janchanun ika jawen jiwe anu David chintunkaini kaya jawen ain betsa Saúlun bake Mical inun ika kainkaini jaki nukui kaxun dakewakin yuikin:
—Israelin enabu min jatun xanen ibujaida natian min jatu pexunkidankin min dayadubun esclava ainbuaibu bebun jaskatimabiaken jatu uinmai nawai xeke xeke ikidani min pexukitsa, dakeamadan— aka
21 kemakin Davidin yuikin:
—Chanimaki. Jehován ea uianyan kenwankin benimawai jamen ikama en nawaxuki. Jehován enabu Israelin enabudan, en jatun xanen ibu ikunkainxanun min epa danantan minabu katuama Jehován ea katuniki. Jaskawen taea ja bebunua en nawaxuki, jawa dakeamadan. 22 Enabube en besikunkainaidan, ibubis en jawama keskaki, Jehová ixuinan. Jaskaidan, en keanmaki. Min ea jaska uinkin yuiaiwen taea en babuamaki. Min ea jaska wabiaya ja jabias esclava ainbuaibukidi min ea yuixu jabiabun ea duawakubainxankanikiki— akaya
23 janua Saúlun bake Mical jawa bake bisma yuxabunikiaki.