—En epan mia tenankatsis ikikiki. Jaskaken meshukidi penama bai anu june ka jadi iduyutanxanwen. 3 Jadi min ka anu en epabe en kaxanaii. Jaskada mikidi ea yuimenkain. Tapintan mikidi en jabe janchaxanaii. En epa ma kaken jaska ea yuixu en mia yuixanaii— abaini kaya

4 ana meshukidi penama jawen epabe bai anu kaxun David medabewakin daewaxunkatsi ikin Jonatánen jawen epa Saúl yuikin:

—Xanen ibuun, min tsuma Davidinan, jawa chakabuwakin mia chakabuwama jaki sinatakin meyamawe, pe besti mia axunmiskidan. 5 Eskawen taexun ea ninkawe. Filisteo nawa Goliat detenamenika mesebiaken David dateyamakain Jehován David medabewaya Filisteo nawa nuku putamaimadan, uintan ibubis min benimaimaki. Jehován jancha danankin jawa chakabuwaismabiaken ¿jawawen dabanan David min tenankatsis ikai?— aka

6 Jonatánen jancha ninkakin shinantan atimas kemakin yuikin:

—Aa, chanimaki. Jehován nuku ninkaya en mibe yubakaii. David en ana tenanmaki. Jau jiwepakexanunwen— abaini kaken

7 januxun Jonatánen David kenaxun jaska ibube janchaxu banabimakin yuikin daewaxun Saúl anu David iyua jaska waxunkubidanima keska wakin Davidin ana Saúl medabewakubainaya

8 ana jatube detenamenun ika Filisteo nawabu Israelin enabu maiwan pakea anu ana bei jikiabu jatu nemakin putanun ika jawen 1,000 detenamenikabuya David ka Filisteo nawabube detenamekin jatu maemakin midima tenainbuwen taea Filisteo nawabu jabu jiwenun ika datei paxai keyuabun 9 meshu betsatian Diosun yunua yushin chakabu Saúlki ana jikia Saúl duxku iki itsai bika teneaya xuxa wakin bextenun, iwanan, arpa Davidin mimawaxunaya jawen jiwe anu jashi tsuma Saúl tsauxun 10 David chachikin keneki tsanpa wanun, iwanan, jawen jashi Saúlun jawaida jaki puta jakia Davidin binui dabeketanai kene besti chachia niken jaska wakin datea uinbaini jabias meshu medan jawen jiwe anua David kainkaini paxaken 11 jawen jiwe anu jau jawaida kexexun uinunbun jatu mekemakin penama taxnikainai jau tenanxanunbun jawen tsumabu betsa betsapa Saúlun jatu yunua buxun kexeaibun jakia jawen ain Micalin David yusinkin yuikin:

—Ikis paxadiwe. Nenua min paxamadan, meshukidi min mawatiduki— atan

12 uinti xui anu dispi kushipawen Micalin David jabias meshutian butea paxaken 13 dami yuda itsa bexun Davidin uxati anu datanxun dami buxkaki cabra dani tima maimaxun dakukutiwen Micalin yabuken 14 jau David jawaidabain achitanunbun Saúlun jatu yunua jawen jiwe anu bua yuka ikaibun jakia Micalin jatu yuikin:

—Jawen uxati anu isin teneikiki— jatu wa chintunbain Saúl yuiabu, 15 jau David jawen uxati anu ana jabi benatanunbun Saúlun jatu yunukin:

—Jawen uxati anu dakabiaken kainmatan ea anu iwetankanwen, jau nenuxun tenanunbunan— jatu wa

16 Saúlun tsumabu ana buxun Davidin jiwe anu jikibain jawen uxati anu dami yuda itsa cabra dami tima maitiya bechitan jawen bake Mical besti achitan iyuxun jaska bestikidi uinkanxu yuiabu 17 Saúlun Mical yuikin:

—En jaki sinatai jani junekin nichinxun ¿jaska wakin min ea jaskawen padanxumen?— aka

padankin kemakin Micalin yuikin:

—Paxai en nema ea yuikin: “En kai ea nemayamawe, en mia tenantidukidan”, ea watan kashianki— aka

18 jaskakaini David junekaini Ramá anu Samuel uin kashinxun jaska Saúlun ashian Samuel yui keyushina janua jabe maei mae betsa Naiot anu David Samuelbe jiwei kaken 19 jadi jiwei bushianbu Saúl banabimabu 20 ana David jau jadia achitanunbun jawen tsumabu Saúlun ana jatu yunua bui kemaxun Diosun jancha yuixunikabu Samuelin jatu imaya nishi paewen paean keska benimakin Dios kenwankubidanaibu uianbun jawaida Diosun Yushinin Saúlun tsumabu jabudi jatu betsa wa Diosun jancha yuixunikadiai nishi paewen paean keska benimakin jatubetan Dios kenwainbun David tsuan jawa wama

21 jatu yunua bushianbu jaskaibun Saúlun ninkatan jawen tsuma betsabundi David jau achinunbun ana jatu yunua buabu Diosun Yushinin jatu jabiaskadi wai ninkatan jawen tsuma betsabu Saúlun ana ja kachu jatu yunua buaibu Diosun Yushinin achixun jabiaskas jatu wakubainaya 22 janua ana ninkatan ibubis Ramá anu Saúl kai Secú anuxun janu unpax aduti ewapa anu jikixun jatu yukakin:

—Samuel inun Davidan, ¿janimen?— jatu wa, ichapabun kemakin yuikin:

—Ramá dapi Naiot anu jiweabuki— akeakeabu 23 jadidi kai bai tanabaini namakisxun Diosun yushinin Saúl betsa wakin kushipa wa ja dikabi paean keska benimakin Dios kenwankubaini Ramá dapi Naiot anu Saúl jikitan 24 januxun jawen tadi pekakin keyua Samuel bebunxun xaba bestichai inun meshu bestichai kaya nishi paewen paean keska ikunkainkin Dios kenwankubaini penama jawen shinan jaki dasi keyua dakejaidai jawa yuiama Saúl jawen jiwe anu chintunkidanikiaki. Jaskakidi jakidi yuipaunibudan: “¿Saúldan, jabiadi Diosun jancha yuixunikadi ikimenkain?” iake iakepaunibuki.