Jehován Gedeón katukin kenanikiaki, na janchadan
6
Ja 40 año keyukainaya jaska Jehován jatu nemani keska jiwekin akama jatu uianmaya keska Israelin enabun ana chakabukubainaibuwen taexun Madián nawabun 7 año Israelin enabu jau jatu ichakawakubainxanunbun Jehován jatu yunukin jeneimaken 2 jatu ichakawakubainkin pikukubainaya Israelin enabu Madián nawabuwen datei mati tenanman inun, maxax tanpe medan inun, janu tsua katiduma bikajaida anu janu juneti waima jadi junea Israelin enabu jiwekubainkin 3 janu jatun yunu banaibu tibitian Israelin enabun bai waxun yunu banaimabu ma jushin kaniaya Madián nawabu inun Amalec nawabu inun nawa betsa badi juaikidia bexun yumetsukin jatu detenun ika bebidan bebidanpaunibukiaki. 4 Israelin enabu mai pakea tibi anu jatun tadi jiwe puntetan yunu banakubidanaibu jatu yumetsunkin jatu keyunkubidankin Gaza anu jatu jenenkin Israelin enabun ana jawa pitidubumawakin jatun chaxuwan inun jatun ina awa inun jatun asnodi jawenchains yumetsukin jatun piti yamawapaunibukiaki. 5 Jatu piankin biankubainun ika shini midimajaida bea keskai jatun tadi jiwe inun, jatun inabu inun, jatun camello midimajaida tsuan tanatidubuma iwekin jatun piti yumetsuxun jatu pimakin bai dasibi chakabuwakin jatu texe jenexunama ipaunibukiaki. 6 Madián nawabun jatu ichakawaibuwen taea Israelin enabu nuitapa chakayamakubainkin atimas shinanbaun Jehová medabe yukakin:7 “Madián nawabu nemaxunkin nuku medabewawe”, akin Israelin enabun Jehová ea akabu 8 jaska wabu jatu ninkatan Jehován jawen jancha yuixunika jatunabu betsa jatu anu yunua taxnitan ja Jehován jancha yuixunikan jatu yuikin: “Eska matun xenipabu Israelin mekenika Dios Jehován matu yuiai matu yuinun ea ninkakanwen: ‘Egipto anuxun matun xenipabu dayadu wakin tsuma wanibu jiwekubainaibu paxawakin en jatu taxnimabidaniki. 9 Egipto anua en jatu mebin bestiama jakia jatu ichakawaibu nemakin en jatu maemaxundianiki. 10 Matun ibubu yuikin: Matun mekenika Dios Jehovádan, en ea bestiki. Janu man jiwexanai anu Amorreo nawabun yushibu betsa betsapabuwen dateyamaxankanwen, akin matun ibubu en jatu yuibianiken na jabia mai anu jiwexun man jatun bakebun man ea ninkakatsi ismaki’, akin jawen jancha yuixunikan jatu yuinikiaki.”
11 Janua mae betsa Ofrá anu juni betsa Abiézerin enabu Joás ika anu Jehován nai tsuma kushipa taxnia ji ewapa kushipa naman tsaua jabianudi janu jaki vino wanun ixun uva bimi pema pema akin jawen jene shudu shudu amisbu anudan, jau Madián nawabun uinyamanunbun junetan Joásin juni bake Gedeónen ja mesti xekiwan tsekakin maiki kusha kusha akin xemeaya
12 Jehován nai tsuma kushipatun jawen yuda Gedeón uinmakin yuikin:
—¡Juni mesema kushipatuun, Jehovádan, mibeki!— aka
13 Gedeónen kemakin yuikin:
—Xanen ibuun, eki sinatayamawe. Jakia eadan, en jaskamaki. Jehován nuku medabewaya jaskakin nuku ichakawakanimenkain, Egipto anua Jehován nukun xenipabu paxawabidani nuku yuimisbu inun jawen kushipa unanmati dami betsa betsapa uinkubidanixun nuku yuikin jancha wamisbudan, ¿ikis janimen? Jehován nuku ma jenebainimaxun Madián nawabu nuku yunuima nuku ichakawakanikiki— aka
14 beiskin Jehován yuikin:
—Minabu Israelin enabu medabewakin Madián nawabun kushipa mebinkin jaska min kushipa jayawen jatu medabewadiwe, ean en mia yunukin nichiainwen taexunan— aka 15 Gedeónen ana kemakin yuikin:
—Xanen ibuun, ana eki sinatayamawe. Jacobun bake Manasésin enabu medan enabus jiwebaunabu jawa jayabuma inun en epan juni bakebudan, en jatun betsa maxkuki, dayadu keskadan. ¿Jaskatan Israelin enabu en jatu medabewatidumen?— aka
16 Jehován ana kemakin yuikin:
—En mia medabewakubainaiwen taexun juni bestichai maema keska wakin Madián nawabu dasibi min jatu maemaxanaii, matun maiwan pakea anua jatu nichinkinan— aka
17 januxun Gedeónen ana yuikin:
—Min ea bechipaiaidan, ea uinma kayabiwe. Jaska jabia min Jehová ebe janchai ikimenkainan, ea xabakabi unanti wamakin jawen unanmati dami ea waxunwen— itan 18 —Jawada mia inankuinkatsi en mia bixuin kai en chintunkidanai na jabianuxun ea manayuwe— aka
Jehován kemakin yuikin:
—Peki. Nenu jabianuxun en mia manayuaii— aka
19 Gedeón kaxun cabra bake babupa tesenxun dashpetan bais bais axun pichan baya 20 litro xekiwan dudu pepa tanaxun jawen xaxa watiuma misi ichapa watan januxun nami chichanki nexetan jawen jene kentiki manekin juxketan misiyabi dasibi ji ewapa kushipa naman buxuan 20 Diosun nai tsuma kushipatun yunukin yuikin:
—Ja mishki anu nami inun misi xaxa watiuma manchinxun jawen jene maxu awe— aka jaska yunua keska wakin Gedeónen axuan 21 Jehován nai tsuma kushipatun ja nami inun misi mishki mamaki manchinxuna jawen mestenti jawendua debuwen timaya ja mishki anua chi jede ji ikin menukin keyuaya janua Jehován nai tsuma kushipatun jawen yuda junei inakainaya 22 jaska Jehován nai tsuma kushipatun ma axuan Gedeónen uintan datekin yuikin:
—¡Yuu! Jehováan, min nai tsuma kushipabe beisinanamekin en uinxuki, mawamadan— aka
23 Jehován kemakin yuikin:
—Dateyamawe, min mawamakidan. Ewen taea unanuma jiwekunkainwen— aka
24 januxun Gedeónen kenwanti chi tapu Jehová bena waxuntan kenakin: “Jehovádan, nukun unanumaki”, anikiaki. Abiézerin enabun mae Ofrá anu ja kenwanti chi tapu natian uintidubu jayaki.
25 Chipu jabias meshu medan Jehován Gedeón ana yuikin:
—Min epan ina awa mapua anua jawen ina awa bene ja kachu kaini 7 año jaya katutanwen. Jaska watan Baal kenwanti chi tapu min epa jaya tekekin di atanwen. Ja dikabi Baal chi tapu dapi ji dami kenwanmisbudi nia dedakin di adiatanwen. 26 Jaska watan min mae kenekauana dapi mati pishta anuxun min mekenika Dios Jehová kenwanti chi tapu bena wawe. Jaska wakin pewakin keyutan ina awa bene katuxun min ma bitana tesentan Baal ji dami min dedaxu ja kadu watan ja kaduwen ina awa bene ea menuxunkin keyuxunwen— aka
27 jaska Jehován yunua anun ika badidi akama jawen epan enabu inun jawen mae anu junibuki datekin meshu medan jawen dayadubu 10 iyuxun jaska Jehován yunuxu keska axunkin dasibi jatubetan Gedeónen ashianyan 28 penama bestenbaun Baal kenwanti chi tapu di ika inun Baal ji dami deda yudabun uinkin ja dikabi chi tapu bena waxun ina awa tsuabunda menukin keyushinaibu uindiai
29 yuka ikeakei: “¿Tsuan nuku jaska wanmen?” ikin benai yuda tibibube yuka ibaunkin atimas Gedeónen ashiain ninkakin tapinbain jawen jiwe anu buxun jawen epa Joás yuikin:
30 —Min bake nedi kainmawe. Baal kenwanti chi tapu tekekin di atan ja Baal dami chi tapu dapi nia ma dedawen taexun nun tenain jau mawanunwen— akabu
31 jakia bea mapubaunabu nemakin Joásin jatu yuikin:
—¿Yushibu Baal yaushi man detenamexuniyuamen? ¿Man medabewai daka ikai? Ja Baal chanima Diosken tsuabunda Baal detenamexunaidan, penadiama ibubis tenanmeikiki. Baal jaska Diosmenkain, jamebi jau jatu tenanunan, jenekanwen— jatu wanikiaki.
32 Joásin yuikin: “Ja Baal Dios kayabidan, jau jamebi nemakin detenunwen”, ixunwen taexun Gedeón kena bena wakin: “Jerubaalki”, anibukiaki, nukun janchawenan, “Baal Nemanikadan”, jatun Baal chi tapu teke keyushinawen taexunan.
33 Janua ana badi betsatian jatun piti pianun ika Madián nawa dasibibu inun Amalec nawabu inun badi juaikidia nawa betsa jiweabudi jusi janus ichai keyutan Jene Jordán pukebidan napanpa betsa Jezreel anu jatun tadi jiwe midima puntebaunabun 34 januxun Jehován Yushinen Gedeón kushipa wakin achiawen taexun jawenabu Abiézerin enabu jau jaki ichai benunbun chaxuwan maxun pudi atiwen jatu chan chan akin 35 Manasésin enabu dasibi jau yuixuntanunbun juni betsabu yunua buxun jatu yuikubaunabu ninkatan Gedeón anu bei ichaibun ja dikabi Aserin enabu inun Zabulónen enabu inun Neftalín enabu jau yuidiaxunbauntanunbun juni betsabudi Gedeónen jatu yunua buxun jatu yuidiabaunabu ninkatan Gedeón anu bea ichai keyuabun
36 januxun Dioskidi shinanbiai date duakabikin Gedeónen Dios yuikin:
—Jaska min ea chanima yunukin Israelin enabu medabewamakin mekemaimenkain min ea yunushina keska akatsi 37 ja dukun en mia unanti waii. Manananxun januxun xekiwan katamisbu anuxun chaxuwan bichi daniya ma badi kaya en datain kaii. Januxun penama kaxun nibiwen jawen dani besti mechaken janua mai mechama uintan min ea Madián nawabu maemamakin Israelin enabu min ea jatu mekemaxanai jaska min ea yuishina en ikunwanxanaii— aka
38 jaska Gedeónen yubashina Jehován axuan penama Gedeón bestenkaini kaxun mai tsusin inun chaxuwan bichi jawen dani besti mecha uintan bixun ja bichi jawen daniki nibi mata kenchaki tsinikin ja jene kencha matawanikiaki. 39 Jaska waxunbia Gedeónen ana Jehová jancha wakin yuikin: “En mia ana ea akai eki sinatayamawe, jaska unanmati betsa en ana uinkatsis ikin en mia ana besti wakin yukaidan. Badi kaya chaxuwan bichi daniya en ana datanken ana penama jawen dani besti tsusin inun mai besti nibipan mecha wa en uinkatsis ikaii. Jaska uintan min jancha en ikunjaidawatiduki”, aka
40 jaska Gedeónen ana Jehová yukaxu meshu medan uinmakin Jehován ana axuan penama bestenkain Gedeónen chaxuwan dani mechama janua mai besti mecha Gedeónen uinikiaki.