2 januxun Jehován Gedeón yuikin: “Juni ichapajaidabu min jatu iweshinaki. Madián nawabu en jatu detekin keyumaya: ‘Nukun kushipawen nun jatu detekin keyuxuki’, iki ea kenwanma ibubis kentidubuki. 3 Jaskatidubuken ja junibu eska jatu yuiwe: ‘Tsuabuda man dateaidan, matun jiwe anu budikanwen’, jatu wawe”, aka jaska yunuxu keska Gedeónen jatu yuikin unanti wa janua 22,000 junibu chintunbainaibun 10,000 junibu besti bashikui niti ikabun 4 jaska jatida bechipaiama Jehován ana Gedeón yuikin: “Na juni ichapajaida jayayuabuki. Jau unpax anunbun jatu iyuwe. Jadixun mia jatu unanti waxunkin tsuabuda mibe buaibu inun mibe buabuma en mia unanmai kaii”, aka

5 unpax amakin jene anu Gedeón jatu iyua Jehován ana yuikin: “Jabun unpax akin jatun mekenen beatan kamanen amis keska wakin taxu taxu akaibu inun jabu danti itan denikain akaibu jatu paxkawe”, aka

6 jau unpax anunbun Gedeónen jatu yunua unpax akin 300 junibun mekenen beatan akin taxu taxu akaibun janua jatidibu danti ixun unpax akaibun 7 jaska waibuwen taexun Jehován Gedeón ana yuikin: “Na 300 junibuwen en matu mekexanaii, Madián nawabu maemakin keyukinan. Ja jatidibudan, jatun mae anu jau chintundibaintanunbun jatu yunuwe”, aka

8 jatun mae anu jau chintundibainunbun jatu yunutan jabiatiandi Gedeónen jatu yuikin jatun shumu ichapa inun jatun chaxuwan maxun pudi ati jatu yuka jaki yaushiama inanbu bitan Gedeónen jatu nichian buabun ja 300 junibu ma jatu katukin bashia napanpa manankidi maniabu jakia Madián nawabu napanpa anu jiweabun

9 jabias meshu medan Jehován Gedeón yunukin yuikin: “Beniwe. En mia jatu maemamaiwen taexun Madián nawabu anu jatu detei bukanwen. 10 Jakia jatube detenamei min dateaidan, min dayadu Purábe ja dukun jatun tadi jiwe puntebaunabu dapi kaxun 11 jaska janchaibu junexun ninkatanwen. Jaska janchaibu jatu ninkatan jatu detenun ika min janu shinan chankanxanaii”, aka

ninkatan Madián nawa janu kesubaunabu dapi jawen dayadu Purábe Gedeón kakunkainaya 12 janu Madián nawabu inun, Amalec nawabu inun, nawa betsa badi juaikidia beshian pabaunkin napanpa jidabi keyubia maninibukiaki, shini midima keska maniabu inun jatun camello midimaya ianenwan kexa mashiti tsuan tanatiduma keskadan. 13 Madián nawabun tadi jiwe puntebauna dapi kemaxun Gedeón ninkatushiaya uxa namakidan bestenxun detenamenikan jawen jaibu yuikin: “Uxa namakinan, eska en uinxuki. Xekiwan betsa misi tudu ewapa tadamekidankin nukun tadi jiwe puntebaunabu anu tadi jiwe bestichaiki jaki teakin tatu aka kai di ikai en uinxuki”, aka

14 jawen jaibun kemakin yuikin: “Ja min namaxudan, jawa betsa min uinxu dabanen min ikai. Jakia Israelin enabu Joásin bake Gedeónen deteti machatu chaipa kenujaidaki. Madián nawabu inun dasibi jatube jiweabu Diosun Gedeón jatu achimaken nuku detekin keyutidubuki”, aka

15 jaska namakidan bestentan jawen nama jawen jaibu yuiai ninkatan Gedeónen Jehová kenwantan jawenabu Israelin enabu anu chintunkain jatu yunukin yuikin: “Madián nawabu dasibi Jehován nuku jatu maemamaikiki. ¡Ibaunankanwen!” jatu watan

16 jawen 300 junibu paxkakin xuku dabe inun besti jatu watan juni tibi chaxuwan maxun pudi ati inun shumu xaka Gedeónen jatu inan dasibibun shumu medan bin dekutan junexun buaibun 17 Gedeónen ana jatu yuikin:

—Madián nawabun janu jatun tadi jiwe puntebaunabu kexa betsaudi en binui kaya yusiudi inun yusmaudi xuku dabe bukanwen. Jaudi jikitan ma en binu pewaken jabias en ikai keskadiai matundi ea mawai jabiaskadi abaunkanwen. 18 Ea inun en jatube kaibetan chaxuwan maxun pudi ati chaan chaan nun akaya jabiaskadi matundi adiatankanwen. Jancha kushipawen yuikin: “¡Jehová inun Gedeónwen nun maemaii!” ixankanwen— jatu wa

19 100 junibu xuku betsa Gedeónbe bui tadi jiwe puntebaunabu kexa betsa ukedi ikabu detenamenikabu jatun jatu uinxunai betsa yamenapun maeaya Gedeónen jatubetan chaan chaan akin shumu tsumabainabu pusatan jatun bin chaxawakin taewaibun 20 januxun ja xuku dabetundi jatu ninkatan jatun chaxuwan maxun janus pudi akin chaan chaan akin shumu tsumabainabu pusadiatan jatun bin chaxawadiakin dasibibun meken yusmaudiawen bin chaxai sanankin meken yusiudi chaxuwan maxun pudi ati bukin jui kushipawen sai ikin: “¡Jehová inun Gedeónwen nun detenameaii!” ikaibun 21 Israelin enabu jatu kexebauna pes mapuxun manaibun Madián nawa detenamenikabu dasibi bestentan sai sai iki datei paxaibun 22 jabiatiandi 300 Israelin enabun chaxuwan maxun pudi ati chaan chaan akin jeneabumaken Madián nawabu Jehován jatu janubi detenamemaya jabu paxai Bet-sitá unu mae betsakidi bui Sererá baikidi bui maiwan pakea Abel-meholá dapi anu mae betsa Tabat dapi buaibun

23 Israelin bakebu Neftalín enabu inun Aserin enabu inun Manasésin enabu dasibibu Gedeónen jatu yunukin jau Madián nawabu chibanbain detenunbun 24 juni betsa betsapa Gedeónen jawen jancha jatu bumakin Jacobun bake Efraínen enabu maiwan pakea mati matipa mae tibi anu jatu yunukin: “Madián nawabu detei butubaintankanwen. Janu pukei buaibu bebunkidi Bet-bará anu kexekin inun Jene Jordán dasibi anu pukebaindiatidubu tibi kexekanwen”, jatu wa jaska Gedeónen jatu yunua bukubaunkin jatu yuikubaunabu ninkatan anibukiaki. 25 Jatunabu detekubainkin Madián nawa xanen ibujaida dabe jatun kena Oreb inun Zeebdan, Oreb achikinan, mishki kedan kedanpa dapixun achitan tenanibukiaki. Natian ja mishki kedan kedanpa nun unainan: “Orebin Mishki Kedan Kedanpaki”, amisbuki. Jamen xanen ibu Zeeb achixun tenankinan, januxun uva tsinikin vino wamisbu anuxun ja mae anuxun anibukiaki. Jabun Madián nawabu chibankubainkin detetankin chintunbidankin Orebin buxka inun Zeebin buxka textebainkin bukin Jene Jordán ukedi Gedeón anu buxunibukiaki.