—Nukube yubakawe, min dayadu nun ikunkainxanaidan— akabu 2 Amón nawa xanen ibu Nahasun jatu kemakin yuikin:

—Matube yubakakatsi ikidan, ja dukun matun bedu yusiudia matu tseka keyu bestitan janu en matube yubakatiduki. Israelin enabu dasibi en jatu ichakawa jaska mapuabu jatuki kaxeabu dakeaibu en uinkatsis ikaii— jatu wa

3 jaska jatu wa ninkatan Jabés anua anibu unanepabun kemadiakin yuikin:

—7 día nuku manayuwe. Min nuku manaya jau nuku medabewai benunbun Israelin enabu maiwan pakea tibi anu kaxun min jancha nun jatu ninkamayui kaidan. Nuku medabewai beabumaken jaska min nuku yuixu keska nun mia nemama min nuku ichakawatiduki— akabu jatun jancha Nahasun ninkatan:

—Peki— jatu wa

4 mae Guibeá janu Saúl jiwea anu jabun kaka bui jikixun janu jiweabu jatu banabimakin keyubaunabu, ninka keyutan dasibi datei kaxa chakayamaibun 5 Saúl jawen bai anu dayatani jawen ina awa dabe ji tekishkunyan dabeyabe jui yuka ikin:

—¿Nukunabu jaskaimenkain? ¿Jaskai kaxa chakayamakanimenkain?— jatu wa

Jabés anua junibu juxun jatu kaka yuikanxu jabias kaka Saúl banabimabu 6 Saúlun ninkatanaya jabiatiandi Diosun yushinin kushipa wakin Saúl achiaya Saúl sinata paepakaunkin 7 januxun machatu chaipa kenujaidawen ina awa dabe tesenxun ja dabe mexte mexte atan Israelin enabu maiwan pakea tibi anu nami mexte tibi jau jatu inankin eska jatu yuiakeakebauntanunbun jatu yunua buxun jatu yuikin: “Saúl inun Samuelbe man ichai beabuma tsuabunda man jatu chibanma na ina awa mexte nun matu bexunxu keska wakin Saúlun matun ina awa tenankin akawakin matu kupixanikiki”, akin jawen jancha bunikabun jatu yuikubaunabu ninkai datejaidai juni bestichai keskai dasibi janus bei Saúl inun Samuelki ichai keyuabu 8 ninkatan beabu Bézec anuxun Saúlun jatu tanakin Israelin enabu 300,000 junibu tanatan Israelin bake Judán enabu tadi jawenabu tanakin 30,000 junibu tanadiaxun 9 Jabés anuabun kaka bei chani beshianbu jatu yuikin:

—Meshukidi badi manananbitian nun matu medabewai kaxanaii. Buxun na jabias kaka nukunabu Jabés anua jatu yuidi bukanwen— jatu wa bui jikixun Jabés anu jiweabu jabias jancha jatu banabimabu ninkatan benimajaidatan 10 januxun Amón nawa xanen ibu Nahas anu buxun padankin yuikin:

—Meshukidi mia anu nun juxanaii. Nuku achitan jaska min nuku wakatsi ikai keska nuku axanwen— akabu ninkatan Nahasun jatu manaya

11 uxashinkin Saúlun jawen detenamenikabu jatu paxkakin 3 xuku watan june jatu iyukin meshu medan jawa janchai banama ma pena kemaya Amón nawabu bestendiabuma anu jatun tadi jiwe puntebaunabu anu jikibainkin jatu detetiyaxun jatu detekubainkin badi manananbi jatu keyuabu Amón nawabu jatidi paxai kushibaini besti dasiabu jawa juni dabe nia tsuan bechiamaken 12 chipu jawenabu betsa betsapabun Samuel yuikin:

—“Saúl nukun xanen ibujaida kushipa itidumaki”, jabu ikimabudan, ana jaska jakidi shinan chakatidubumaki. Tsuabuda jakidi jancha chakabuimabumenkain, nuku yunukanwen, nun jatu detekin keyuaidan— iake iakebiaibun

13 shinan chakai janchaibu Saúlun jatu nemakin:

—Israelin enabu Jehován ma nuku medabewaxunwen taea ikis tsua ana mawatidubumaki— ikaya

14 jawaida Samuelin dasibi jatu yuikin:

—Nenua Guilgal anu buxun Saúl nukun xanen ibu kushipajaida dasibi jatu unanmakin taewadinun bukanwen— jatu wa,

15 ninkatan dasibi Guilgal anu bui mapekei jikixun Jehováki nukuti tadi jiwe bebunxun dasibibun yuikin: “Saúl nukun xanen ibu kushipajaidaki”, atan januxun inabu tesenxun jawen nami bawaxun pi besi Saúl inun Israelin enabu dasibi Jehová daewai jabe jaibunamei benimajaidanibukiaki.