2 xaba betsatian Rutin Noemí yukakin yuikin:

—Xekiwan cebada tsuanda jawen bai anuxun tsekaibu ewen nuikin ea nemabuma jatu ichun kakunkainkin cebada mexkan tsekakin nidi akin chaka waibu ¿en mitutanun min ea nichintidumen?— aka Noemín kemakin yuikin:

—Min en bake keskaki. Uinda kaxun benatanwen— aka

3 Rut kai jawa unanmabia jawen benen epa Elimélecin enabu betsa Boozin bai anu jikixun jawa yuiabuma mextekubainaibu jatu ichun kakunkainkin cebada mexkan nidi ikai jenekubainaibu tupikin Rutin ichawakubainaya 4 jabiatiandi Belén anua Booz jui jawen bai anu jikitan jawen beya chibankin tsekaibu jancha duapawen Dioskidi jatu jancha wakin:

—Jehován jau matu medabewanunwen— jatu wa

jabundi kemakin yuikin:

—Jehován duawakin jau mia pepawadianunwen— akabu

5 xekiwan cebada mexkan ichawai Rut jatu ichun kai uintushikin jatun jatu tsekamai dayadu xanen ibu Boozin yukakin:

—¿Ja ainbu chipashdan, tsuan bake jua ikimenkain?— aka

6 dayadu xanen ibun kemakin yuikin:

—Moab anua Noemí chintunkidanaya ja Moab nawa ainbu chipash jabe jushian ikikiki. 7 “Tsekaibu ichun cebada mexkan nidi ikai tupikin ¿ichawakubainpa?” ikin ea yukaxuki. Penama tupikin taewa juindukunwanmas eskadabes na jatian juindukun pishtatan ana dayakidani ikikiki— aka

8 Rut anu kaxun Boozin yuikin:

—Chipashaan, ea ninkawe. Xekiwan cebada mexkan tupikin ichawai juni betsan bai anu kayamaxanwen. Xaba tibi en dayadu ainbuaibu dayaibu anua besti bibidan bibidanwen. 9 Januxun janidaxun en dayadubun tsekaibu uinkin jatu ichun xekiwan cebada mexkan nidi akin chaka waibu tupikin ichawakubainxanwen. Jau tsuan mia ichakawayamanun en dayadu junibu en ma yunuxuki. Min unpax manuai ja shumuki unpax bexun akaibu jatubetan adiakubainwen— aka

10 ninkai Rut danti iki maiki beti itan yuikin:

—En minabumabiaken ¿jaskai ewen nuikin min ea medabewakatsi ikai?— aka

11 Boozin kemakin yuikin:

—Min bene mawaimaken min yaya min duajaidawakubainaya en ninkashina en unaiin. Nun nawa betsa min nuku unandiama nukube jiwenun ika min mai pakea inun min ibubu min jenebidanshina en unandiaii. 12 Jau Diosun mia manakununwen. Enabu min duawakubidanimawen taexun Israelin enabu mekenika Dios Jehován jancha min chibankatsi ikaidan, jau mia pepawakubaindiaxanunwen— aka

13 Rutin kemakin yuikin:

—Min ea jaska jancha wakin min ea benimawaii, jaska min ea jancha pewaidan, en min dayadumabiakenan— aka

14 ka ibaikin ma badi manananbi piaibutian Boozin Rut kenakin yuikin:

—Nenu juwe. Misi bixun yuchi bunkashki pukutan piwe— aka tsekaibube Rut tsaua xekiwan tsuiabu Boozin Rut inan pikin yaniwatan jawen texe adutan 15 xekiwan cebada mexkan nidi akin chaka waibu ana ichawai Rut benikainken jawen dayadubu Boozin yunukin:

—Man tsekaxun manchinbainai dapi jawen mexkan nidi ikai jau tupikin ichawakubainun nemayamakanwen. 16 Ja dikabi jau ichapawanun tsekaxun manchinkin june mexkan eskadabe nidi axunkubainkanwen. Tsuan ichakawayamadiakanwen— jatu wa

17 Boozin bai anu kaxun mexkan nidi ika tupikin ichawakubainkin ma badi jikikainaya jenetan jati ichawaxu kusha kusha akin jawen jexe ichawatan tanakin 20 kilo binua xekiwan cebada 18 peubaini jawen mae anu chintunkidani jawen yayan jiwe anu jikixun uinmatan januxun badi manananbi pikin texewabidana jawen kapankan anua bixun Noemí inan

19 Noemín yukakin:

—¿Jani min dayaxumen, ikisdan? ¿Jania xekiwan cebada ichapajaida min bixumen? Tsuanda mia medabewaxu Diosun jau pepawakubainunwen— aka

janu ka dayaxu jawen yaya Rutin yuikin:

—Ja bai anu kaxun xekiwan cebada mexkan tupikin en ichawatanxudan, jawen ibudan, Boozki— aka

20 benimakin Noemín kemakin yuikin:

—Nukunabu mawadiabuma medabewani inun nun jiwediayuabu Jehová pepatun nuku medabewamiswen taexun en kenjaidawaii. Boozdan, en benen enabi kayabiki, medabewakin jau nuku mekenunwen, nukun beya chibankinan— aka

21 januxun Rutin ana banabimakin:

—Ja dikabi xekiwan tseka keyudiabuma jawen dayadu ainbuaibube dayakunkainkin en jatubetan tseka keyuxanun ea yuixuki— aka

22 Noemín jawen babawan Rut kemakin yuikin:

—Peki. Min en bake keskawen taea jau mia ichakawayamaxanunbun juni betsan bai anu dayai kayamaxanwen. Boozin dayadu ainbuaibube besti kakin xekiwan cebada mexkan tupikin ichawakubainxanwen— aka

23 jawen yayabe jiweyuxun Boozin dayadu ainbuaibube dayakunkaini ma xekiwan cebada tsekakin keyutan ja kachu xekiwan trigo tsekadiaibu xekiwan trigo mexkan nidi ika jenebainaibu tupikin ichawadiakubaini ma tsekakin keyuabun Boozin bai anu Rut ana kamaken