David jatu xanen ibuxunkin Israelbu xukuabu inun Judábu xukuabu jatu yunukubainikiaki, na janchadan
(1 Cr 11.1-3)
5
Hebrón anu Judán enabu David jatun xanen ibu ikaya Israelin enabu xukua tibibun anibu unanepabu Davidbe janchanun ika Hebrón anu buxun David yuikin: “Dasibi nun nukubudan, Jacob nukun xenipabuwen taea nun jabiabuski, juni betsamadan. 2 Chanima Saúl nukun xanen ibubiaken mian Israel detenamenikabu min jatu yunu pewakubainkin Filisteo nawabube min jatu detenamemakubainimaki. Ja inun, xanen ibukin Israelin enabu dasibi min yunukubainxanun katukin Jehován mia yubanikiaki. Jaskawen taea nukun xanen ibu idiakunkainxanwen”, akeakeabu,3 jaska wakin Israelin enabu anibu unanepabu dasibi buxun Hebrón anu xanen ibujaida Davidbe janchakin Jehován jau jatu unanti wakubainxanun David jatube yubakai taekin Israelin enabu dasibi David jabundi xanen ibu idiakunkainxanun anibu unanepabu dasibibun jatun xanen ibu wakin David katunibukiaki. 4-5 Hebrón anua xanen ibui taei David 30 año jayanikiaki. Hebrón anu 7 año namakis Judán enabu anua David xanen ibukunkaini chipu Jerusalén anu maetan 33 año Israelin enabu dasibi anu David xanen ibudiakunkaini mawadiama 40 año David jatu xanen ibuxunikiaki.
Sión mae kushipa Jerusalén Davidin jawenabubetan jatu mebinikiaki, na janchadan
(1 Cr 11.4-9)
6 Israelin enabu dasibibun David xanen ibujaidawakin taewaimabu Jebuseo nawabu Jerusalén anu jiweabu inun ja dapi jiwebaunabu jatu maemanun ika Jerusalén anu xanen ibujaida David inun jawen detenamenikabu buabu jatu uinkin shinain jaskatan jatun mae anu jikitiduma dabanen David yuikin: “Miadan, jaskatan min nuku anu jikitidumaki. Nukun bekunbu inun chantubun matu jikimatidubumaki. Jaska bestiki. Nenuadan, budikanwen”, 7-8 jatu wabiabu Davidin jawen detenamenikabu yuikin: “Jebuseo nawabu jatu detekin keyuidan, ja jene jabakainti wanibu anu dasibibu janu jiki keyubain ja Jebuseo nawabu bekunbu inun chantubu en jatu dananjaidai nuku nemaibu jatu tenain bukanwen”, jatu wa jaska jatu yuia jene jabati wakin mishkiwen buyabainibu baiwen jikibain jatu maemakin achi keyutan Davidin Sión kenebaunibu jawena wanikiaki. Ikis Jerusalén anu mananan kenebaunibu kena betsa wakin: “Davidin Maeki”, amisbuki. Ja dikabi David jadi janchaniwen taea tsuanda yuikin: “Jehován kenwanti jiwe jemaintin kenekauna anu bekunbu inun chantubu jikitibumaki”, ikin jatun beyawen yuikubainmisbuki. 9 Ja mananan mishki kenebaunibu anu jawenabube David jiweabu jatu kenakin: “Davidin Maeki”, akaibun ana mishkiwen jatu kene nati amakatsi ikin Davidin jatu yunua nortekidi mishki kene xeni ana jatu chichimabaunkin mai inun mishki tude shadabuwen mai panpa wakubainkin tapaiti keska wakin mishki kene bena wakin janu Davidin jiwe bena ewapa jawendua jatu amaxanai anu keben nati akin dexun wabaunkin kene xeniki mexti anibukiaki.
Nawa betsa Hiramnen jawen janchaxunikabu David anu jatu yununikiaki, na janchadan
(1 Cr 14.1-2)
10 Jehová Dios kushipa dasibi binuatun David medabewaiwen taea xanen ibui David ana kushipai ewakunkainaya 11 jaskai ninkatan jawen datekin maewan betsa Tiro anua xanen ibujaida betsa jawen kena Hiramnen jawen xanen ibu bexmasbu jabu nantabua janchaxunmisbu David anu jatu yunua, ji dayamisbu inun mishki pewamisbu xanen ibu bexmasbun jatun tsumabu ji senke jatu bumaxun David jiwe jatu wamaxunkin mishki tapa ja dukun sapa wakin pewamatan januxun kuxa tuax ichapa washinxun jawen jiwe ewapa jawendua David axunkin keyutan inun buaibun 12 jaska Jehován David xanen ibuwakin katuimaxun jawenabu Israelkidi Diosun jatu mestenwanmai inun nantakexun ninkaibu jawen xanen ibukidi kushipai Davidin ibubis unankin tapinkubainikiaki.
Jerusalén anu maeimaxun Davidin ana bake ichapa wanikiaki, na janchadan
(1 Cr 3.5-9; 14.3-7)
13 Hebrón jenebaini Jerusalén anu David jiwexun ana ainbu bikin betsa ain kayawakin inun ainbu betsa esclava betsa tibi Davidin ana bitan juni bakebu inun ainbu bakebu jatu bawanikiaki. 14 Jawen juni bakebun kenadan, Samúa inun, Sobab inun, Natán inun, Salomón inun, 15 Ibhar inun, Elisúa inun, Néfeg inun, Jafía inun, 16 Elisumá inun, Eliadá inun, Elifélet jatibu Jerusalén anua kainibukiaki.
Filisteo nawabu Davidin jatu maemanikiaki, na janchadan
(1 Cr 14.8-17)
17 Jau jatun xanen ibujaidanun Israelin enabu dasibitun David ma katuimabu Filisteo nawabun ninkatan jabe detenamekin maemanun ika yubakai ichabidan David benai buaibun jaskaibu ninkatan mishki kenebaunibu kushipa anu jawen detenamenikabube David jikitan juneken 18 janua Filisteo nawabu bei Refaim napanpa anua detenamenun ika kebaunabun 19 jaska maniabun Jehová Davidin yukakin:
—¿Filisteo nawabube detenametanpa? ¿Ea medabewakin min ea jatu maemamai? Ea yuiwe— aka
Jehován kemakin yuikin:
—Jaa. Mia medabewakin en mia jatu maemamaiwen taea jatube detenametanwen— aka
20-21 jawen detenamenikabube kai Refaim napanpa jawen kena bena Baal-perasim anu David jikixun jau jatu dete keyununbun jawenabu jatu yunua jawaida Filisteo nawabu maemabun jatu jaska wabu jawaidabainkin jatun yushibu dami betsa betsapa Filisteo nawabun jenebainaibun jatun dami betsa betsapa ichawakin David inun jawenabun jatu bianbainibukiaki. Jawaida jatu maemaxuwen taexun Davidin yuikin: “Paxku bai matajaidabidanai chitewaxun tuea keska wakin eki sinataibu Jehován jatu ea pua axunxuki”, axun kenakin: “Baal-perasimki”, anikiaki.
22 Jakia chipu Filisteo nawabu paxatani ana chintunbidan janua detenameshinabu anu ana jabianudi Refaim napanpa anu jikitan detenamenun ika kebaunabu 23-24 jaskaibu uintan Jehová Davidin ana yuka kemakin Jehován yuikin:
—Ana jatu bebun buxun jatu detenun ika buyamakanwen. Jakia jatu dunkei junebaun jatun pechiudia bei muxu xukua anu jikitan man ma jaskatanaya matu mamaki kauani en banakainai ninkatan en ma matu bebuxunai unantan jawaidabain Filisteo nawabu detebaunxankanwen, en jatu matu tenanxunaidan— aka
25 jawen jancha ninkatan jabias Jehován yunua Davidin akin jawen detenamenikabubetan Filisteo nawabu maemakin jatu deteabu paxaibu Gabaón anua jatu detekin chibankubainkin Guézer anu jatu jenetani chintuntanibukiaki.