2 Quiriat-jearim anu Jehován jancha aduni bau mekekin aduyamabu ma 20 año kaya Israelin enabu dasibibun Jehová ana jaibuwakatsis ikin yukajaidabiabu 3 jatu jen akamawen taexun Samuelin jawenabu jatu yunukin yuikin: “Matun juinti jidabiwen inun matun shinan jidabiwen Jehová anu ana chintuntan man chibankatsis ikaidan, ea ninkakanwen. Nawabu matu dapi jiwebaunabun yushibu dami kenwanti betsa betsapa man jaya ana kenwanma jenekin putakanwen. Ja inun, yushin Astarté dami putakin keyutan matun jiwea jidabiwen Jehová besti duawakin ninkakin kenwankubainxankanwen. Man jaska wakubainaya Filisteo nawabun matu achinixun matu yunumisbu matu ana yunumama Jehován Filisteo nawabu babu watan matu mebikinanxanikiki”, jatu wa

4 Samuelin jancha ikunwankin ninkatan jatun yushibu Baal kenwanti dami dasibi inun yushibu betsa Astarté kenwanti dami dasibi Israelin enabun putakin keyutan januxun Jehová besti kenwankin duawakubainkatsis ikin shinainbun 5 januxun Samuelin jatu yunukin yuikin: “Israelin enabu dasibi Mispá anu jadi ichai bukanwen. Man jadi ichabu jadixun ean Jehová en matu yukakin ea axuin kaii”, jatu wa

6 Mispá anu bui ichai keyuxun juni bestibu tibitun chacha unpax bitanxun Jehován bedubi kenwankin inankuin keska wakin mai anu unpax jukakin keyuxuntan jabiatiandi samekekin dasibibun ninkaibun xabakabi jatun chakabu yuikin: “Nun jawa shinanma Jehová danankin nun chakabuwakubainshinaki. Nun ana jaskakatsi ikamaki”, ikeakeaibun Israelin enabu Samuel jatun xanen ibu unanti wanika kushipa taeaya 7 Mispá anu Israelin enabu ma ichabu Filisteo nawabun ninkatan jatuki sinatamisbuwen taexun jatu detetanun ika Filisteo nawa xanen ibubu jawen mentsisipa detenamenika ichapabuya beaibu Israelin enabun jatu uin datekin 8 Samuel yunukin yuikin: “Filisteo nawabu jatun kushipa jau nuku nemaxunun nukun mekenika Jehová Dios yukakin nuku jenexunyamawe”, akeakeabu

9-10 chaxuwan bake bene pishta chuchu jenediama Samuelin achitan tesenxun chiwen jidabi menukin Jehován jau jatu medabewanun Samuelin yukakubainaya jatu detenun ika Filisteo nawa detenamenikabu kemaibun Samuelin jancha Jehován ninkatan jatu medabewakin jabu anu kana tun ima chakayamakin jatu dateaya ninkai datei Filisteo nawabu kushibainaibun 11 jatu jaska waya Israelin enabun jatu maematidubu shinain Mispá anua jawaida taxnibain jatu detenun ika, buaibun Filisteo nawabu paxaibu chibanbainkin jatu detekubainkin Bet-car anu niti itan chintunbidanaibun 12 mishki kedan ewapa katutan unudi Mispá inun unudi Sen namakis buxun jakimatima shinanmati wakin jatu nichinmaxun yuikin: “Natian Jehován nuku medabewakin jeneama nun unainwen taea jawen kena Eben-ézerki”, Samuelin jatu wanikiaki.

13 Israelin enabun ma Filisteo nawabu jatu maemakin keyuabuwen taea Filisteo nawabun Israelin enabun mae anu chintunkidan jatu ana meanma ikubainibukiaki, Samuel jiweatian Jehová Filisteo nawabuki sinataiwen taeadan. 14 Filisteo nawabun maewan dabe Ecrón inun Gat namakis jatun mai pakea kexa dapi Israelin enabun mae inun jatun bai kesua betsa betsapa jatu mebinkin keyubianibu ana ibuwakin Israelin enabun Filisteo nawabu jatu nichinkin putakin keyutan ja dikabi Amorreo nawabu jatu nematan Israelin enabu ana jatube detenameama unanuma jatube jiwenibukiaki.

15 Samuel jiweatian jatu dayaxuni Israelin enabun xanen ibu unanti wanika kushipa ikunkainkin 16 año tibi Betel anuxun inun, Guilgal anuxun inun, Mispá anuxun jatu uin kakunkaunkin Israelin enabu jatun mae tibi anua bea ichaxun jatun chakabu inun jawada bika teneaibukidi Samuel banabimabu jatu daewakin janchawen jatu pewakin Samuelin jatu yusinkubaunpaunikiaki. 17 Jaskakunkauntani janua kaini Ramá anu chintuinan, jabianudi Jehová kenwanti chi tapu wani anu inun jadi jiwea xanen ibukin Israelin enabu Samuelin jatu yunupaunikiaki.