—Diosun enabu Israelbu min jatun xanen ibunun en mia katuima Jehován eska mia yuikiki. Ninkawe. 2 Jehová kushipa dasibi binua eska janchashinaki: “Egipto anua Israelin enabu bekin Amalec nawabun maiwan pakea kapukebainpananbun jatu nemakin niti aniwen taexun natian en jatu kupikatsis ikaii. 3 Na jabiatian Amalec nawabu anu buxun jatu detekin keyutankanwen. Jatuwen jawa nuiama dasibi jatu yamawakin keyutankanwen. Junibu inun, ainbuaibu inun, bake mishtinbu inun, dama kainshinabu jatu tenan keyukin januxun jatun ina awa inun, jatun chaxuwan inun, jatun camello inun, jatun asno jatun mabu dasibiyabi yamawakin keyutankanwen”, akin Jehován ea yuikin mikidi jaska janchashinaki— aka

4 januxun Saúlun jaska ninkatan jawenabu Israelin enabu kenakin ichawatan jawen detenamenika main bumisbu mae betsa Telaím anuxun jatu tanakin 200,000 junibu tanatan januxun Judán enabu 10,000 junibu tanakin keyudiatan 5 jatu jaska wabainkin iyui Amalec nawabun xanen ibu jatun mae ewapa anu jiweabuki kematan mishkiwen kenebaunibuwen taea napanpa tepakuanu mapubaunxun 6 Moisin ainen enabu Quenita nawabu Amalec nawabube jusia jiweabuwen taexun jui kushipawen Saúlun jatu yuikin:

—Quenita nawabuun, taxnibidani nedi dasibi kain bekanwen. Amalec nawabube nun matu detekatsi ikamaki. Matubunan, Egipto anua nukun xenipabu Israelin enabu beaibu matun xenipabun jatu duawanibukiaki. Menan jawaida ea ninkabidani bekanwen— jatu wa jawen jancha ninkatan

Quenita nawabu Amalec nawabu anua kainbaini paxaibun 7 jaskabidanaibun jawen detenamenikabubetan Saúlun Amalec nawabu jatu dete taewakin Havilá anuxun jatu chibanbainkin Egipto maiwan pakea kexa anu mae betsa Surkidi jiki buaibu jatu detekin keyutan 8 januxun Amalec nawa xanen ibu Agag achixun jawenabu detenamenikabu besti dasibi jatu detekin maematan 9 jakia Saúl inun jawen detenamenikabun Agag achixun mekeyutan januxun jatun chaxuwan bene inun, yuxan pepabu inun, ina awa bene inun, yuxan xua detekin tenanma jakia jatun mabu pepa kadu betsa meketan januxun jatun mabu pepa bexmas inun jatun mabu atimapa shadabu besti deda deda akin chakabuwakin keyuabun

10 januxun Samuel Jehován jancha wakin:

11 —Pe dabanen Saúl en xanen ibu wani en yunua ea akin pewaxunama natian ma ea jeneawen taexun en ma jeneaki— aka jaskakidi Samuel shinanma bika tenekin jau putayamanun meshu chai tanakin Samuelin Jehová Saúlkidi yukaxunshini 12 penamajaida Saúlki nukutanun ika Samuel kaya tsuanda yuikin: “Saúl Carmel anu kaikiki. Jadixun Amalec nawa detekin keyushinxun jawen unanmati mishki keyatapa benikin jatu nichinmatan janua bai betsa kawen Guilgalkidi butukainikiki”, aka 13 Guilgal baiwen Samuel kai jadi Saúlki nukua benimakin Saúlun yuikin:

—Jehován jau mia pepawakubainunwen. Jaska Jehován ea yunushinadan, ma en menexunshinaki— abia

14 januxun Samuelin chitekin yukakin:

—Chaxuwan maan maan ikaibu inun ina awa maan maan ikaibu en ninkaidan, ¿jaskakin en jaska ninkai?— aka

15 Saúlun kemakin yuikin:

—Na inabu bekinan, Amalec nawabun maewan anua nun beaii. Min mekenika Dios Jehová kenwankin ja inabu menukin kuaxunxanun, iwanan, chaxuwan pepa inun ina awa xuadanwan nukunabun mekeshinabuki. Jakia dasibidan, nun yama washinaki— ikaya 16 ninkakatsi ikama nemakin Samuelin jawaida yuikin:

—Jaska ana yuiyamawe. Peswe. Eska Jehován meshu medan ea yuishinai mia yuinun ninkawe— aka

—En mia ninkai ea yuiwe— aka

17 Samuelin ana yuikin:

—Ibubis min jaska jayatiduma min shinanbiaya ninkamas Israelin enabu min jatu xanen ibujaidaxunun Jehován mia katuima ¿min shinanma ishianmen? 18 Eskaki, shinanwen. Jehován mia yunukin jawen nemati kushipawen ja Amalec nawa chakabubu mia detemakin jatun mabu min yama waxanun mia yunushinaki. 19 Jaska shinanma jawen jancha ninkama binumakin jatu detebiakin jatun mabu inun jatun inabu jenebainaibu ¿jaskakin min jatu bianbidanshinamen, Jehován bedubi chakabukidanidan?— aka

20 Saúlun kemakin yuikin:

—Jaska Jehován ea yunushina chibankin jawen yunuawen taexun en ma akin keyuxunshinaki. Amalec nawabu dasibi tenan keyutan januxun Amalec xanen ibu Agag neashinabu en iweshinaki. 21 Chanima Guilgal anuxun min mekenika Dios Jehová ja inankin januxun tenan keyukatsi inabu xua tesenxun menukin keyuxunti nukunabun jatu nawakin ibuwabidanshinabuki— aka

22 januxun Samuelin yuikin:

24 januxun Saúlun Samuel yuikin:

—Pemajaidaki. Chakabu wakin ma en kaneshinaki. Ean en pewai dabanen Jehován yunuti chibanma inun min ea yusinshina mestenwanma nukunabuki datekin jatun jancha dabankin ean jabu besti en ninkashinaki. 25 Jakia jaska en kaneshina menan ea jakimadiwe, jaska en mia yukaidan. Ea jaska watan en Jehová kenwain kai ebe chintunkainwen— aka

26 kemakin Samuelin yuikin:

—Min ma Jehován yunuti jancha dananshinawen taexun natian min Israelin enabun xanen ibubiaken Jehován mia danainwen taea ana en mibe jadi kamaki— atan

27 Samuel kai dabekekainaya ana niti anun ixun Saúlun Samuelin tadi chaipa kexawen tsumantan nininkin ushnian 28 jaska wan januxun Samuelin Saúl ana yuikin:

—Na en tadi min ea ushnixu keska wakin Israelin enabun min jatun xanen ibubiaken Jehován mia ma ushnia keska waikiki. Jaska keskadi wakin min xanen ibuai mia ma mebintan Israelin enabu betsa pepa mia binua Jehován katutan inanxanikiki. 29 Chanima Diosun jawen kushipawen Israelin enabu jatu duawakubainmis chani chakaisma inun jawen shinan betsa waismaki, juni betsa betsapabun jatun shinan betsa wamisbu keskamadan— aka

30 Saúlun Samuel ana yuikin:

—Chanima kanei en chakabushinaki. Jakia en mia yukakin ea akaii. Jau Israelin enabu inun jatun anibu unanepabun nun kai uinkin jau ea xanen ibuai eki meseyununbun jaskama ebe kaxun min Jehová Dios ea duawakin ea kenwanmayui kawe— aka

31 jawen jancha ninkatan Saúl Samuelbe chintunkaini kaxun danti iki beti itan jatun mekenika Jehová Dios kenwankin meneaya 32 Samuelin jatu yunukin:

—Amalec nawa xanen ibu ea bebun nichin bekanwen— jatu wa

januxun iweabu Samuel bebun nixun Agagin shinain: “Ma en chakabu binushinaki”, ikin shinain: “Ea ana tenankin deteabumamenkain”, ixun shinanbiaya 33 jakia Samuelin Agag yuikin:

—Min machatu chaipa kenujaidawen ainbuaibu ichapa min jatu bakeuma waniwen taea min ewa jatu keskadiai bakeumadi ikunkainxanikiki— akin Guilgal anuxun jawaida Jehováki nukuti tadi jiwe bebunxun Samuelin Agag dedakin tenankin bais bais akin keyutan 34 janua Samuel jawen jiwe Ramá anu kaya Saúldi jabe paxkakaini jawen mae Guibeá anu chintunkaini jawen jiwe anu ka jiweyuaya 35 jaska kainima Samuel mawadiama ana jaki nukuxun uianma inikiaki. Jehován shinain: “¿Jaskakin Saúl Israelin enabu en jatu xanen ibu waxunimen?” ikin shinan betsaiwen taea jaska waxun Samuel Jehován shinan betsawatidumawen taea Samuelin ana uianmabia jawen nuijaidai kaxakunkainikiaki.