Boozin Rut binikiaki, na janchadan
4
jaskashini chipu Booz Belén kenekin kebenbaunibu anu jawen jikiti xui dapi janu junibu ichamisbu anu jikitan tsaua ja junikidi Rut Boozin yuishinai Rutin benen enabi kayabi jikikidanai Boozin bechitan kenakin:—Xexei, juyuwe. En mibe jancha jayaki. Nenu tsauyunuwe— aka jui jabe tsauaya 2 januxun jawaida jau jabun tsauxun ninkai benunbun 10 anibu unanepabu Boozin jatu kena bea jatube tsauxun ninkaibun 3 Boozin jawenabu kayabi kenaxu yuikin:
—Eskawen taexun en mia akaidan, min unaiin, nukunabi kayabi Noemí Moab anua chintunkidanshinadan. Jawen bene Elimélecin bai Noemín jawenabu inankatsi ikikiki, jawen pei bikatsidan. 4 ¿Jaskadamenkainan? min ninkaya en mia yuiaidan. Min bechipaiaidan, min bitiduki. Na mapubaunabu inun anibu unanepabu nukube tsauxun ninkakin uiainbun documento watan biwe. Ea en Elimélecin enabi kayabibiadan, ea binui min jawenabu kayabijaidawen taexun mian dukun ja bai min bitiduki. Min biama ea yuiwe. Jakia mia kachudan, en eaki. En ean bitiduki— aka
—Peki. Jaskakenan, ean en biaiin— aka
5 Boozin xabakabi banabimakin yuikin:
—Na jaskadan, tapinkin shinanwen, ikisdan. Noemín bai min biaidan, Elimélecin bake Mahlón ma mawaimaken min juni bake waxuan kaian ewatan ja bai jawena ixanaiwen taexun ja baiyabi Moab nawa Rut min bixundiatiduki, ainwankinan— aka
6 jaska wa ninkatan kemakin yuikin:
—Jaska min ea yuiayadan, en bitidumaki. En epa mawakin jawena ea jenexunbainxanai en benukin itimaska wakatsis ikamaki. Jawada en itidubia en mia jenexunai mian Elimélecin bake Mahlónen bai inun jawen ain mian bixanwen, ainwankinan— aka
7 ma jaskakubidanabu jatun beya chibankin jaska jawenabu kayabitun danankin jatu yunuaya betsan axuntidu jawen mabu kasmai jawen mae kasmai jawen bai peiwen inankatsi ikin jatun bichi tae uke betsa pekaxun juni betsan ma biantidu inanpaunibukiaki, dasibibun uiainbun ja shinanmati wakinan. Jaska beya jayawen taexun 8 jatun ja bai danankin jawen bichi tae uke betsa pekaxun Booz inankin yuikin:
—Ninkakin ikis man uianyan Elimélec inun jawen juni bake dabe Quilión inun Mahlón jabun mae inun jabun bai keyu dasibis Noemín ea inain en biaii, peiwenan. 10 Ja dikabi ninkakin man uindiaya jabun bai jawen bene Mahlón isanman kena jau benuyamanun ja juni bake waxunkatsi Moab nawa ainbu Rut en biaii. En jaska waxuna nuku anua Mahlónen kena tede itidumaki, jawenabu jakimatidubumadan. Jaska en jancha dasibi en matu yuixu ninkatan tsuabuda man jatu yuitidubuki— jatu wa
11 mapubaunabu inun anibu unanepabun kemakin Booz yuikin:
—Jaa. Nun ninkaxuki. Israelin enabu xuku betsa betsapabu pai taekin nukun xenipabu Israelin ain dabe Raquel inun Lían juni bake ichapa bikubainibu keska wakin ja ainbu min jiwe anu min bixanaidan, Jehován jau duawakin pepa wakubainxanunwen, bake ichapa bimakinan. Ja inun, nukun mae Efrata Belén anu juni pepa jiwexun jatu uinmakubainxanwen, jau dasibibun mikidi pe shinankubainunbunan. 12 Nukun xenipabu Judá inun Tamarin juni bake Faresin bake midima bawani keska wakin ja ainbuki Jehován jau mia bake ichapa inankin nidi amadiakubainxanunwen— akabu
13 jatu jaska wabaini kaxun Boozin Rut ainwainmaxun jabe jiwexun mekubainaya Jehován medabewakin bake bimaima Rutin juni bake kainxunikiaki.
14 Jaskai ainbuaibun ninkatan Noemí yuikin:
—Natian ja bakeishta ewatan jau jatun mia mekexanun Jehován mia baba inanxuwen taexun Jehová kenwanankanwen. Min baba ewaya jawen kena Israelin enabu dasibibun unankin jau pawabaunxanunbunwen, kenwankinan. 15 Min yuxabuai ja bake yumekin mia jatun metsunxun mia benimawakubainxanikiki. Min babawanen mia bechipaijaidakin mia babayawakin 7 juni bake jaya keskai binuikiki— akin jaska yuikin Noemí shinan chankanwanbu
16 jawen baba xadatamexun yumewakin jawen babawan Rut medabewakubainaya 17 ainbu ja dapi jiwebaunabun uinkin yuikin:
—Uinwen. Noemínan, ma ana bakeyaki— akubainaibun, atimas jawen kena kenaxunkin: “Obedki”, anibukiaki. Obed ewatan bakewa jawen bake betsa Jesé inikiaki. Ja Jesé ewatan bakewa jawen bake betsa nukun xanen ibujaida David inikiaki.
Xanen ibu Davidin xenipabu eska tananibukiaki, na janchadan
18 Judán juni bake Faresin enabudan, eska tanakubainibukiaki.
Faresin juni bake betsadan, Hesrón inikiaki.
19 Hesrónen juni bake betsadan, Ram inikiaki.
Ramin juni bake betsadan, Aminadab inikiaki.
20 Aminadabin juni bake betsadan, Nahasón inikiaki.
Nahasónen juni bake betsadan, Salmón inikiaki.
21 Salmónen juni bake betsadan, Booz inikiaki.
Boozin juni bake betsadan, Obed inikiaki.
22 Obedin juni bake betsadan, Jesé inikiaki.
Jesén juni bake betsadan, David inikiaki.