—Min en bake keskawen taexun benimai unanuma jiwei min pepakunkainxanun en mia juni pepa benaxunaii, min benewaxanunan. 2 Eska shinankin en mia yuiai ea ninkawe. Boozdan, jawen dayadu ainbuaibube min dayashina anu na jabia meshu medan jawen dayadu junibubetan jawen bai anu kaxun xekiwan cebada manchinshinabu niwewen katai bukanikiki. 3 Min eska kaintanun mia yuinun ea ninkawe. Nashitan min bachi pe sawetan xeni ininipawen itan janu dayaibu anu katanwen. Jakia jau Boozin mia uinyamanun jawen daya keyutan pikin nuxukin keyudiamaken bechimayuama juneyutanwen. 4 Janua jani Booz uxaimenkain, uinjaidatanwen. Xekiwan cebada jexe manchinxun tsuan june meshu medan yumetsutiduma dasibi jaki uxai keyubaunabun mia taxnikaini Booz anu kaxun jawen dakukuti jawen tae juyabukua bepentan jawen tae jawa metsamama dakaxanwen. Min jaska daka mia bechitan min jaskaxanun jatun mia yuixanikiki. Dateyamaxanwen— aka

5 Rutin kemakin yuikin:

—Dasibi min ea jaska yuixu keska en iki kaii— aka

6 jaska jawen yayan yunuxu keskai jawen yuda jawenduatan bai anu kai jikitan junexun uianyan 7 Boozin pikin nuxukin keyutan benimakain uxanun ika kaxun xekiwan cebada manchin pewatan jaki daka ma uxaken chipu dasibi uxai keyuaibun jawa jatu banawama june Booz anu Rut ka jawen tae juyabukuakidi bepentan jawen taekidi dakatan jawa metsamama dakaken 8 yamenapun Booz bestenkauan dabekekauankin jawen tae taxkuankidi ainbu betsa daka mei teku itan 9 Boozin yukakin:

—¿Min tsua juamen?— aka Rutin kemakin:

—En min dayadu Rutki. Miadan, min enabi kayabiwen taexun matun beya keska wakin ¿min ea tsumatidumen, ea ainwankinan?— aka

10 Boozin kemakin yuikin:

—Jehován jau mia duawakin pepawaxanunwen. Min bene ma mawabiaimaken min benen ewa jeneama min ainbu pepajaidaki. Dasibibun mia uinkanikiki. Mabuya kasmai, mabuuma nukunabu juni betsa jawendua pepadi ea keskama bedunan duakabi bene wakatsi min jatu benama jakia min ea anu besti juxuki. 11 Min ainbu pepajaidakin jatu uinmaya dasibi en mae anu jiweabun unainbuwen taea jawa dateyamawe. Jaskawen taexun min ea jaska yukai keska en mia atiduki. 12 Chanima en minabuki. Jakia minabu kayabi betsan ea binua min bene kayabi jayadiki. 13-14 Ikis na jabia meshu medan jabianu iyuwe. Meshukidi ja juni min benen enabi ea binuatun nukun beya keska chibankin mia mekekatsis iki jau mia axunxanunwen. Jakia mia akamaken Jehován ea ninkaya en mia yubaii. Jabianu uxayuwe, penadiama katanxunan, jau ainbu nenu min juxu jau tsuan unanyamanunbunan— aka jaska yuia ja meshu medan Boozin tae dapi Rut uxashini penai xabakidanaya bestentan

15 Boozin yuikin:

—Min jawen yabukua uxashinai pekatan ja tadi puntekin punkinwanxun tsumawe— aka Rutin tsumaken Boozin 40 kilo binua xekiwan cebada deuxunkin matawaxuntan medabewakin iama Rutin iabaini jawen mae anu kai

16 jawen jiwetan jikiaya jawen yaya Noemín yukakin:

—Yayaan, ¿mia jaska wa min ninkatanai?— aka

jaska dasibi Boozin yuikin axu Rutin Noemí banabimakin:

17 —“Jawa buama min yaya anu min katidumaki”, iwanan, na xekiwan cebada dasibi ea inan en bexuki— aka 18 benimakin Noemín yuikin:

—En bake keskatuun, jaska Boozin mia akai manayuwe. Jaska mia yubaxu shinankin Booz na jabiatian juindukuntiduma pewakin keyuikiki— aka