—¿En jawa ana jaska washianmen? ¿En jawa kaneshinamen? ¿Min ibudan, jakidi en jawa chakabujaida washinamen? jaskawen taexun benakin ea tenanun, ika ikaidan— aka

2 kemakin Jonatánen yuikin:

—Diosun jaska bechipaiamaki. Min mawama ixanaii. Shinankin ea ninkawe. Ea jawa yuiama eamaki jawa betsa betsapa en epan aismaki. Mia tenanun ika ¿jaskakin ea juntainmenkain? Jaskatidumajaidaki— aka

3 jakia ninkamas Davidin ana yuikin:

—Min ea bechipaijaidai min epan unankin mia nuimakatsi ikama ea tenanun ixun mia jaska yuikatsi ikamaki. Jehová inun mian min ea ninkaya ma en debu kema chanima xabakabi en matu yuiaii— aka

4 Jonatánen yuikin:

—Min jaskadada bechipaiayadan, ean en mia axuntiduki— aka

5 Davidin kemakin yuikin:

—Eska en shinaiin. Meshukidi uxe bena taxniaitian besikin min epa xanen ibujaidabe tsauxun en pimiski. Janu jabetan nun piaitian en jawen dateaii. Ua meshukidi badi kadiama bai anu en juneyukatsis ikai ea nemayamawe. 6 Min jabetan piaya min epa ea yuka ikayadan, mian eska ea yuixunxanwen: “Jawen mae Belén anu jawaida kainkin ea ea atan kashianki. Badi tibi Jehová benimawakin chaxuwan xeni menuxunkin keyuxun jawen kenwanti nami jawenabu ichaxun badi tibi pimisbubetan pi kashiankiaki”, min wa 7 mia kemakin: “Peki”, mia wayadan, jaskayadan, unanuma en jiwexanaii. Jamen jaskama eki sinatakin ea chakabuwaxanai min unanxanaii. 8 Jaska ekidi janchaxanwen. En ma min dayadukidan, Jehován nuku ninkaya mibe jaibunamei nun yubakanameimaki. Jaskawen taexun en kaneshinken min epa anu ea iyuama mian ea tenandiyuxanwen— aka

9 jakia Jonatánen kemakin yuikin:

—Jaska tibi shinanyamawe. En epa en ninkayuxanaii. Mia chakabuwakatsis iki mikidi janchai ninkatan en mia banabimaxanaii— aka

10 ninkatan Davidin yukakin:

—Min epan ekidi chakabu shinanyan ¿tsuan ea banabimatidumen? min epan mia jaska yuiayadan— aka

11 Jonatánen kemakin yuikin:

—Ua benanta bai anu kananwen— abaini

ja dabe kaxun 12 jadixun Jonatánen ana yuikin:

—Israelin enabu mekenika Dios Jehovábe en yubakaii. Meshukidi inun ua xaba betsatiandi jabias baditian jaska en epan shinain tapin en jabe janchaxanaii. En epan mikidi shinan pewaya en mia banabimaxanaii. 13 Jakia en epan mikidi shinan chakaya en mia banabimama jau Jehován ea kupijaidakubainxanunwen. Jamen jaskama en mia banabimakin medabewaya unanuma min paxaxanaii. Jaska Jehován en epa medabewakubainima keska wakin jau mia medabewadiakubainxanunwen. 14 Na eskatian jiweyuxun en mia medabewai keska jabias shinanwen jaska Jehován mia duawakubainmis keska en mawadiama jabiaskadi eadi duawakubainxanwen. Jakia en ma mawaken 15-17 miki sinataibu Jehován jatu unanti waxun kupi keyubiaken ea jakimama enabudi duawakubainxanwen— aka

jaskai ja dabe bechipainamei jaibunamenibuwen taea ja dabe ana yubakanibukiaki.

18 Jonatánen David ana yuikin:

—Meshukidi uxe benaken nun besiaya janu min tsaumis anu min jayamaken mikidi yuka ixankanikiki. 19 Xaba dabe inun besti kaya min jayamaken janu en epan mia benajaidaxanikiki, pepawen kasmai, chakabu shinankinan. Jaskaken ja mishki tunku mania dapi uatian min janu juneimanu ana jabianudi junetan ea manatanxanwen. 20 Jadi kaxun ja mishki tunku mania anudi min junea anu janu tsua jayama keska anu 3 pia en bishku bishku axanaii. 21 Jaska watan en tsuma yunukin: “En pia ea benaxuntanwen”, en aka kaya ana yunukin: “Ja chaima pia mapuaki. Ea bexunwen”, akin en jaska waya en epan mia jawa wamawen taea unanuma min taxnikidantiduki, Jehován ea ninkaya en mia yubaidan. 22 Jakia en tsuma yunukin: “Tudidi nanta mapuaki. Jadi kaxun ea bixuntanwen”, akin en jaska yunuaya min paxatanun Jehován mia jaska bechipaiaya jawaida paxaditanxanwen. 23 Na jaska nun yubakaxu Jehován nuku ninkatan shinanpakexanikiki— aka

24-25 David june kain bai anu junei kaken uxe benatian besikin pinun ika janu xanen ibu tsauxun pi beyamis anu keneki tabia tapu anu Saúl tsaua ja tapu bebun Jonatán tsaua janua Saúl dapi Abner tsaua betsa anu David janu tsauxun pimis xakaken 26 Davidkidi Saúlun jawa yuiama jakidi shinan bestikin: “Jawada Diosun nemani nun metiduma meshina pediama jutidumamenkain”, ishian 27 besikin jatubetan pikubaini ja kachu xabatian ana David ana jayamaken jawen bake Jonatán Saúlun yukakin:

—Nukubetan besikin pi ¿jaskai Jesén bake meshukidi juama ishian inun ikis ana juamamen?— aka

28 Jonatánen kemakin yuikin:

—Davidinan, jawaida kainkatsis ikin ea yuibainshinaki, jawen mae Belénkidi kakinan. 29 Jawen mae anuxun jawenabun Jehová kenwain besiaibun jawen betsa iyuatun kenakin jau jununwen ashianwen taea: “Enabu jawaidakain en jatu uinyui kai ea nemayamawe”, ea akin yukaiwen taexun en jadi yunua kashianki. Jaskawen taea min jawen xanen ibun tapu anuxun mibetan pi ana juyuamaki— aka

30 jaskai Saúlun ninkatan Jonatánki sinatajaidakin yuikin:

—Min ewa chakabujaidatun bakedan, min miaki. Jesén bake min jaibujaidawen taea mia inun min ewaki daketidubudan, ¿ean en unanma dabanen min shinain? 31 Jesén bake min yaushiaidan, ja jiwekenan, miandaki min en xanen ibuai ea kachu min ea mebin jikitidumajaidaki. Jau mawayunun ja benabauntanunbun jatu yunuwe. Bechitan nedi ea ixuntanwen, en tenainan— aka

32 Jonatánen kemakin jawen epa yuikin:

—¿Jaskadawen taea mawatidumen? ¿Jawa chakabuwashinamen?— aka

33 Saúlun jaskai ninkatan jawen bake Jonatán chachinun, iwanan, jawen jashi sanantan putakin jaska wai uin: “Chanima en epadan, Davidki sinatajaidakin tenankatsis ikikiki. Jaskakin ea ma unanmaikiki”, iki 34 sinatajaidai tapu anua ana jabetan pikatsi ikama benikaini jawen epan Davidkidi jancha chakabukin kunyan akin bika tenema jawen nuijaidai uxe bena nishian kenwain besiaibu xaba ja kachu Jonatánen ana jatubetan piama jenebaina 35 uxashini penaya jabiatiandi David yubashina keskai jawen tsuma bedunanbe Jonatán bai anu kaxun 36 bedunan yunukin:

—Na pia en bishkuai kushikain benakin jawaida ea bixuntanwen— aka

kushikainai bebun bishku bishku akin jawen tsuma bebun chaijaida ti tiki axuan 37 janu pia ti ikanu niti itanaya jui kushipajaidawen Jonatánen yuikin:

—Ja min niti ixu ana tudidi pia betsa niaki— akin

38 ana jui kushipajaidawen yuikin:

—Menan niti ikama kushikain bitanwen— aka bitankin jawen tsumapan jawen xanen ibu anu pia bexuanyan 39 jaska wakin bedunan amai unanma jakia jaska unankinan, Jonatán inun Davidin besti unainbun 40 januxun Jonatánen jawen kanun inun jawen pia inun jawen detenameti jau buxuntanun jawen tsuma inankin yunukin:

—Nukun jiwe anu ea buxuntanwen— aka

41 jawen tsumapan buxuin ma kaken mishki tude manchinkin maspuanibu pechiudia David taxnikidan: “Min jaska wakin ea pejaida waxuki”, aki Jonatán bebun David danti iki dabe inun bestiki maiki beti beti itan benikauan nia jatun beya chibain jabe tantsu idabetan jabe kaxa chakayamai David jui tedis iki texatan 42 atimas neseaya Jonatánen yuikin:

—Unanuma kai peditanwen. Nun jaibunamekunkainxanun Jehovábe nun yubakaimawen taexun mia inun ea medabewakin nukunabu pakubainaibu enabu inun minabu Jehován jau jatu medabewakubainxanunwen, nun yubakaimawenan. Jaskawen taexun ekidi pe shinankubaini katanwen— aka

David bai tanabaini kaya Jonatán jawen maewan anu chintunkidanikiaki.