xaba betsatian Israelin enabu jatu detenun ika Filisteo nawabu ichatan bei Afec anu jatun tadi jiwe puntebaunabun jatu maemai jatube detenamenun ika Israelin enabudi budiai Filisteo nawabu maniabu bebun Eben-ézer anu ichatan jatun tadi jiwe puntediabaunabun 2 Filisteo nawa detenamenikabu jabu paxkama kekutan kainbidankin Israelin enabube detenamekin taewakin Israelin enabu maemakin bai namakixun 4,000 junibu detekin tenankin jatu keyuabu 3 Israelin enabu mentsisipa detenamenikabu chintunbidani jatun tadi jiwe puntebaunabu anu jikiabun, anibu unanepabun jatu yukakin yuikin: “Filisteo nawabun nuku maemakanxudan, ¿jaskai Jehován jatu nuku nemaxunama ixumen? Nukube nashui ikain jau Jehován nukuki sinataibu jatu nemakin nuku maemaxunxanun ¡Siló anua Jehová jatube yubakani jancha aduni bau binun bukanwen!” ibain

4 jaska shinantan juni ichapa Siló anu jatu yunua buxun janua Jehová dasibi kushipabu binu keyua jatube yubakani jancha aduni bau ja querubine jamamaki Jehová mekeabu tsaumis beaibun Elín juni bake dabe Hofní inun Finees jatube budiaibun 5 Israelin detenamenikabun tadi jiwe puntenibu anua jawen jancha aduni bau bei jikiaibu uin benimajaidai detenamenikabu dasibi sai sai ichakayamakin mai dikabi taka akaibun

6 jaskaibu Filisteo nawabun ninkai yuka ibauni: “¿Jaskai sai sai ichakayamakanimenkain, Hebreobu anuadan?” iki jaskakenan, “Jehován jancha aduni bau jatun mae anu ma beabu ikanikiki”, ikin tapintan 7 datekin jabun yuikin: “Jatun mae anua jaskaisbumabia jatun mekenika Dios kushipa ma beabuki. Ikis jatuki datei nun pemajaidaki. 8 ¡Nun peidawa! Ja mekenika Dios kushipa dasibi binujaidatun jau nuku achiyamanun ¿tsuan ja nuku mepanmaxuntidumen? Nun nuitapajaidaii. Jawen kupiti dami kushipawen ja Diosun Egipto nawa detenamenikabu yamawanikiaki. 9 Jaskabiaken dateama shinan chankantan nukun piaki chiti iki kushipanankanwen, babuama nun jatu maemanunbunan. Jaska nun jatu dayadu wamis keska jau jabundi nuku ayamaxanunbun chintuanma pubenkain jatube detenamenankanwen”, ikeaketan

10 Filisteo nawa detenamenikabu kushibain jawaida Israelin enabu jatu maemakin detekin keyuabu jatidi paxai jatun mae tibi anu buabun ichapajaida tenankin jatu deteabu 30,000 Israelin enabu main bua detenamemisbu ma mawai keyuabun 11 Dios jatube yubakani jancha aduni bau dikabi Filisteo nawabun achitan jabianudi Elín bake dabe Hofní inun Finees tenandiabun 12 jakia detenamenika betsa Benjamínen enabu paxai Siló anu kushikaini jabias xabatian jawen tadi buax pishta inun jawen yuda dasibi mai jasjaida jikiaya 13 jabiatiandi Dios jatube yubakani jancha bau bushianbuwen taea Elín shinain nuijaidai Dioski nukuti tadi jiwe jikiti xui anu tsauti ewapaki tsauken ja juni jukidan Siló anu jikitan dasibibu jaskakanxu jatu banabima ninkai kaxai bis bis ichakayamabaunaibun 14 Elín ninkatan yuka iki:

—¿Ja kaxai bis bis ikidan, jawa jaskai ikanimenkain?— ikaya

ja junin Elí yuiditanun ika jawaidakidanaya 15 janua Elí ma 98 año jaya ma bexuxjaidayama tsauaki 16 nukuxun ja junin yuikin:

—Detenameaibu anua jadia jatu maemabidani yumantan piskukidani badikis en juaii— aka Elín yukakin:

—En bakeen, jawa matu jaska wakanxumenkain, ea yuidiwe— aka

17 kemakin yuikin:

—Filisteo nawabube detenamei Israelin enabu paxakanxuki. Ja inun, jatu detekin keyukin nukunabu ichapa jatu tenankanxuki. Ja dikabi min juni bake dabe Hofní inun Finees tenandiakanxuki. Janua Dios nukube yubakani jancha aduni bau dikabi Filisteo nawabun jatu ma mebindiakanxuki— akin

18 jaska yuia jawen yubakani jancha aduni baukidi Elín ninkatan ma anibu xua xankamajaida jawen tsauti ewapaki Dioski nukuti tadi jiwe beputi dapi tsaua anua manaskakain tin iki mapu tetsekea mawanikiaki. Unanti wanika Elín 40 año jatu medabewaya Israelin enabun jawen jancha ninkakubainibukiaki. 19 Elín babawan, Fineesin ain tuya ma kain kema jawen yubakani jancha aduni bau ma jatu mebinkanxu inun jawen kuka inun jawen bene ma mawakanxu ninkai datei jawen bake isin pikutan june tenei uminakeakei jawen bake kaian 20 ja ainbu ma debuai uinkin jabun medabewakin yuikin: “Dateyamawe, juni bake min ma kaiankidan”, abiabu ninkamas ma debuken 21-22 jawenabun yuikin: “Jawen yubakani jancha aduni bau ma nuku mebinkanxuwen taea Israelin enabu ana tsuan nuku kenwankin nukukidi pe shinantidubumaki. Nun ma babuabuki. Jaskawen taea ja bakeishta kenakinan: ‘Icabod waxunanwen’ ”, anibukiaki. Jaska shinankin ja bakeishta dabikinan, Dios jatube yubakani ma jatu mebinkanxu inun jawen kuka inun jawen bene mawaxu shinankin jaska waxunibukiaki.