RUT
Israelin enabu juni betsa Elimélec jawenabube Moab mai pakea betsa anu jiwei kanikiaki, na janchadan
1
1-2 Israelin enabu unanti wanikabun jatu medabewakubainaibun jabiatiandi ana ui ikamawen taea jatun bai yunu beneama eskadabeswen taea Israel mai pakea jidabi anu dasibi bunijaidabaunaibun Judán enabu juni betsa jawen kena Elimélec mae Belén anu jiwebia buniwen taea Jene Jordán pukebainkin jawen ain Noemí inun jawen juni bake dabe Mahlón inun Quilión jatu xetukunamakin jatu jiwemayunun ika Moab maiwan pakea betsa anu bui jikimabu Belén anua buimabu jatube jiweabuwen taexun: “Efrata nawabuki”, iwanan, jatu kenakubainibukiaki.3 Jadi kaima jawen bene Elimélec mawakin Noemí inun jawen juni bake dabe jatu xunuinma jiweyuabun 4 janua jawen juni bake dabe ewatan jabiadia Moab ainbu dabe bimabu jatun kenadan, Orfá inun Rut inikiaki. Janua jatu jaska waimabu ma 10 año kaya 5 jabiatiandi Noemín juni bake dabe Mahlón inun Quilión mawashinabun Noemí beneuma inun bakeuma inun babauma nuitapai jawen babawan dabebe besti jiweyuabun
Noemí Rutbe Belén anu chintunikiaki, na janchadan
6 jawen mae Belén anu Jehován yunu ma jatu ana pawaxunima Moab anuxun Noemín bana ninkatan 7 jawen mae Belén Judá mai pakea anu ana chintuin juaya jawen babawan dabetun chibain jatun mae anua kainbaini bui 8 jabetan bai tanabainaibu Noemí niti itan jawen babawan dabe yuikin:
—Ebe kama chintunbaini matun ewan jiwe anu jiwei budikanwen. Ea inun en juni bake dabe man nuku duawaima keska wadiakin jau Jehován matu duawadiakubainxanunwen. 9 Jehován matu medabewaya juni pepa benewatan man unanuma jabe jiwetiduki— jatu watan nichinkin jatu tantsu adabebia ja dabe kaxai taekin 10 Noemí yuikin:
—Man en bake keskabuun, jaskamaki. Chintundibainkanwen. ¿Jaskai man ebe juai? Ana en bake bitidumaki, jabu man benewatidudan. 12 Matun ewan jiwetan chintunbaini budikanwen. En ma yuxabuwen taea en ana beneyatidumaki. Jakia man jaska shinankin manatidudan, na jabiatian tsuanda ea bitan badikis ea chuta juni bake en matu bixuntidudan, en jaskayadan, man manakeanaii. 13 ¿Ja dabe ewaibun jatu bene wakatsi man manatidumen? ¿Man beneumas jiwexun man manakubaintidumen? Jaskamajaidaki, en bake keskabuun, Jehován ea nuitapawakin ea bika tenemaikiki. Jaska enas en tenepanan matu dikabi man nuitapai uin en bika tenekatsi ikamaki— jatu wa
14 jabu ana jawen nui kaxakubaini nesetan atimas Orfán shinan betsawatan jenebainkatsi Noemí tantsu abaini kaya jakia Rut ja kama bashikutan jabe kaya 15 Noemín ana Rut yuikin:
—Uinwen. Min dai en babawan betsa jawenabu anu inun jawen mekenika yushibubu anu ma chintunkainikiki. Miadi jabe kaditanwen— aka
16 ninkamas Rutin kemakin yuikin:
—Mia dapaxkakin en mia jenebaintanun ana ea yunuyamawe. Min janu kai anu en mibe kaii. Janu min jiweai anu en mibe jiwediaxanaii. Minabu enabudi ixanikiki. Min mekenika Diosdan, en Dios idiaxanikiki. 17 Min mawai anuadi eadi en mawadiaxanaii. Janu mia maiwaibu anu jabianudi ea maiwatidubuki. Nun mawai anu besti nun paxkatiduki. Jakia ja en mia yubaxu en akamaken ea ichakajaidawakin jau Jehován ea kupixanunwen— atan
18 jaska Rutin shinan pewaxu Noemín unantan jau jabe kanun ana jawa yuiama jabe kai 19 jaska wabaini jabetan bai tanakubaini atimas jawen mae Belén anu kematan jikikaini kaya tsuanda uintan kakabaunaibun ainbuaibun yuikin:
—¿Jadan, jabiamen, Noemínan?— ikeakeaibun
20 jatun jancha ninkatan Noemín jatu yuikin:
—Ana ea Noemín wankin kenama ea kenakinan, “Mará” ea wakanwen, “Muka Ainbu” wakinan, Dios kushipajaida dasibi binuatun muka keskawen ea bika tenemakin mata waimakidan. 21 Nenua beneya inun bake dabeya en kainkainiki. Natian nenu ana juidan, jaska Jehován bechipaikin ea akima beneuma inun bakeumadi en chintunkidanaii. Jaska wakin Jehová kushipajaida dasibi binuatun ea nuitapawakin yumanwankin ea kupiniwen taexun man ea ana “Noemí Batapa” wakin kenatidubumaki— jatu wa
22 jaskakunkidani jawen babawan Moab nawa Rutbe Moab anua chintunkidanidan, janu jatun xekiwan betsa cebada tsekakin taewaibutian jawen mae Belén anu Noemí jikitushi jaskanikiaki.