Filisteo nawa Goliat Davidin tenanikiaki, na janchadan
17
Israelin enabu detenamenikabube detenamenun ika Filisteo nawa xanen ibubun jawen detenamenikabu jatu ichawabidan Judán enabun maiwan pakea anu mae betsa Socó inun Azecá namakis Efes-damim mae anu jatun tadi jiwe puntebaunabun 2 janua jaskadiai Filisteo nawabube detenamenun ika Saúlun jawenabu ichawadiabidan paxku Elá napanpa anuxun jawen detenamenikabubetan jatu detenun ixun pewakin jatun tadi jiwe puntediatan januxun Filisteo nawabube detenameti mabu pewaibun 3 janua mati mananan betsaudi Filisteo nawabu mapubaunabu inun ukedi mati mananan betsa anudi Israelin enabu mapudiabaunabu ja paxku napaku namakiswen taea paxka uinanainbun 4 janua Filisteo nawa detenamenika betsa jawen kena Goliat jawen yuda keyatapajaida 3 metro jaya jawen maewan Gat anua jua jawenabu nashui ika niken 5 tsuan jau deteyamanun jawen buxka junekin maiti bronce mane sawea inun bronce mane tadi jawen xuchi anu inun pechiudi junekin sawedia jawen xankama 55 kilodan, 6 jawen kishi inun jawen bikedan anu junediakin bronce mane sawedia ja putakin jatu chachiti jashi bronce manedi inun, 7 jawen ji kushipa chachiti jashi ewapa nunkupa jawen debu acero mane kenujaida jawen xankama 6 kilo ia inikiaki. Jawen medabewanikan jawen detenameti mabu buxunmis bebukainaya 8 Goliat kainkidan nixun jui kushipawen Israelin enabu jatu yuikin:“¿Jaskai detenamenun ika bebiashina man jamen mapuabumen? Eadan, en Filisteo nawaki. Jakia matudan, man Saúlun tsumabuki. Butukidan tsua ebe detenameyuimenkain, juni betsa matu anua katutan ea anu yunukanwen, jau ebe detenameyununan. 9 Matunabu betsa detename unaintun ea maemaya nuku dasibibu nun matun dayadu ikunkainxanaii. Jamen ean en ja juni maemaken matu dasibibudi man nukun dayadu ikunkaintiduki. 10 Ikis Israelin enabu detenamenikabu tibi yuikin en matu shinanmaii. Jau ebe detenameyunun bestichai yunukanwen”, jatu wa
11 jaskai Saúl inun Israelin enabun Filisteo nawa janchai ninkatan ana jawa benimama punu nukatan jaki datei keyuaibun
12-14 Saúl xanen ibuyuken Belén anua juni betsa Jesé anibujaida 8 juni bakeya jawen bake maxku Davidan, Jesén 3 juni bake iyua, Eliab inun Abinadab inun Samá Filisteo nawabube detenamenun ika Saúlbe ma bushianbu 15 janua uatian Saúlun David kena jubiashina ana jawen epan chaxuwan meketanun ika Saúl anua taxnikaini Belén anu chintunkainshinken
16 ja Goliat taxnikidankidankin xaba tibi penama inun badi kaya tibi jatu kaxe janchawen yuikin Israelin enabu sinatamakubaini 40 día jatu bika tenemaya 17 xaba betsatian Jesén David yuikin:
“Xekiwan trigo tsui 20 litro inun 10 misi bitan jatun tadi jiwe anu min betsabu buxuntanwen. 18 Ja dikabi jatun xanen ibu bexmas inankuinkin 10 awa chuchu tanki buxundiatanwen. Min betsabu jaskadamenkain, jatu ea uinxuntanwen. Min betsabu ma pe jiweabumenkainan, kakape ninkatankin ea yuiyutanwen”, aka
19 jabiatiandi Saúl inun Davidin betsabu inun Israelin enabu detenamenikabu Elá napaku anua Filisteo nawabube detenameaibun
20 David penama bestentan jawen epan chaxuwan juni betsan jau mekexunyunun yunutan piti jawen epan yunushina jatu buxuin kai jatun tadi jiwe puntebaunabu anu jikitushiaya Israelin enabu detenamenika mapubainabu jatun date jenei ana dateama detenamenun ika sai sai iki keyuaibun 21 mati dabe anua beisinanbukuin Israelin enabu inun Filisteo nawabu mapubauna uinanainbun 22 janu piti inun mabu mekeabu anu ja piti buxu janu adubaini detenameaibu uinun ika kushikain ja mapubaunabu anu jikixun jawen betsabuki nukuxun yukakin: “Man jaskadamen, nukun epa en yui kaidan”, iki 23 jawen betsabube David janchai jenediamaken Filisteo nawa mapuabu anua mentsisipa jawen mae Gatdan, Goliat ana taxnikidan ana Israelbu mesewakin jau tsuada jabe detenameyunun jabias jancha jatu yuikubainai ana jatu jancha wai Davidin ninkaya
24 Israelin enabun ja Goliat uin jawen taea datei paxanun ika chixtekidi jukidan 25 yuinameakeakekin:
—¿Ja juni keyatapa taxnikidanaidan, man uiain? Jau jabe nun detenamenun nuku kaxe wakin nuku bika waikiki. Tsuanda maemakin tenanken nukun xanen ibujaidatun mabu ichapa inankin jawen ainbu bake ainwanmatan chipu jawenabus impuesto pei ana yukama ikunkainxanikiaki— ikea iakeabu 26 ninkatan jadi mapuabu Davidin jatu yukakin:
—Ja Filisteo nawan matu kaxe wakubainai tsuada jabe detenamekin tenankin yamawakenan, ¿ja juni detenamenika Saúlun jawa inanxanai yuishinamen? Dios jiweatun detenamenikabu kaxe wakin bika tenemakubainai tsua ikimenkain, jawa Dios ikunwanmadan— ikaya
27 Goliat tsuanda tenainwen taexun jawada Saúlun ja inanxanai ana jabias jancha dama yuixu jabun David yuiabu 28 jakia jaska yuiaibu jawen betsa iyua Eliabin ninkatan jaskakidi David yuiaibu ninkatan jawen betsa jaki sinatakin David yuikin:
—¿Jaskai min nenu juamen? ¿Janu tsua jiweabuma anu nukun epan chaxuwan ichapama tsuan mekexunyunun min yunubidanshinamen? Nun jatube detenameai besti uintanun ika min jua min datemanikapai jaska chakabu shinain en ninkaii— aka
29 kemakin Davidin yukakin yuikin:
—¿En jawa jancha chakabuwaiwen taexun min ea ja akai, damajaidabin en janchai?— itan
30 jawen betsa dapaxkabaini kaxun juni betsa yukakin:
—Ja Filisteo nawabe detenamekin maemakenan, Saúlunan, jawa inanxanikiaki— aka jabias betsabun yuikanxu jabiaskadi David banabimakin yuidia 31 David yuka ikai betsabun ninkabaini kaxun Saúl yuiabu ninkatan jau David iwenunbun jatu yunua 32 David kaxun Saúl yuikin:
—Ja Filisteo nawawen datei jau punu nukayamanunbunwen. Eadan, en min dayaduwen taea en jabe detenamei kaii— aka
33 kemakin Saúlun David yuikin:
—Miadan, min bedunanki. Ja Filisteo nawa keyatapabe detenamei min mesti min katidumaki. Jakia ja ikidan, bedunan detenamekunkaunmis beya juni ewaki— aka
34 Davidin yuikin:
—Eki chiti iwe. Eadan, en min dayadu en epan chaxuwan en mekexunkubainai león june juxun chaxuwan achixun tukunbainai 35 jawaida chibanbain kusha kusha akin chaxuwan tukuan en xetakax akubainmiski. En jaska wa eadi pinun ika ea shinanbidani juai jawen daniwen tsumabain en mestentiwen kusha kusha akin en tenanmiski, dateamadan. Oso dikabi juxun yumetsukainai en jabiaskadi wamiski. 36 ¿Jaskakin león inun oso detekin en amis keska ja juni Filisteo nawa Diosuma en jabiaskadi watidumamen? ja Dios jiweatun detenamenikabu jatu mesewakubainaidan. 37 Inu betsa león inun oson ea mesewai Jehován ea jatu binumakubainmis keska wakin ja juni Filisteo nawa keyatapatun ea mesewabiaya Jehován ea medabewadiatiduki— aka
ninkatan Saúlun David yuikin:
—Jaskakenan, katanwen, Jehová mibe kaxun mia medabewaikikidan— atan
38 januxun Saúlun jaya detenamemis tadi jau David sawemanunbun jatu yunua David mane tadi sawemakin jau jawen buxka junenun mane maiti maimatan jawen yuda junekin mane tadi jawen xuchi anu inun jawen pechiudi junekin sawemabu 39 jawen deteti chaipa kenujaida ibubis bitan Davidin usuntan jaska sawekin beyawaisma xankamaken kapaikin danantan Davidin Saúl yuikin:
—En jaska beyamawen taea jaska sawetan en kushikaintidumaki— itan Saúlun mane tadi pekaxuntan 40 jawen bamati ji besti tsumabaini kakin paxku namakia 5 mishki tunkupabu katuxun jawen kapankanki nanetan mishki jaki nanetan putati tsumabaini Goliatki kemai kaya 41 jawen medabewanika bebuxunkidanaya janua Goliat unanxubida jachun jukin 42-44 unudia David uinkin juni bedunan jawen yuda jawenduajaida inun jawen bedu jawenduadi jaskabe detenametima Filisteo nawan David yuikin:
—Eadan, en kaman dabanen ¿min ji mestentiwen min ea kushanun ika juai?— akin jawen yushibun kenawen David yuputan: —Jaskakenan, nedi juwe, min namidan, peiyabu inun piananbu en mia jatu inainan— aka
45 januxun Davidin kemakin yuikin:
—Miadan, jashi dabe inun machatu chaipa kenujaidayatun ea detenun ika min juaii. Jakia eanan, Israelin enabu min jatu mesewakin datekubainaiwen taea jatun mekenika Dios Jehová dasibi kushipa binuatun kenawen taea mibe detenamenun ika eadi en juaii. 46 Jaskawen taexun Jehován ea medabewa en mia maemaya ikis mia detekin tenantan min buxka en mia texteaii. Ja dikabi man Filisteo detenamenikabu en matu tenan matun nami peiyabu inun piananbu en matu inaiin. En matu jaska waya mai jidabi anu jiwebaunabun Israelin enabun mekenika Dios kushipajaida jaya unanxankanikiki.
47 Na nenu nun detenamei ichabudan, nukubudan, jawa machatu chaipa kenujaida inun jashiwen Jehován nuku detenamemakin jiwemama dasibibun man unaiin. Na detenamei nun juadan, Jehovánaki. Jaskaken Jehován matube detenamemakin nuku matu maemamaikiki— aka
48 Jaska wa Goliat ninkai benitan Davidkidi jui kemakunkidanaya jabiatiandi David jawaida jadi kushikain ja bebun nitan 49 jawen meken mistubain jawen kapankan anua mishki tunkupa bixun putatiki nanetan bekun bekun akin mishki tunkuwen Goliat betunku anu tsakakin bepesa ja mishki jawen betunkuki usuan jaska wa mawai besuudi tin iki main di ikaya
50 jaska wakin Davidin Filisteo nawa maemanikiaki, jawen bekun bekun akin putatiwen inun mishki tunkuwen besti Filisteo nawa keyatapa tenantan jawa machatu chaipa kenujaida buama ikawen taea 51 kushikain jawen yuda dapi kaxun Goliatin machatu chaipa kenujaida jaya sitan ibubis jawen buxka textekin tenanyan ja bestitun detename unain jaki chiti ikabu ma tenan mea Filisteo nawabun uintan datei paxai kushibainaibun 52 Israelin enabu inun Judán enabun jatu uintan jatu detenun ika jui kushipawen sai sai ibainkin jatu chibanbainkin jatun detetiyaxun Filisteo nawabu maewan dabe Gat inun Ecrón mishki kenebaunibu anu jatu jenetan Saaraim bai kawen inun Gat bai kawen Ecrón anu bai ka namaki Filisteo nawabu midima debua mania uinkubidani
53 jatu chibankubaintani ana chintunbidan Filisteo nawabun jatun tadi jiwe puntebaunshinabu anu jikitan jatun mabu biankin tsispu keyuaibun 54 januxun Goliatin buxka textebain Davidin bitan chipu Jerusalén anu bunikiaki. Jakia Goliatin jaya detenamemis mabu Davidin buxun jawen tadi jiwe anu adunikiaki.
55 Davidin Filisteo nawa Goliat detei kai uinkin Saúlun bebunkidi jawen detenamenika xanen ibu Abner yukakin:
—Abneriin, ¿tsuan juni bake ikimenkain, ja bedunanan?— aka
kemakin:
—Xanen ibuun, Diosun nuku uianyan eandi en unanmaki— aka
56 jawen xanen ibun Abner yunukin:
—Jawen epa tsuamenkain, jatu yukatanwen— aka
57 ma tapinken januxun Filisteo nawa Goliat detekin tenantankin jawen buxka beaiki nukuxun Abner metsunbain Saúl anu iyua 58 Davidkidi dasibi ma jakimashina Saúlun David yukakin:
—Bedunaan, ¿tsuamen, min epadan?— aka
Davidin kemakin yuikin:
—Eadan, Belén anua min tsuma Jesénen en bakeki— aka