—Jehován mia katukin medibi waikiki, Israelin enabu, jawenabukididan, xanen ibuxunkin min jatu yunubainxanunan. Jatu yunukubainkin tsuabuda jatuki sinatakin minabu ichakawakin bika tenemakubaini jatu dapi jiwebaunabu nemakin jatu jenemakin keyukin Israelin enabu min yunukubainxanaii. Eska ikis en mia yuiai keska min jaki nukuakeakekainai en mia shinanmaii, jawen unanti tibidan, jaska Jehován mia ma katua min kaidan. 2 Ea anua min ma ka, Benjamínen enabu maiwan pakea Selsah anu janu Raquel mai wanibu dapi juni dabeki min nukui kaii. Ja dabetun mia yuikin: “Asna min benakubauntanaidan, ma bechishinabuki. Jakia min epan asnakidi ana shinanma matu dabekidi besti shinanjaidaikiki, ‘¿En bake jaskatan jatu bechipa?’ ”, iwanan, “mia shinainkiki”, akin mia jaska wabu 3 ninkabaini ana unudi bai tanabaini kai Tabor anu ji ewapa kushipa jawen kena encina anu 3 juniki min jatuki nukui kaii. Jabun Dios kenwain Betel anu mapekei bei ja dukun bebukidankin 3 cabra bake iabainun janua betsan 3 misi ewapa tsumaxun benun januxun betsandi chaxuwan bichi sakuki vino mata iabidanai min jatuki nukuaya 4 jabun mia yukakin: “¿Jaskadamen?” mia watan mia misi dabe inanxankanikiki. Bixanwen. 5 Ana kakunkaini mae betsa Jehován Guibeá janu Filisteo nawa detenamenikabun kexea jiweabu anu min ma kemai jikiken medibi mananan anua Diosun jancha yuixunikabu nishi paewen paean keska benimai butubidanai bei Dioskidi janchai bekubidanaibun jatu bebun arpa inun shasha ati inun tepedewe inu mimawati betsa mawakubidanaibuki min jatuki nukuxanaii. 6 Jatuki min nukuken Jehován yushinin mia kushipawaya Diosun jancha yuixunikabu paean keska jatube benimai jabu betsa keskai min juni betsajaida ixanaii. 7 Jaska mia wa kaimaxun min jatun jiwea medabewakatsi ikai, pepakin jatu axunkubainxanwen, Diosun mia medabewakubainxanikikidan. 8 Min jaskakainshina bebunkidi Guilgal anu kaxanwen, jadi ana en miki nukui kaxanaii. Jadixun mibetan inabu xeni menukin keyutan jawen nami Dios daewati inankuinkin nun daewaxanaii. Jadixun 7 xaba ea manaxanwen, en kai miki nukuxanaidan, min jaska wakubainxanai jadixun xabakabi en mia ana yui kaxanaidan— aka

9 —Ma en kaii— abaini Saúl kaya Diosun Saúl jawaida shinan betsa wamaxun jaska jawen unanti Samuelin Saúl yuixu Diosun dasibi uinmakubidanxu 10 janua jawen dayadube Saúl Guibeá ma kemai kai Diosun jancha yuixunikabu benimabidani Saúlki nukuabu Diosun yushinin Saúl betsa wakin kushipa wa nishi paewen paean keska benimakin jatubetan Saúlun Dios kenwankubainaya 11 Saúl uinkubidanmisbun jatube Saúl ikai uin jabu yuka ikin yuikin: “¿Quisin bake jaskai ikimenkain? ¿Saúldan, jabiadi Diosun jancha yuixunikadi ikimenkain?” iake iakeaibun

12 juni betsan ana jancha betsawen yuikin: “¿Jabun epadan, tsuamen, jatun jatu kushipa waidan?” januxun shinankubidanibu yuikin: “Saúldan, jabiadi jawenabu Diosun jancha yuixunikadi ikimenkain”, iwanan, yuiakeakepaunibukiaki.

13 Diosun jancha yuixunikabubetan Dios kenwankin keyutan jawen epan jiwe anu Saúl kai jikia 14 jawen kukan Saúl inun jawen dayadu yukakin:

—¿Man jani katanshinamen?— aka

kemakin Saúlun yuikin:

—Asna benakubauni nun jawa bechiama kawantanshinaki. Jakia Samuelki nun nukutanshinaki— aka

15 jawen kukan ana yukakin:

—Jawa Samuelin matu yuishinamenkain, menan ea yuidikanwen— jatu wa

16 kemakin Saúlun yuikin:

—“Matun asno ma bechishinabuki”, iwanan, besti nuku yuishinaki— aka jakia Israelin enabu yunuxanun jaska Samuelin yuishinakidi jawa yuiama ishinken 17 januxun jau Jehová kenwankin duawai benunbun Mispá anuxun Israelin enabu Samuelin jatu kena 18 bei ichabu jatu yuikin:

—Eska Israelin mekenika Dios Jehován ea yuishina matu yuinun ea ninkakanwen. “Matun xenipabu Israelin enabu taxnimakin en jatu iweniki, Egipto anuadan. Egipto nawabun jatu ana achipaiaya en kushipawen en jatu yamawaniki. Bekubidanaibu nawabu xanen ibu tibibun jatu ichakawapananbun en jatu maemaxunkubidaniki”, ea washianki. 19 Jakia jabun matu chakabuwakin bika tenemaibu matun mekenika Diosun matu medabewakin matu nemaxunbiakubidana ja besti chitikatsi ikama natian man ja danankin yununika xanen ibu kushipajaida man ea yukaimawen taea na jabiatian Jehová bebun Jacobun juni bake tibitun enabu xukuabu tibi ichatan janua jawenabu tibi anua Jehová bebun jau bebidan bebidanunbunwen— jatu wa

20 Samuel jatu yunuaya Jacobun juni bake tibitun enabu bebidan bebidanaibu jawen unanti betsa watan jaya inun jayama watan Benjamínen enabu anua Samuel jawen jatu katutan 21 ana jatu yunuaya Benjamínen enabu xukuabu tibi paxkatan jawenabu nantakea tibidi bebidan bebidandiaibun jawen unanti watan Matrín enabu nantakea Samuelin katuxun ana jatu yunuaya Matrín enabu jiwe ibu bestibu tibi bebidan bebidandiaibun jawen unanti ana jabiaskadi watan Samuelin Quis katuxun jawen juni bake kena tibi jau yuinun Samuelin Quis yunua jawen baken kena tibi Quisin yuikubainaya jabiatiandi jawen unanti Samuelin ana watan Saúlun kena taxniken Saúl benabiabaunabu jawa bechiabumawen taexun 22 ana Jehová yukakin: “Saúldan, ¿jani nun jaki nukutidumen?” akabu jatu kemakin Jehován jatu yuikin: “Ma juaki. Ja mabu mania naman anu ma juneaki”, jatu wa, 23 kushikain janu junea anu kaxun Saúl taxnimatan iwekin Israelin enabu ichabu bebun nichianbu Saúlun keyatapa Israelin enabun tsuan binuama jawen punti anu kesubainbainabu dasibibun uiainbun 24 Samuelin jatu dasibi yuikin:

—Matun yununika xanen ibu kushipajaida ikunkainxanun na juni Jehován ma katuxu man uiaiin. Israelin enabu tsua jaska keska jayamaki— jatu wa

kemakin jui kushipawen dasibibun yuikin:

—Badi ichapa jau jiwepakexanunwen, nukun xanen ibujaidadan— akin keyuaibun

25 jawada xanen ibujaidatun akubaintidu inun jawada atiduma Samuelin jatu dasibi yusinkin tapinmatan jabias jancha dasibi unaki kenexun Jehováki nukuti tadi jiwe anu adutan dasibi jatun jiwe anu jau bununbun Samuelin jatu nichian buaibun 26 ja dikabi jawen jiwe Guibeá anu Saúl kadiai juni detenamenika betsa betsapa jabe jau bununbun Saúl bechipaimakin Jehován jatun shinan Jehován pepa wa Saúl chibanbainabun 27 jakia jancha chakabukin yuanmisbun yuikin: “¿Jatun nuku mekekin yunuxanaimenkain, ja juninan?” akeakekin danankin jawen kenwanti inankuinti buxuanbuma unanbiakin Saúlun jawa yuiama inikiaki.