—Ukedi paxku pukebain Filisteo nawabu detenamenikabu xuku betsa detenun kawe— aka jaska kainkin jawen epa Saúl banabimama 2 mati manan tenanmanxun januxun xekiwan trigo katamisbu anu ji betsa jawen kena granado naman manixun 600 junibubetan Saúlun manaya 3 Jehová yukanun ika Diosbe jawenabu janchaxunikatun tadi jawen kena efod Ahíasin bexuan inikiaki. Ahíasin epadan, Ahitub inikiaki, Icabodun betsadan. Janua Icabodun epadan, Finees inikiaki. Fineesin epa Elí inikiaki. Siló anuxun jawenabu Jehovábe jatu janchaxunikadi ikunkainikiaki, Elídan.

Jonatán taxnikainkin tsua yuiama ka tsuan jawa unanmaken 4 mati kubudu keyatapa dabe jawen kena Bosés inun Sene ja dabe namakis bai anu Filisteo nawabu detenamenikabu maniabu anu kemanun ika ka 5 mishki mati keyatapa betsa Micmás bebun nortekidi nia inun betsa Guibeá bebun surkidi nidiaken 6 januxun jawen medabewanika Jonatánen yuikin:

—Filisteo nawa detenamenikabu jawa nukun Dios unanbuma anu jatuki kemai ukedi kexa betsaudi kawananwen, Jehován nukuwen taexun nuku medabewatidumenkainan. Jehován jawen maemati kushipadan, jawa bikamaki. Juni ichapawen kasmai juni eskadabeswen Jehován nuku jatu maemamatiduki— aka

7 kemakin jawen tsumapan yuikin:

—Jaskakenan, jaska min shinain keska akubainwen. Jawada min shinain en mia chibankin axunkubaintiduki— aka

8 jaska yuia januxun Jonatánen kemakin yuikin:

—Uian, ukedi janu mapuabu anu kapukenanwen, jau shinanxun jabun nuku uinunbunan. 9 Jabun nuku uintan yuikin: “Manayukanwen, matu anu nun butuaidan”, nuku akabu nun jatu manaii, jatu anu mapekeamadan. 10 Jakia jabun ana nuku yuikin: “Nuku anu mapekekanwen”, nuku akaibuwen taexun Jehován nuku medabewaya nun jatu maematidu unantan jatu detenun ika samama nun jatu anu mapekekaintiduki— aka

11 jau shinanxun jatu uinunbun juneabu anua taxnibainaibu Filisteo nawabun jatu bechitan yuikin: “Uinkanwen. Janu ma juneshinabu mishki tanpe anua Hebreo nawabu ma taxnibidankanikiki”, iwanan 12 jui kushipawen Jonatán inun jawen tsuma sai akin yuikin:

—Detenameti matu yusinun nuku anu mapekekanwen— ikaibun

jawen tsuma Jonatánen yuikin:

—Jehován nuku medabewakin Israelin enabu jatu detexunkin maemaikiki. Echun jukin ea chibanbidanwen— aka

13 jani min mapeketiduma anu mapekei betankubaini Jonatán mapekeaya jawen tsumapandi chibandiabaini jabe mapeketan Jonatánen Filisteo nawabu detekin di atanai jawen tsumapan jatun namekin tenankubaunkin 14 jabu dukun tenan taewakin janu kexeabu anu mae jatiuma anuxun Jonatán inun jawen tsumapan 20 junibu jawaida jatu detekin tenanbu 15 jatu jaska wabaunaibu Filisteo nawabun unantan detenamenikabu jatun tadi jiwe puntebaunabu anu inun detenamenikabu xukuakeakea nanta kexebaunabu datebaunaibun januxun Jehován mai pacha sakumakin jawa shinantimawakin jatun shinan jatu benua Filisteo nawabu dasibi datejaidai bedukubaunaibun

16 Benjamínen enabun maewan Guibeá anuxun Saúlun jatu yunua jabu mapuxun uinbaunaibun Filisteo nawabu jadakidi katima datei kushibaunaibu uinkin Saúl yuiabu 17 jaska ninkatan jawen detenamenikabu jabe ichabu Saúlun jatu yuikin:

—Tsua nukunabu nenu jayamamenkain, jatu benabaunkanwen— jatu wa tanakin uinbaunkin Jonatán inun jawen tsuma jayama uintan Saúl yuiabu, 18 Israelin enabu detenamenikabu anu Diosbe jatu janchaxunikan tadi efod ma beshian Ahías Saúlun yunukin yuikin:

—Diosbe yubakani tadi efod nenu bewe— aka

19 Diosbe jatu janchaxunikabe Saúl janchaya Filisteo nawabu jatun tadi jiwe puntebaunabu anua datei jaskatima bis bis iki bedukua itimaskajaidakubaunaibu uinkin ninkatan Saúlun Ahías ana yuikin:

—Jaskamaki. Efod ana beyamawe— atan

20 jawen detenamenikabu Saúlun jatu ichawatan: “Jatu detenun bukanwen”, iwanan, jatu iyuaya jawa shinan betsawen jaskatima janubi Filisteo nawabu detenamebaunaibun 21 ja dikabi uatian Hebreo nawabu Filisteo nawabube dasia jiwenibu jabu dikabi beshianbu jabuan Filisteo nawabu jenebaun ma jatunabu Israelin enabu medabewakin Saúl inun Jonatánbe dasitan Filisteo nawabu jatu detekin jatu medabewanibukiaki. 22 Jatu deteabu Efraínen enabu maewan mati matipakidi Filisteo nawabu jadi paxaibu ninkatan jatu detenun ika taxnibidankin detekubainkin jatu chibanbainkin 23 Bet-avén anuxun jatu dete keyutan chintuntanibukiaki. Jaska wakin Jehován Israelin enabu medabewakin Filisteo nawabu jatu putamanikiaki.

24 Saúlun Israelin enabu jatu yubakin nemakin yuikin: “Badi kadiama eki sinataibu nun jatu dete keyudiama Filisteo nawabu chibanbainkin detekubainkin tsuan taska piyamayuxankanwen. Tsuanda ea ninkama bunikin man piadan, chakabujaidaxanikiki”, jaska jatu wabidanawen taea ja xabatian Israelin enabun jawa piti betsa metsabumajaidaken ma jin iki punu nukai babubiaxun 25-26 Filisteo nawabu chibain ji xukua anu jikibaun janu buna jawen bata ji anua chakajaidai unpax keska jabai mai anu pantu tsaua Israelin enabu detenamenikabun bechibiatan Saúlun jatu nemakin yupuawen taea datekin tsuan meamajaidaken 27 jakia jawen epan nemati jancha Jonatánen ninkama ikawen taexun jawen jashi debuwen buna bata pantu tsaua pukutan jawaida mebaini jawen shinan chankain benimakaini kaya 28 jawen detenamenika betsan uintan yuikin:

—Min epan nuku yubakin yuikin: “Tsuanda na jabiatian piti betsa piadan, Jehován jau chakabujaida wanunwen”, akin nuku yuibidanawen taea jaska ninkabidana nukunabube nun ma punu nukajaidabuki— aka

29 Jonatánen kemakin:

—En epan jatu nemakin nukunabu ichakawakin jatu yubawen taea man ma babuaki. Buna bata eskadabes mekin en pia en yuda en ma ana kushipaxuki. Uinwen. 30 Filisteo nawabun piti nun jatu putama buaibun ja nukunabun ja piti pikubaini jawen kushipatan nukunabun Filisteo nawa midima jatu detekin badis ma nun jatu dete keyuxu ikeanaii— aka

31 Israelin enabu punu nuka jin ibiakubainkin ja xabatian Micmás anua Filisteo nawabu detekin chibankubainkin jatu keyudiama Aialón anu jatu jenetan chintunbidankin 32 atimas Filisteo nawabun ma jatun inabu jenebainabu chaxuwan inun, ina awa inun, jatun ina awa bake bitan betsa tesenxun maiki mexte mexte axun jawen nami paxa jimiyabi piaibun 33 jakia jatidi buxun Saúl yuikin:

—Jehován jancha danankin chakabuwakin nami paxa jimiyabi pikanikiki— akabu

Saúlun kemakin jatu yuikin:

—Matunmebi man chiban pewaismaki, kanekin chakabuwaidan. Mishki ewapajaida tadanbidan nenu ea bexunkanwen. 34 Jaska watanxun jatun ina awa inun jatun chaxuwan bestibu tibitun jau nenu benunbun jatu yuikubauntankanwen. Nenu bexun tesenxun jawen jimi jabai keyuaya mexte mexte axun bawaxun pitidubuki, nami paxa jimiyabi pi chakabukin Jehová ana sinatamamadan— jatu wa jatu yuibaunabu jabias meshuki bestibu tibitun ibubis jatun ina awa bexun tesenxun jimi jabawakin keyutan bawaxun pikin keyuabun 35 januxun ja dukun tates taewabainkin Saúlun ibubis jawen kenwanti chi tapu Jehová axunkin taewanikiaki.

36 Jaska jatu pewatan Saúlun jatu yuikin:

—Ikis na meshu medan butubain Filisteo nawabu ana jatu bedutan detekubainkin penadiama tsua betsa taska texe wakin jiwemayamaxankanwen— jatu wa

dasibibun yuikin:

—Jaska min shinain keska akubainwen— akeakeabu jakia jawenabu Diosbe jatu janchaxunika Ahíasin Saúl yuikin:

—Jawada nun akatsis ikai adiama Jehová yukakin taewananwen— aka

37 jawen jancha ninkatan Saúlun Dios yukakin:

—¿Ana Filisteo nawabu jatu chibankubainpa? ¿Israelin enabu min jatu nuku yunukin maemamatidumen?— aka

jabias meshu medan Jehová jawa kemama pes dakaken 38 jaskakin Jehován jawa yuiama tapinkatsi ikin Saúlun jawenabu yuikin:

—Detenamenika xanen ibu dasibibube nenu bekanwan, tsuan na jabiatian chakabuwakin man kanexumenkain, nun tapinunan. 39 Israelin enabu mekenika Jehován ea ninkaya en matu yubaii, tsuanda Jehová sinatamakin kanebidanamenkain, jau mawanunwen. En bake Jonatánen chakabuwakin kanebidanadan, jabiadi jau mawanunwen— ikaya xanen ibubu detenamenikabun jawa yuiabumaken 40 Israelin enabu dasibi Saúlun ana jatu yuikin:

—Paxkatan mapu bukunankanwen. Ukedi matu dasibi ikanwen, nekedi en bake Jonatán inun ea nun niaidan— jatu wa

dasibibun kemakin yuikin:

—Jaska min nuku akatsis ikai keska awe— akabu

41 jancha kushipawen Saúlun Jehová yuikin:

—Israelin mekenika Dios Jehováan, min dayadun mia yukabia ¿jaskakin min ea jawa kemamamen? En kaneamenkain, en bake Jonatánen kaneamenkain, jawen unanti Urim jau jaki taxninunwen. Jakia Israelin enabu minabudan, jabun kaneamenkain, jawen unanti Tumim jau janu taxninunwen— akaya

Jonatán inun Saúl anu unanti watan Urim bia kaianyan jawen jatu unanti waya Israelin enabu kaneabuma jatuki pe kaianyan

42 jaskaya Saúlun ana jatu yunukin:

—En bake Jonatánmenkain, en eamenkain, nuku unankin jawen unanti ana nuku anu kainmawe— aka

unanti wati bia Jonatán jatu unanmai jaki taxniaya 43 jaskaya Saúlun Jonatán yunukin:

—Jawada min kanebidana xabakabi ea yuiwe— aka

Jonatánen xabakai chanikin:

—Chanimaki. Buna bata bechitan en jashi jawen debuwen besti pukutan eskadabes en me bestibidanshinaki. En jaska wabidanshinawen taeadan, dateama en mawatiduki— aka

44 jancha kushipawen Saúlun yuikin:

—Jonatáan, en jaska jancha yuibainawen taexunan, min mawamakenan, bikajaidawen Diosun jau ea kupixanunwen— akaya

45 jakia jaska wai jawenabun ninkatan Saúl kemakin:

—¿Jaskatan e iskaun Jonatán mawatidumen? Jonatánen jawenabu Israelin enabu Filisteo nawabu dasibi nuku maemamaxunkin keyuxunbidanawen taea mawatidumaki. Jaska Jonatánen abidanadan, Diosun medabewaya Jonatánen abidanawen taea Jehová jiwekunkainaya Jonatán mawai jau tin iyamanunwen, jawen bu dikabi betsa teseamadan— akin Jonatán jau mawayamanun jaska yuikin Saúl nemanibukiaki. 46 Jaskaken jatun maiwan pakea anu Filisteo nawabu chintunbainaibun Saúlun ibubis shinantan ana jatu chibanma jatu jenetanikiaki.

47 Jatu jaska watan tsuan ana nematidubuma Israelin enabu dasibi yunukubainkin Saúl xanen ibujaidakin nawabu jiwebaunabu jaki sinataibu jatu nemakin maemakubainikiaki. Moab nawabu inun, Amón nawabu inun, Edom nawabu inun, mae betsa Sobá anua xanen ibubu inun, Filisteo nawabudan, janida jatun mae anu kakin jatu maemakubainpaunikiaki. 48 Saúlun jawen detenamenikabu jatu ichawatan iyuxun Amalec nawabu maemakin keyunibukiaki, nawa tibi dasibidan, Israelin enabu yumetsubidanbidanmisbu jatu nemaxunkin keyukubainkinan.

49 Jati Saúlun bakebu inibukiaki, jawen juni bakebudan, Jonatán inun Isví inun Malquisúadan. Janua jawen ainbu bake dabedan, iyua Merab inun maxku Mical inibukiaki. 50 Saúlun ainin kenadan, Ahinóam inikiaki. Ahinóamnen epadan, Ahimaas inikiaki. Janua Saúlun detenamenikabun xanen ibudan, Abner inikiaki. Jawen epadan, Ner inikiaki, Saúlun epa betsadan. 51 Abielin bake dabedan, Ner inun Quis inibukiaki. Quisdan, Saúlun epa inikiaki.

52 Saúl janua xanen ibuima jiwekunkainkin Filisteo nawabube detenamei jeneama mesebiaken Saúlun juni kushipabu katutan jau jabetan Filisteo nawabu detenunbun jatu ichawakubainikiaki.