—Jehován jancha aduni baudan, nun jaska watidumenkain, nuku yuikanwen. Nun jaska watan jatun mae anu ana jatu inantidumenkainan— jatu wabu

3 jabun jatu kemakin yuikin:

—Diosun jancha aduni bau man ana jatu inankatsi ikai jaska besti jatu bumayamakanwen. Jehová daewakin inankuinti pepa bumaxunkanwen. Man jaska wa man xuxaxanaii. Jehován matu kupikin jeneai man unanxanaii, ana matu kupiamadan— jatu wabu

4 ana jabun jatu yukakin yuikin:

—Jehová daewakinan, ¿jawa nun inankuintidumen?— jatu wabu jatun yushibubu kenwanikabun jatu kemakin yuikin:

—Matu inun matun xanen ibubu jabias kupiti chakabu mei man bika tenediaiwen taexun mane orowen matun yuda anu su ika keska wakin 5 dami jatu amaxankanwen. Ja dikabi oro xuya keska wakin 5 dami jatu amadiaxankanwen, bestibu matun xanen ibu tibi wakinan. 5 Man bika teneaiwen taexun su ika keska oro dami inun matun mae anuxun dasibi xuyan pikin dasibi chakabuwakin keyuaibu keska oro dami wakin keyuabu ja damiyabi inankin Israelin enabu mekenika Dios duawakin pewakubainxankanwen. Man jaska wai Jehován uintan matu inun matun yushibu inun matun mai pakea ana kupiama matu jenexanimenkain. 6 Israelin enabu Egipto anua taxnibainpananbun Faraón inun jawenabu juinti kushikin jatu nemakubainaiwen taexun Israelin enabu mekenika Diosun jatu kupijaidaya atimas ana jatu nemama ini keskai matun juinti kushi wayamakanwen. 7 Ina awan tadanbainkin bumati bena jatu amakanwen. Ma akin keyuabun ina awa dabe jawen bake chuchu jenemadiama tekishkunyan mapuisbuma bitan tadanti teumaxun jawen bake chuchu amai dabe chibain nemakin janu ina awa jiwe anu jatu bichixankanwen. 8 Jaska waxun Jehován jancha aduni bau bexun tadantiki nanetan jawen daewati oro mabu inankuinti bau betsa medan ja dapi datanxankanwen. Jaska waxun jatu jenexankanwen, ina awa dabe ibubis jau butanunbunan. 9 Israelin enabu mae Bet-semeskidi jawa jikikaunama kai peaidan, Diosun jatun nuku bika tenemai nun unanxanaii. Jakia jaskama jamakidi ja ina awa jikibainaibudan, jawanda nuku isin tenemakin kupiai nun unantidubuki— jatu wabu

10 jaska jabun jancha ninkatan jaska wakin ina awa yuxan dabe jawen bake chuchu amai katuxun jatun bake dabe chuchu putamabidan janu ina jiwe anu jatu bichixun ina awa yuxan tadanti teumadabexun 11 januxun Jehován jancha aduni bau bexun tadantiki nanetan jawen daewati xuya dami oro inun yuda jidabi su ika dami oro inankuinti bau betsa medan ja dapi nanetan 12 Bet-semeskidi bai jau tanabaintanunbun ina awa yuxan jeneabu jamebi kai maan maan ikunkaini besukidi bai tanabaini jawa benuama yusiudi inun yusmaudi jikiama kayatapibainaibun jachun Filisteo nawa xanen ibubun chibankubaini ja Bet-semes mai pakea kexa anu niti ixun uiainbun 13 paxku napanpa anuxun Bet-semes anu jiweabun jatun xekiwan trigo tsekakin bewenikitankin Jehován jancha aduni bau awadan beai bechitan benimajaidaibun 14-15 Bet-semes anu jiwea juni betsa Josuén bai anu jikia mishki ewapa daka anu ina awa dabe jawen tadantiya niti ikabun Jehován jancha aduni bau inun jawen dae wati inankuinti bau betsa Jacobun juni bake Levín enabun butekin mishki ewapa anu tadi tsauanbu ja ina awa dabetan teudabebidanxu Bet-semes anu jiweabun pekatan jawen tadanbainti kadu waxun ja ina awa dabetun bau bexu tesendabetan Jehová kenwankin ina awa dabe menukin keyuxuntan jabias xabatiandi inabu betsabudi tesenxun jawen xeni menukin keyuxun jawen kenwanti nami juaxun piaibun 16 Filisteo nawabun ina awa chibanbidanabun jaska waibu dasibi uintan jabias xabatiandi Filisteo nawa 5 xanen ibubu jatun maewan Ecrón anu chintuainbun

17-18 Filisteo nawa 5 maewan Asdod inun, Gaza inun, Ascalón inun, Gat inun, Ecrón jabu tibi bestichai ichawatan 5 oro dami su ika keska inun mae tibi kenebaunabu inun mae tibi keneuma ja 5 Filisteo nawa xanen ibubun yunukin jatu mekemis tanatan jati oro dami xuya keska ichawatan bau medan nanexun Jehová daewakatsis ikin Filisteo nawabun inankuinibukiaki. Bet-semes anu Josuén bai anu ja jabias mishki ewapa Jehován jancha aduni bau janu dantanibu ikis tsuabunda uindiatidubuki.

19 Jakia Bet-semes anuxun jatidibun Jehován jancha aduni bau jaskada ikimenkain ixun uke medan bepenxun ma uianbuwen taexun jatu kupikin Jehován 70 junibu tenanken uintan Jehován jati jatu debuwawen taea Bet-semes anu jiweabu nuijaidai kaxakubainkin yukakin 20 yuikin: “Jehová Dios medibijaidabe tsua jiwetidumaki. ¿Jaskaken nun jani yunutidumen?” ikunkainkin 21 Quiriat-jearim anu jiweabu anu jatun jancha bumakin jatu yuikin: “Jehován jancha aduni bau achibiabainimaxun ana nuku anu yunushinabuki. ‘Jau menan bexun bidi benunbunwen’, matu washianbuki, jatu watankanwen”, aka