—¿Jaskai mimesti tsuan mia banawabidanma min juai?— aka

2 Davidin padankin yuikin:

—Nukun xanen ibujaidatun ea yunukin: “Jawada pewatanwen”, ea akin yunushina jau tsuan unanyamanun ea nichian jukin jadatuda ea yunua en beai en unanmaki. Jamen juni en medabewanikabudan, ja mae anu jau eki nukui benunbun janu en jatu yuibidanshinaki. 3 Jaskawen taea en juai ¿jawa piti min jayamenkain? Jatida misi min jaya 5 besti ea inanyuwe— aka

4 Diosbe jawenabu janchaxunika Ahimélecin David kemakin:

—Dasibitun ja misi pimisbu en jayamaki. Dioski nukuti tadi jiwe anu jawen kenwanti misi medibi besti en jayaki. Uatian mibe beshianbu ana jatun ainbe chutanamediabumaken jau pinunbun en mia inantiduki— aka

5 David besu kushitan kemakin yuidiakin:

—Janu nun detenamei kainkainaitian jawa chutanameama nun kamiski. Nun jaska ibiamis natian chai jawada pewai nun juaidan, en junibubedan, nun jawa chakabumaki. Nun kainkidanshina jaskawen taea nun pejaidaki. Jaskaken ja misidan, min nuku inantiduki, dateamadan— aka

6 misi betsa jayamaken Dioski nukuti tadi jiwe dintu medibi tapu anua Jehován misi medibi watan inanmisbu dama bena waxu xanabidi ikai manchinkatsi ja misi dama maewakin bitanxu Ahimélecin David inanyan 7 jabiatiandi Saúlun chaxuwan mekenikabun jaskadashina xanen ibu Edom nawa jawen kena Doeg Jehováki nukuti tadi anu nixun dasibi uinkin ninkaya 8 Davidin Ahimélec ana yukakin:

—¿Min jawa jayamen, jashi kasmai machatu chaipa kenujaidadan? En xanen ibun jawaida ea nichian jawaidakidankin en machatu chaipa kenujaida inun en detenameti mabu betsa en beama jushiankidan— aka

9 Ahimélecin kemakin yuikin:

—Aa, en jayaki, napanpa Elá anuxun min tenankin maemaima Filisteo nawa Goliatin machatu chaipa kenujaida bestidan. Nukunabu Diosbe janchaxunti tadi puntea pechiudi tadi kextupawen yabutan en aduima dakaki. Min bechipaiai min butiduki. Detenameti betsa en jayamaki— aka

Davidin kemakin yuikin:

—Pejaidaki, ana betsa jayama jabia bestikenan. Jabia ea inanwen— aka Ahimélecin bitanxun David inan,

10 jabias xabatiandi Saúl anua kai ana paxai junekunkaini Filisteo nawabun maewan Gat anu jatun xanen ibujaida Aquís anu jikitan uin ka niken 11 jawen xanen ibu bexmasbun bechitan yuikin:

—Nadan, Davidki, nukun xanen ibujaida Saúlun dayadudan. Nawakin kantabainkin yuikin:

12-13 chanimajaida jaska waima Davidkidi janchabaunaibu Davidin ninkai Filisteo nawa xanen ibu Aquísin nuku detea ika jaki datejaidai jatu bebunua jaskaismabia dateabu jawen shinan benui duxku keskai jikiti xui beputi betsa betsapa anu jawen mentsisin bexa bexa akin kenekubauni kemu bishtunyain jawen kexniwen bishtun bishku bishku abaunaya 14 jaskai uinkin jawen xanen ibu bexmasbu Aquísin yuikin:

—Ja juni duxkudan, man uiain ¿jaskakin man eanu iwexumen? 15 ¿En jiwe anu na juni duxku ikunkainai en uinun man iweamen? ¿Nukunabudan, nun duxku jayamamen?— jatu watan David taxnima