—¿Saúlwen taeadan, jatian jawen nui kaxakunkaini min jakimaxanai? Israelin enabu Saúl jatu xanen ibuxunkunkainai ana jaskai en bechipaiamaki, min jaska shinainan. Menan benikain ja piti xeni min chaxuwan maxun bishtuki mata watan Belén anu juni betsa Jesé jiwea anua jawen juni bake betsa jau ja Israelin enabu xanen ibuxunkunkainxanun en ma katushinawen taea jadi katanwen— aka

2 Samuelin kemakin yuikin:

—¿Jaskakain en mia axuntidumen? Min ea jaska yunua xanen ibu bena katui en kaya Saúlun tapintan ea tenanxanikiki— aka

kemakin Jehován yuikin:

—Belén anu ina awa bake babupa buxun: “Jehová kenwantanun ika matu anu en juaii”, iwanan, jatu yuitanxanwen. 3 Ina awa bake tesenxun jawen xeni menukin keyuxun pichantan Dios kenwankin jawen nami en mibetan piyuaii, iwanan, Jesé kenaxanwen. Min jadixun jaska wai kai en mia yuixanaii. Ja xanen ibuxanai Jesén bake betsa jadatuda en mia yuikin yunua katukin xanen ibu kushipa medibi wakin xeni maxu axanwen— aka

4 jaska Jehován yunua Samuelin abaini kai Belén anu jikiaya ja mae anua anibu unanepabu kainbidan dateyabi ikin Samuel yukakin:

—¿Unanumawen taea min juai?— akeakeabu

5 kemakin Samuelin jatu yuikin:

—Jaa. Unanumawen taea en juaii. Jehová kenwankin na ina awa bake babupan xeni menukin keyutan jawen kenwanti nami matubetan pinun ika en juxuki. Matunmebi dachuki petan jawen kenwanti nami ebetan pikanwen— jatu watan

Jehován Jesé inun jawen juni bakebu jau ja medibi pepa wanun Samuelin Jehová jatu yukaxuntan ina awa xeni menukin keyuxun jawen kenwanti nami jua jabetan pinun, iwanan, Jesé inun jawen juni bakebu kenakin Samuelin juni betsa yunua 6 jatu yuia bei jikiaibun Jesén juni bake iyua Eliab Samuelin uinkin: “Chanima jaki, Jehován ma katushinadan, jau Israelin enabu xanen ibukunkainxanunan”, ikin shinanyan

7 jakia Jehován Samuelin shinan uinkin yuikin: “Jaskamaki. Jawen yuda jawendua keyatapa xua uinyamawe, en ma danainan. Junibun bemakis jatu uinmisbu keska wakin miandi bemakis uinyamawe. Jakia ean uinkinan, jatun juinti medan pe besti shinainbu en unanti wamiski”, aka

8 januxun jawen juni bake betsa Abinadab kenaxun Jesén Samuel uinma jakia Samuelin yuikin: “Jehován ja katuamadiki”, aka 9 januxun jawen juni bake Samá kenaxun Jesén Samuel uinma jakia Samuelin ana yuikin: “Jadi Jehován katuamadiki”, aka

10 Jesén jawen 7 juni bakebu uinmakin keyua Samuelin yuikin: “Na jatibudan, Jehován tsua katuamaki”, iwanan 11 jawen jenekin ana yukakin:

—¿Jatismen, min juni bakebudan? ¿Ana betsa jayamamen?— aka kemakin Jesén yuikin:

—Chaxuwan jatun mekea maxkujaida besti nenu jayamaki— aka Samuelin Jesé yuikin:

—Jau benatanunbun jawaida jatu yunuwe. Janua ja juaya Jehová kenwankin benimai nun taewatiduki— akaya

12 Jesén jatu yunua buxun itanabu jawaidakidani ja bedunan jawen bake maxku jikiaya jawen yuda jawenduajaida inun jawen bedu jawenduadi Samuelin uianyan januxun Jehován Samuel yuikin:

—Ja niadan, jaki. Jau Israelin enabu xanen ibujaidaxanun benitan piti xeni maxu adiwe, katukinan— aka

13 jaska wa Samuelin ninkatan xeni bua jawen kapankankia bitan jawen epa Jesé inun jawen betsabun uiainbun bedunan jawen kena David piti xeniwen Samuelin maxu akin jau Israelin enabun xanen ibukunkainxanun katuaya jabiatiandi Jehován Yushinin David kushipa wakin taewaya jawa ana manai niti ikama jatu yuibaini Ramá anu jawen jiwe anu Samuel chintunkainikiaki.

14 Januxun Jehován yushinin Saúl jenebainken jakia jau bika tenemakubainxanun yushin chakabu Jehován yunua jaki jikishina Saúl ana shinan pewamamakin bika tenemaya 15 jawen tsumabun Saúl yuikin:

—Xanen ibuun, Jehován ma yunua yushin chakabun mia bika tenemaikiki, min unainmenkainan. 16 Mia jaska waya tsuanda arpa mawa unanjaidai jau mia benaxuntanunbun min tsumabu nuku yunuwe, nun benai kaidan. Yushin chakabun mia bika tenemai arpa mawanikatun mia mawaxunaya min pekunkainxanaii, ja min bika teneaidan— akeakeabu

17 jawen tsuamabu kemakin Saúlun jatu yuikin:

—Peki. Juni betsan arpa mawa unanjaidai ea benaxunbauntankanwen. Bechitan ea iwexuntankanwen— jatu wa 18 jawen tsuma betsan Saúl yuikin:

—Belén anuxun Jesén juni bake maxku David jawenduatun arpa mawa unanjaidai inun ja dikabi kushipakain detenamea unain inun pe shinain janchai pemis en uinmaki, Jehován jaskai medabewakubainaidan— aka

19 januxun jau yuixuntanunbun Saúlun jawen tsumabu Jesé anu jatu yunukin: “Belén anu buxun Jesé ea yuixunkin: ‘Min juni bake Davidin chaxuwan mekenika ea nichinxunwen’, akin Jesé ea yuixuntankanwen”, akin jatu yunua

20 buxun Saúlun jancha Jesé yuiabu ninkatan jawen bake nichinxunkin jau jaya iyutanunbun asno kamaki misi saku mata inun bichi bishtu vino mata nanexuntan janua cabra bake asnoki duntanxun Saúl anu jaya yunua 21 kai jikixun Davidin Saúl yuikin: “Ea Jesén bake mianu ma en juxuki, mia dayaxunidan. Janua en epan na piti inankuin mia yunushinaki”, aka januxun Saúlun jawen medabewanika wakin David bechipaijaidakin katushinxun 22 januxun Saúlun jawen jancha ana Jesé bumakin: “Mia ea akin min bake David min ea nichinxunshina en bechipaijaidaiwen taexun ea jenexunwen, jau ea anu ikunkainxanunan”, akin jawen jancha bumanikiaki. 23 Januxun jaska washinken yushin chakabu Diosun yunua Saúl bika tenemakin ana taewaya Davidin arpa mimawa pewaxunaya Saúl anua yushin chakabu taxnikainaya Saúlun ana pe shinanpaunikiaki, bexteketan petun besuidan.