Yununika xanen ibu kushipajaida Israelin enabu jayakatsi yuka inibukiaki, na janchadan
8
Anibui Samuel babukin jau jabun Israelin enabu unanti wanika kushipa jau jatu ixunkubainxanunbun jawen juni bake dabe katukin yununikiaki. 2 Jawen juni bake iyua jawen kena Joel inun jawen juni bake ja kachukea jawen kena Abías, Beerseba anu ja dabe jatu xanen ibuxunkin Israelin enabu yunukin taewaibun 3 jatu jaska wakin jawen bakebu jatu katuxunbiaima jatun epa pepakunkainmis keskama jakia ibubis kemujaidai shinan chakakin pei june binun, iwanan, jatu yukakubainkin jawada yunuti pepa chibanma ikubainaibuwen taea 4 Israelin enabu anibu unanepa xanen ibubu dasibi ichai keyutan Ramá anu Samuelbe janchai buxun 5 yuikin: “Anibui min ma babuaii. Min juni bake dabetunan, min nuku amis keska nuku pewabumaki. Jaskawen taexun jau nuku yunukubainxanun yununika xanen ibujaida katukin nuku yunuxunwen, mae betsa betsapa anu nawa jiwebaunabun beya jayabu keskadan”, akeakeabu6 yununika xanen ibu kushipajaida yukakin ea abiabu jatun jancha Samuelin bechipaiama jaskakidi Jehovábe janchakin yuka 7 kemakin Samuel yuikin: “Jamapai tibi minabun mia yukaibu jatu axunwen. Jatu mekei en ana jatu xanen ibuxunyamanun mia dananma jakia ea jabun danain ikanikiki. 8 Janu jatun xenipabu Egipto anua en jatu taxnimabidanaitian itiani iki ikanikiki, jaska ea akubidanibu keska mia waidan. Jaskawen taexun yushibu betsa betsapa kenwankin ea jenekubainmisbuki. 9 Jaska mia yukaibu min ninkaxudan, peki. Jatu katuxunxanwen. Jakia min jatu katuxundiama jaska jatun yununika xanen ibu kushipajaidatun jatu yunukin amakubainxanai dasibi xabakabi bebunkidi jatu chitekin unanmawe, jaska jabun dayaxunxanaibudan”, aka
10 yununika xanen ibu kushipajaida yuka ikaibu Jehován jancha Samuelin ninkatan jatu bamabimakin 11 yuikin:
—Jaska yununika xanen ibu kushipajaidatun matu akubainxanai matu yuinun ea ninkakanwen. Matun bakebu kenatan detenamenikabu jatu yunukin jatidi detenamenikabu wakin jatidi jawen caballo tadantiki mapumisbu wakin jatidi ichapa caballoki katsaumebaintidubu jatu wakin januxun jatidi jabun xanen ibu kushipajaida mekenikabu jatu waxun jatu yunupakexankanikiki, 12 betsabu 1,000 detenamenikabu xanen ibuxunkin yunuti wakinan, betsabu 50 detenamenikabu yunuti jatun xanen ibu bexmas wakinan. Matu man juni ewabudan, jatidi katukin jawen bai anu dayadubu wakin jatidi bai anu bimi tsekanika wakin jatidi jabun jashi inun kanun inun pia wanikabu wakin jatidi jawen detenameti caballo tadanti dami wanika matu wakubainxankanikiki. 13 Ja dikabi matun bake chipashbu ichapa jatu dayamakatsi katuxanikiki, eska tibi jau axununbunan. Betsabu xeni ininipa wanikabu wakin inun betsabu jawen bawaxunikabu wakin inun betsabu misi wanikabu wakin jatu dayamakubainxankanikiki. 14 Matun bai pepabu inun matun uva bimi bai pepabudi inun olivo ji bai pepabudi jawen kushipawen matu mebintan jau ibu wanun jawen dayadu jatu inankubainxanikiki. 15 Matun xekiwan betsa betsapa inun matun uva bimi año tibi man tsekaibu 10 tibi man jaya bestichai tibi décima parte mebintan jawen dayadu inun jawen medabewanika xanen ibu bexmasbu jabe tsuabu jatu inankubainxankanikiki. 16 Ja dikabi matun dayadu junibu inun, matun dayadu ainbuaibu inun, matun ina awa pepabu inun, matun asno matu mebinkin ibu watan jau ja dayaxununbun jatu yunukubainxankanikiki. 17 Ja dikabi año tibi matun chaxuwan inun cabra tanaxun 10 tibi man jaya bestichai tibi décima parte bikubainaya matudi man jawen dayadu idiakunkainxanaii. 18 Ja yununika xanen ibu kushipajaida ikis man katukatsi ikaitunan, matu ichakawakubainaya Jehován jau matu medabewanun kaxakin man yuka Jehován matu ana ninkama ixanikiki— jatu wa
19-20 Samuelin jatu mesewabia jawen jancha ninkabuma Israelin enabu anibu unanepa xanen ibubun kemakin yuikin:
—Jabiaskabiaken yununika xanen ibu kushipajaida nun jayakatsis ikaii. Dasibi mae betsa betsapa jiwebaunabu keskaidan, yunukin nuku mekekin nukun detenamenikabube tsuabuda nukuki sinataibu nuku maemaxunkubainxanunan— akeakeabu
—Jaska mia yukaibu keska ninkatan yununika xanen ibu kushipajaida jatu katuxunxanwen— aka jatu anu ana kaxun Israelin enabu Samuelin yunukin yuikin:
—Matun mae tibi anu chintundibainkanwen, jaska man ea yukaxu en matu axunxanaidan— jatu wa