—Dasibi man ea yukai ninkaimaxun matu medabewakin xanen ibujaida kushipa en ma matu katuxunshinaki, na man uiainan. 2 Matu jatun yunukubainxanun yununika xanen ibu kushipajaida man ma jayaki. Jamen eadan, en ma matu anibuxuanki, en bu siun siunpaidan. Jakia en bakebu ma juni ewabu matube jiwekanikiki. Bedunantun en matu yunutiani na jabiatian matu bebun nixun en ma matu jeneaii. 3 Na jabiatian en nenuki. Jaskada en matu akubidanshinamenkain, ea yuikanwen. Tsuan ina awa kasmai asno en biainmamenkain, bika tenemakin tsua en ichakawaimamenkain, jawa chakabu jau jatu unanyamanun june jatun pei en biainmamenkain, Jehová bebun inun matun xanen ibujaida Jehován katuima bebun en tsuada jaska waimadan, xabakabi ea yuikanwen, man juni betsa en jaska waima en dibiadan, jawada pepawen en matu pakaidan— jatu waya

4 jabun kemakin yuikin:

—Bika tenemakin ichakawakin min shinan betsa wanun, iwanan, pei mia inainbu bikubidankin min nuku jaska waismaki— akabu

5 Samuelin ana jatu yuikin:

—Jaskakenan, ekidi chakabu man bechiamadan, Jehová inun matun yununika xanen ibujaida Jehován katuimatun jabias unankanikiki, chakabuwakin en jawa kaneismadan— jatu wa jabun kemakin:

—Jaa, chanimaki— akeakeaibun

6 Samuelin ana jatu yuikin:

—Moisés inun Aarón Jehován jatu kushipa watan jatu medabewakin Egipto anua Jehován matun xenipabu jatu taxnimabidaniki. 7 Jaskawen taexun matun shinan pewakin ea ninkajaidakubainkanwen. Jehován nuku ninkaya jaska wakin matun xenipabu inun matudi Jehován duawakubidanmiskidi yuikin en matu xabakabi waxunai ea ninkakanwen. 8 Jacob inun jawen bakebu inun jawen bababu Egipto anu jikiabu chipu jatu ichakawakubainaibun jau jatu medabewanun matun xenipabu kaxakin yukaibu Jehován Moisés inun Aarón jatu anu yununikiaki. Egipto anua ja dabetun matun xenipabu iwekubidankin na mai anu matun xenipabu jatu jiwemanibuki. 9 Jakia Jehová jatun mekenika Dios matun xenipabun jakimanibuwen taexun jatu kupikin Hasor anu Jabín xanen ibun detenamenikabu xanen ibu Sísara Jehován yunukin, Filisteo nawabudi yunukin, Moab nawa xanen ibubudi yunukubainaya matun xenipabuki sinatakin jatu detekubainaibun 10 jakia chipu juinti nishmaxun jaska ma kaneshina Jehová yuikin: “Mia danankin mia jenebain yushibu Baal inun Astarté kenwankubidani nun chakabujaidaimaki. Nukuki sinataibu nuku nemaxunwen, jau nuku ana yunuyamanunbunan. Min nuku jaska waxuna mia besti duawakatsis ikin nun mia yubaii”, akabu

11 Man unanuma jiwekatsis ikaiwen taexun Jehován matu ninkatan matuki sinatakin matu ichakawaibu jau jabun matu nemaxunkubainunbun Gedeón Jerubaal inun, Barac inun, Jefté inun, ea Samuel Jehován nuku yunuakeakekubainshinaki. 12 Jakia matun mekenika Dios Jehová matun xanen ibu kayabibiaken Amón nawabu xanen ibu Nahasun matu detenun ika jawen detenamemisbu matu dapi iweaya uin jatuwen datekin jau jatun nuku yunukubainxanun yununika xanen ibu kushipajaida nuku katuxunwen, iwanan, man ea yukaimaki. 13 Jaska bechipaikin matun yununika xanen ibu man katuimadan, na ma nia. Jaska man ewen taexun man yuka Jehován ma matun xanen ibu katuxun yunushinaki. 14 Natian man ja chibantidubuki. Matu inun matun xanen ibu Saúlun Jehová kenwankin, jawen jui ninkakin, jawen yunuti inun jawen nemati jancha dananma jaska matun mekenika Dios Jehován shinain keska chibain unanuma matun yununika xanen ibube pe man jiwekubaintidubuki. 15 Jakia ninkabiakin jawen yunuti jancha inun jawen nemati jancha man danankin man chibanmadan, matu inun matun xanen ibujaida Jehován matu kupixanikiki, matun xenipabu kupini keska wakinan.

16 Eskatian jawen dateti dami ewapajaida Jehován matu uinmaikiki. Jabianu tukuama mapuxun uinyukanwen. 17 Ikis xekiwan trigo tsekamisbutian ui ismaki. ¿Chanimamen? Jakia na jabiatian en Jehová yukaiwen taexun uiyabi kana tun imakin Jehován ui yunuikiki, ikisdan. Xanen ibu kushipa betsa ea yukai man chakabujaidaimaki. Natian man tapinkin unantidubuki, Jehován matu uinmayadan— jatu watan

18 Samuelin Jehová yuka jawaida uiyabi kanatun imabainbainaya Jehován ui inun kana tun imabainbainaiwen taea Jehováki inun Samuelki dasibi datejaidakin 19 dasibibun Samuel yuikin:

—Chakabu jayajaidabia shinan chakakin ana nukun chakabu matsankin jamamaki nun yununika xanen ibu kushipajaida yuka ikima ja shinanma jau nun mawayamanun min Xanen Ibu Jehová ea akin nuku yukaxunwen, nun min tsumabudan— akeakeabu

20 Samuelin kemakin ana jatu yuikin:

—Dateyamakubainkanwen. Chanimaki. Man chakabujaidaimaki. Jakia ikis Jehová jeneama, matun shinan dasibiwen ja besti kenwankin ikunwankubainxankanwen. 21 Ana yushibu dami jawen padananainbu jiwea jayama chibankin kenwanyamakubainxankanwen. Jiwea jayabumawen taexun jatun matu mekekin medabewatidubumaki. 22 Jehován matu jawenabu waniwen taexun jawen kena pepawen shinan betsa wama matu jenebainamaki. 23 “Jehová en matu ana yukaxunamaki”, iki ea en chakabukatsi ikamaki. Jehová matu yukaxuni en jenekatsi ikamadiki. Jaskawen taexun bebunkidi pe jiwekainkin man kaneama ixanunbun en matu yusinkubidanaii. 24 Matuwen taexun jaska Jehován akubidanmis shinanjaidakubainkin datekin chanima kayabi Jehová besti kenwankubainxankanwen, shinan betsa wamadan. 25 Jakia Jehová jenekin man ana chakabuwakin taewaya matu inun matun xanen ibu bena kupikin Jehován matu matsukin akawaxanikiki— anikiaki.