Jonatán inun David jaibunamejaidanibukiaki, na janchadan
18
Saúlbe David janchai meneaya janua jawen bake Jonatán jabe jaibunamenikiaki, David bechipaijaidai ibubis bechipaiai keska wakinan. 2 Januxun jau jawen epan jiwe anu ana chintunkainyamanun jabianua jabe jiwei jau dayaxunkunkainun Saúlun David nematan yununikiaki. 3 Janua Jonatán inun David bechipainamedabei putanametimai jaibunain yubakadabenibukiaki, Jonatánen jawen yuda bechipaiai keska wakin Davidkidi shinankinan. 4 Ja dikabi Jonatánen David inankin jawen bemakia tadi inun jawen sanpu tima tadi pekaxun sawemakin jawen machatu chaipa kenujaida inun jawen kanun pepa inun jawen nanexeketi pepa inan keyunikiaki.5 Jaska Saúlun David yunua axunkin Davidin jawen unanepa uinmakubainaiwen taexun detenamenikabun xanen ibu bexmas Saúlun David washinken januxun Saúlun xanen ibu bexmasbu inun jawen detenamenikabu dasibibun David bechipaikubainibukiaki.
Dasibibun David bechipaiaibun Saúlun danain jaki sinatakunkainikiaki, na janchadan
6 Filisteo nawa Goliat Davidin tenanshinken Saúl inun jawen detenamenikabuya chintunbidanaibun xanen ibujaida Saúl juai jaki nukunun ika benimajaidabidani Israelin enabun mae tibi anua ainbuaibu jatun mimawatiya kainbidankin shasha ati inun tsadin tsadin atiya nawai kantakubidani Saúlki nukui 7 jabias kantati kantakin jeneama yuikin:
“Saúlun 1,000 junibu tenanshinaki.
Januxun Davidin 10,000 junibu tenanshinaki”,
iki jeneabumaken
8 jaskaibu Saúlun ninkai bechipaiama sinatajaidakin yuikin:
—Davidin 10,000 tenanshina yuikika. Jamen eanan, ¿1,000 besti en tenanshinamen, jaskakidi man nuku kenwainan? ¿Man daka jawaida matun xanen ibu wai ikai?— ikin
9 ja David jaska waibu ninkai Saúlun jakidi shinan chakakin danan taewabainaya
10 jaska washina xaba betsatian Diosun yunua yushin chakabun Saúlki jikitan jawen jiwe jawendua anua Saúl duxku itsai bika teneaya xuxawakin mimawaxunmis keska wakin arpa Davidin mawaxunaya Saúlun jashi tsumaxun 11 David chachikin keneyabi tsanpa wanun, iwanan, jawen jashi Saúlun jakidi puta Davidin jashi binui dabekeaya dabeki chachipaikin kanea
12 ana Jehován Saúl medabewama David medabewaiwen taea Davidki Saúl datekunkainkin 13 ana jabe jiwemama nichinkin jau jatun detenamenikabu xuku betsa jau yununun comandante wakin David yunushina jatuki sinataibube detenamemakin Davidin jatu iyutantankin iwebidanbidanaya 14 Jehován David medabewa jatu detenamemakin jatu yunukin pewakubainai 15 Davidin jatu jaska wamai Saúlun jatu uin ana jawen datejaidaya 16 jakia jatube detenamenun ika butan butanaibun Davidin jatu pe yunukubainaiwen taexun Israelin enabu inun Judán enabu dasibibun David bechipaiaibun
17 xaba betsatian Saúlun ibubis shinankin:
—Ibubis en David tenantidumaki. Jakia Filisteo nawabun ea axuntidubuki— iwanan, David kena jua Saúlun yuikin:
—Tsuki dateama mentsisipai Jehová Dios min detenamexunkunkainaiwen taexun en ainbu bake iyua Merab en mia bimaxanaii— aka 18 jakia Davidin kemakin Saúl yuikin:
—Xanen ibujaidatun dais en itidumaki. Eadan, en jawaumaki. Ja inun, Israelin enabu anua enabudi jawabumaki. Jaskabiaken min bake min ea bimakatsi ikai en bitiduki— aka
19 jakia David Merab ainwanmanun, iwanan, jaska yubashina ma kemaya David mebintan juni betsa Adriel mae Meholá anua Saúlun jawen ainbu bake Merab inankin bimaken 20 jakia jawen ainbu bake betsa Mical Davidbe bechipainameai tsuanda uintan Saúl banabimabu ninkai benimajaidakin 21 ana shinankin: “Jatube detenameaya Filisteo nawabun David jadixun tenanxankanikiki. Jaskaken en bake Mical bimatan yunu chakamakin Filisteo nawabu en jatu tenanmatidumenkain”, itan David ana kenatan yuikin:
—Davidiin, eskatianan, en mia dais waxanaii, en ainbu bake betsa mia bimakinan— atan
22 januxun jawen tsumabu Saúlun yunukin jatu yuikin:
—Tsuan ninkama David bestibe janchakin ea eska yuixunkanwen: “Nukun xanen ibujaidatun mia bechipaijaidaikiki. Ja inun, jawen dayadu dasibibunan, nun mikidi pe shinankubainmiski. Xanen ibujaidatun dais ikunkainxanwen, jawen bake biantanan”, ea waxuntankanwen— jatu wa
23 Saúlun dayadubu David anu buxun jabias jancha yuiabu jakia Davidin jatu kemakin:
—¿Xanen ibujaidatun dais ikunkaini bikama dabanen man shinain? ¿Jaskai nuitapabiai en xanen ibun dais itidumen? En mitanumaki— jatu wa
24 janua Saúl anu ana buxun Davidin jancha banabimakin yuiabu 25 jau Filisteo nawabun David tenanxanunbun Saúlun kemakin jatu ana yuikin:
—“Nukun beya chibankin ainbu juni betsan bikatsidan, jatun epa bebunkidi mabu ewapa bixunmisbuki. Jamen eanan, en xanen ibun yunuaidan, jaska en shinanmaki. Jakia nukuki sinatamisbu kupikin Filisteo nawabu tenantan 100 jina kubichi mextebidan ja dukun ea bexuntiduki. Jaska besti jakidi en shinaiin”, jaska David ea yuixuntankanwen— jatu wa
26 David anu ana buxun Saúlun jancha yuiabu Davidin ninkatan:
—Jaskakenan, peki. Xanen ibun ea dais wakatsi jaska bechipaikin yunuaidan, bikamaki— ixun janu Saúlun yubashina kemadiamabiaken 27 David jawen detenamenikabube kaxun jatubetan 200 Filisteo nawabu detekin tenanxun jatun jina kubichi mextetan bexun xanen ibujaidatun daisnun ikidan, ja 200 jina kubichi Davidin Saúl inantushiaiwen taexun jawen bake Mical Saúlun David inanikiaki, ainwanmakinan.
28 Jehován David medabewakubainaya jawen ainbu bake Micalin David bechipaijaidai uinkin unain 29 ana Davidki datekunkainshina binumai ana jaki Saúl datekin danain jaki sinatai jenetiduma inikiaki. 30 Jaska inun, betsadan, Filisteo nawa xanen ibubun Israelin enabu detenun ika beaibu tibi Saúlun detenamenika xukua betsabu jatubetan jatu detekin maemabiaibun Davidin jawenabu binumakin jatu ichapa detexunkubainikiaki, comandante betsabu binukinan. Jaskaiwen taexun Davidkidi dasibibun ninkabauni bechipaijaidai jakidi pe shinankubainibukiaki.