Filisteo nawabube Israelin enabu ana detenamenibukiaki, na janchadan
13
Saúl juni ewakainkin Israelin enabu yunukin taewai xanen ibuima año ichapa kadiama 2 detenamenika jau ikubainxanunbun Israelin enabu 3,000 juni detenamenikabu katuken Betel manan mati matipa anu mae betsa Micmás anu 2,000 detenamenikabu jabe bashikuabu janua 1,000 detenamenikabu jawen juni bake iyua Jonatánbe jawen epa Saúlun yunua Benjamínen enabun maiwan pakea Guibeá anu jadi jatu binukin kexemai kaken janua jatidi yudabu texeabu jau jatun jiwetan bununbun Saúlun jatu yunua buabun 3 Filisteo nawa detenamenikabu Guibeá anu kexeabu Jonatánen jawen detenamenikabubetan jatu detekin Guibeá anua jatu nichinkin keyua jatu jaska wa jatun maewan anuxun Filisteo nawa xanen ibubun ninkatan unainbun januxun Hebreo nawabun jau ninka keyubaununbun Israelin enabu maiwan pakea tibi anuxun jau chaxuwan maxun chan chan akubaununbun Saúlun jatu yunua4 jatu banabimabaunkin:
—Filisteo nawa detenamenikabu Saúlun jatu detekin keyushinawen taea Filisteo nawa dasibibu Israelin enabuki sinatajaidaibun Guilgal anu dasibibu Saúl anu ma ichakanikiki— jatu wabu ma ninkakin keyuabun 5 Filisteo nawabu Israelin enabube jatubedi detenamedianun ixun jawenabu 30,000 detenamenikabu caballo tadantiki mapuabu inun, 6,000 detenamenikabu caballoki katsaumeabu inun, detenamenikabu main bunikabu ianenwan kexa anu mashi keska tsuan jati jatu tanatiduma jatu yunukin Filisteo nawa xanen ibubun jatu ichawabu jati jayabu Micmás anu mapekebaini jikixun mae betsa badi juaikidi Bet-avén anuxun jatun tadi jiwe puntebaunabun
6 Israelin enabun jatu uian mesejaida dakaken uin datei paxai junenun ika mishki tanpe anu inun, mai kini xantu anu inun, maxax mananan inun, mai xantu kedu anu inun, chacha unpax anu junei iduabun, 7 jatidi ichapa paxai Jene Jordán pukebaini bui maiwan pakea Gad inun maiwan pakea betsa Galaad anu iduabun jakia Guilgal anu Saúl bashikua jawen detenamenikabu jabe bashikua datejaidai saki saki iki keyuaibun 8 jaska Samuelin yubakin janu yuishina 7 día Saúlun manabia jakia Samuel judiamaken junibu bestibu tibi inun bui taewaibun 9 januxun Saúlun yunukin jatu yuikin:
—Inabu ea bexundikanwen. Jawen xeni menu keyuxun jawen daewati nami nun pinunbunan— jatu wa bexuanbu tesenxun jawen xeni dashpexun inanbu Saúlun ibubis jawen xeni menu 10 keyuaya Samuel jui jikiaya ikin jaki nukui kaxun Saúlun pe jancha wabia 11 Samuelin jawaida yuikin:
—¿Jaskakin min jaska waxumen?— aka
kemakin Saúlun yuikin:
—Juni bestibu tibi inun bui taewaibun en uian jaska min ea yubakin yuishina ma binuaya min judiama Micmás anu Filisteo nawabu midima ichai keyuaibun 12 Jehová ea akin medabe en yukadiama nenu Guilgal anuxun ea dukun Filisteo nawabun ea detetidubu shinankin jani jaskatima ibubis ina jawen xeni Jehová en menukin keyuxunxuki— aka
13 Samuelin Saúl kemakin:
—Na jaska min axudan, min atimapajaidaxuki. Jaska Jehován mia yunuima min kaneama ixudan, min Israelin enabu xanen ibu niti ikama ikunkainkeanaii. 14 Jakia min xanen ibui taebiaimaken minabudi ikubainama ixanikiki. Jaskawen taexun juni betsa pepa jaska bechipaiai keska axuntidu Jehován ana katuxanikiki, Israelin enabu xanen ibu betsa mistukinan— abaini
15 janida kai Guilgal anua Samuel kainkaini kaya, detenamekatsi pewatan detenamenikabun Saúl chibain Guilgal anua kainbaini bui Benjamínen enabun maewan Guibeá anu jikiabun januxun jawen detenamenikabu jabe bekin chibanbu Saúlun jatu tanabaunkin 600 junibu uianyan 16 Saúl inun jawen juni bake iyua Jonatán inun jatube beabu Guibeá anu niti ixun manayuaibun Filisteo nawabu Micmás anu jatun tadi jiwe puntebauna maniabun 17 jakia 3 detenamenika xuku jaya jabu tibi paxkabaini betsa maiwan pakea Sual anu mae betsa Ofrákidi butanunbun 18 janua xuku betsa Bet-horónkidi butanunbun janua xuku betsa janu tsua jiweabuma anu kexa Seboím paxku napanpakidi bui januxun uinbauntidubu anu mananan jikiabun,
19 machatu chaipa kenujaida inun jashi Israelin enabu, Hebreobudan, jau detenameti dami wayamanunbun Filisteo nawabun jatu nemamisbuwen taea Israelin enabu maiwan pakea jidabi anu acero mane kenuti mabu wanika tsua jayabumaken, 20 jatun kenu mabu dayati shadabu kenunun, iwanan, Filisteo nawabun januxun acero mabu wamis inun januxun kenumis anu jatun dayati mabu jau bununbunwen, 21 mai pukinti betsa betsapa kenuxun pei jexe dabe jatu yuka pakamamisbu inun, due inun chachiti kenukin pei jexe bestichai jatu yukakin pakamamis ipaunibukiaki. 22 Jaskawen taea jabun Saúl inun jawen bake Jonatán chibanbu jabu jawa deteti kenu jayabumaken Saúl inun Jonatán besti machatu chaipa kenujaida inun jashi jayabuken 23 Filisteo nawabu kushibain Micmás anu mati dabe namakis napaku anu janu bai kati anu tsuan jatu nemama jikiabun