3 Xaba betsatian Quisin asno ichapa ibubis jadakidida bui benushinken jawen bake Saúl yuikin:

—Nukun dayadu jadatuda betsabe kaxun nukun asno benakubauntankanwen— aka 4 Saúl jawen dayadu betsabe kakin Efraínen enabun maewan mati matipa bai kapukebainkin benakubaini Salisá maewandi kapukediabaini jakia jawen epan asno jawa bechiama, ana kai Saalim maewandi kapukediabaini jawa bechiama Benjamínen enabun maiwan pakea anudi bena keyubiakubaina jawen epan asno jania bechiama 5 ana kai Sufin enabun maewan anu jikitan jawen dayadu jabetan benakubaunai Saúlun yuikin:

—Chintundikainanwen. En epa jawen asnawen nuibiashina ja binumai nukuwendi nui: “Benuabuki”, ixun, nuku shinanjaidaikiki— aka

6 jawen dayadun shinantan kemakin yuikin:

—Na maewan anu Diosun jancha yuixunika jiweaki. Jawada yuia imiswen taexun jaki mesekin jawen jancha ninkamisbuki. Jadi kananwen, jatun ja baiwen kaxun nukun asno mapua nun bechitidu nuku yuitidumenkainan— aka

7 Saúlun kemakin:

—Jaskakenan, uinun kawe. Jakia ¿jawa buxun nun inankuintidumen? Nukun sakuki nun misi beshian ana jayamawen taea nun jawa inankin benimawatimaki— aka 8 kemakin jawen dayadun Saúl yuikin:

—Plata pei jexe kaduma en kapankanki en jayaki. Jadatu baiwen nun kai jau nuku yuinun na plata pei jexe pishta Diosun jancha yuixunika inanun kawe— aka 9 (Nukun xenipabu jiweatian Israelin enabun Dios yukakatsi ikin yuikin: “Unanjaida uinun kawe”, abiapaunibun ikis unanjaida jancha betsawen kenakin: “Diosun jancha yuixunikaki”, amisbuki.)

10 Jawen dayadun jancha ninkatan Saúlun yuikin:

—Jaska min shinain peki. Janu kananwen— aka janu Diosun jancha yuixunika jiwea anu bui 11 jawen mae mananan anu mapekebainkin chipashbun unpax bi butubidanaibuki nukuxun jatu yukakin:

—¿Nenu jabianua nun jaki nukutidumen, ja unanjaidakidan?— jatu wa

12 chipashbun kemakin yuikin:

—Jeen. Na jabianua man jaki nukutiduki. Mananan medibi jadixun Dios kenwanmisbu anuxun nami jatu pimai nukun mae anu ma juaki. Menan jawaidabain jaki nukuditankanwen. 13 Manananxun jatu pimai kadiama jikixun jawaida benatankanwen. Judiamaken nukunabun piama manayumisbuki. Inabu tesenxun jawen xeni menu keyutan jawen kenwanti nami juabu jamaki pitidubumaki. Jakia ja unanjaida juxun ja piti ma jatu Dios kenwankin ma jatu pewaxunken tsuabuda jatu kena bei ichaxun pimisbuki. Jaskawen taea jawaidabainditankanwen, ikis janua man jaki nukuaidan— akeakeabu

14 janua ana mapekebaini jawen mae jikiti xui ma kemaibun mananan medibi jadixun Dios kenwanmisbu anu kai Samuel jatukidi jui taxnikidani juaya

15 uatian Saúl judiama Jehován bebunkidi Samuel yuikin: 16 “Meshukidi jabia badidi juni betsa Benjamínen enabun maiwan pakeanua janu mianu betsa en yunuxanaii. Israelin enabu en jatu ena wani jau jabun xanen ibu ikunkainxanun ja juni ea katuxunkin ea medibi waxunxanwen. Filisteo nawabun jatu ichakawaibu bika tenekin Israelin enabun ea yukaibu jatuwen nuikin en ninkaiwen taexun en jatu medabewaya Filisteo nawabu ja junin maemakin ea jatu putamaxunxanikiki”, aka Samuelin ninkashinawen taexun

17 Saúl juai Samuelin uianyan Jehován yuikin: “Ja juni juaikidi en mia jancha washinadan, jaki. Ja juninan, enabu anua xanen ibuxunkin jatu yunukubainxanikiki”, aka

18 mae jikiti xui anu Samuelki kematan Saúlun yukakin:

—¿Min ea yuitidumen, ja juni unanjaida jadakidi jiweamenkainan?— aka

19 kemakin Samuelin Saúl yuikin:

—Unanjaidadan, jabia en eaki. Mananan medibi anuxun Dios kenwanmisbu anu ebe bukanwen, jadixun man ebetan piaidan. Meshukidi penama jawada min ea yukakatsi ikai kemakin en mia yuixanaii. Jaska watan en mia nichinxanaii. 20 Jakia ja matun asno man benushina 3 día man benaidan, ana jawen nuiyamawe, ma bechishinabukidan. Ja dikabi, Israelin enabu jabun matu bechipaiaibudan, man matubuki, min miadan— aka

21 Saúlun kemakin yuikin:

—Israelin enabu xukua betsa Benjamínen enabudan, enabudiki. Nun ichapamaki, eskadabesdan. Ja inun, Benjamínen enabu betsa en epan enabu xukua nun ichapamadiki. ¿Jaskakin min jaskakidi ea yuiai?— aka

22 jawa kemama jatu iyui mati anu mapekekain januxun piti jiwe wanibu anuxun piaibu anu Saúl inun jawen dayadu bichixun 30 junibu namakis xanen ibujaidatun tsauti anu jatu tsaumatan 23 bawadu juni yuikin:

—Ja nami paxkatan tadi aduwe— iwanan —En mia inanshina ikis bewe— aka

24 jawaida kishi jidabi bitanxun Saúl bebun tsauanyan Samuelin Saúl yuikin:

—En mia aduxunshina mia bexunxuki. En jatu kena beabubetan min piyunun en mia jawa shinanmabia aduxunshinawen taexun pidiwe— aka jabias xabatian Samuelbetan Saúlun pinikiaki. 25 Medibi kenwanti jiwe anua butubidani mae anu jikitan jau janu uxanun jiwe sapa mamaki pewaxuna 26 jadi Saúl uxa dakashinaya penama janu uxati pepa anu Saúl dakaken Samuelin kenakin yuikin:

—Bestentan butudikidanwen, en ma mia nichiainan— aka Saúl benitan butuaya januxun Saúl inun Samuel bai anu taxnimabaini 27 mae kexa anu butukainkin Samuelin Saúl yuikin:

—Jau min dayadu ja dukun bebukainun nichinwen. Jakia mianan, ea manayuwe, eska Diosun ea yuishina en mibe janchaidan— aka jawen dayadu nichian bebukaini ma kaken