Filisteo nawabun mai pakea anu Jehová jatube yubakani jancha aduni bau bunibukiaki, na janchadan
5
Jehová Israelin enabube yubakani jancha aduni bau achixun Eben-ézer anua bukin Filisteo nawabun maewan Asdod anu bichitan 2 jatun mekenika yushin Dagón kenwanti jiwe medan bichikin yushin dami Dagón dapi buxun tsauntanabu 3 penama Asdod anu jiweabu kaxun Jehován jancha aduni bau bebun yushin dami Dagón main tin ika daka uintan bikin benitan jabianudi ana pewakin tsaunbainabun 4 ana pena betsatian kaxun Jehován jancha aduni bau bebun yushin dami Dagón ana main tin iki jawen buxka inun jawen meken dabe jikiti xui naman jawen nakishkunki jawen pabu tibi tunkeakeaketan jawen yuda besti senkeama daka uinibukiaki. 5 Jaskawen taea na jabiatian Asdod maewan anua jawenabu Dagónbe janchaxunikabu jawen kenwanti jiwe anu jikikaini jawen jikiti xui nakishkunki metsai jaki paisbumakiaki.6 Chipu Asdod anu jiweabu inun ja dapi jiwediabaunabuki Jehová jatuki sinatajaidakin jatu kupikin jatun yuda tibi su ika chakabuwakin dasibi isin jatu tenema datekubainkin 7 Asdod anu jiweabu dasibi isin tenejaidakin ja isin mebauni yuinamekin shinain: “Israelin enabu mekenika Diosun nuku inun nukun yushin Dagón kupikin xaba ichapa nuku isin tenemakubainaiwen taexun jatun mekenikan jancha aduni bau nukubun nun ana meketidubumaki”, ikeaketan
8 jaskatan jatun xanen ibubu jau jatube ichatan pewai benunbun jatu yuibaunabu ma bea jatube ichai keyuabu jatunabun jatu yukakin yuikin:
—Israelin enabun mekenikan jancha aduni baudan, nun jaska waxankanai, nuku yuikanwen— jatu wabu
xanen ibubun jatu kemakin:
—Gat maewan anu jadi maewakin butankanwen— jatu wa
Filisteo nawabun jadi buxun 9 Gat mae anu mistushinabun januxun Jehován jabu dasibidi jawen jatu datekin kupikin bake mishtinyanbis su imakin isinjaida tenemakin jatu nuitapawaya 10 jaskawen taexun maewan betsa Ecrón anu Dios jatube yubakani jancha aduni bau Filisteo nawabun ana maewai bukin jatu anu bichibainaibun Ecrón anu jiweabun uinkin jui kushipawen jatu nemakin: “Nukudi dasibi tenan keyunun”, iwanan, “Israelin enabun mekenika Dios jatube yubakani bau man bekanaii”, iake iakeaibun
11 Diosun jabudi kupikin su ika pawakin jatu isin tenemakubainaya ja maewan anu jiweabu datechakayamakin jatun xanen ibubu jau jatu yuixuntanunbun jatu kenabu ma bei ichai keyuaibun jatu yuikin: “Israelin enabu mekenika Diosun jancha jatube yubakani aduni bau nenu man beimadan, jatu buxunditankanwen, ibubu anudan, jau nenuxun nuku dasibi tenanyamanunan”, jatu wanibukiaki.
12 Jabu isinman jatu tenanma jatun yuda jidabi su iki keyua isin tenechakayamai kaxai bibiski ikin nenuma jatun jui kainmaibun chaijaida jiwebaunabun jatu ninka keyunibukiaki.