Eska Débora inun Barac kantanibukiaki, na janchadan
5
Jabias xabatian Débora inun Abinóamnen juni bake Barac kantai eskanibukiaki:2 “Israelin enabu anu ana nukube detenamenun ika beaibun
junibu man detenamenikabu nun matu kena
ichapa jawa dateama jawaida yunu bedubidani man beshianbuwen taexun
dasibibun Jehová kenwanankanwen.
3 Yununikabuun, Jehová en kantaxunai ea ninkakanwen.
Xanen ibu bexmasbuun, Israelin enabu mekenika Dios en kenwain ea ninkakanwen.
4 Jehováan, mia bebunan, Seír anua taxnikidan ja Edomnen mai pakea anua min kainkainaya
mai pacha sakuaya nai anua tuis tuis ikaya
nai kuinen ui ichapajaida tuekin min imaniki.
5 Xanen ibuun, min juaya mati matipa mai pacha sakuaya
Diosuun, Israelin enabu mekenika mia bebun Mati Sinaídi mai pacha sakuniki.
6 Anatin bake Samgar unanti wanikan jatu yusianyan Héberin ain Jael jiweyuken
jabiatiandi Israelin enabu main bukubaini
bai jaxpa xabakabi anu jikiabuma
bai jaxu chintun akeakekainawen datei june buaibun
7 datei mae pexeishta anu Israelin enabu jiwekatsi ikabuma
jaskawen taea ea en Débora xanen ibui unanti wanikanun ika en taxnikaunimaki,
Israelin enabu en jatun ewadan.
8 Yushibubu bena katutan nukunabun kenwainbu
jabiatiandi mae ewapa mishkiwen kenekauana jikiti xui anua detenameaibu
jakia 40,000 Israelin enabu anu jashi bestichai inun jawen pia nemati mane bestichai tsua jayama ikimaki.
9 Israelin enabu xanen ibujaidabu jau nukuki sinataibube jatube detenamei benunbun en jatu kena
jabun ea ninkatan bei ichashinabuwen taea eadan, en juinti jidabiwen en jatuwen benima chakayamaii.
Jaskaken dasibibun Jehová kenwanankanwen.
10 Xanen ibu peiyabu asno juxupaki katsaumebainmisbu inun,
tadi mai bebekanti pepajaida anu tsauabu inun,
main bui jatun taewen mapumisbu Diosun kushipakidi jatu yuikubainkanwen.
11 Janu unpax biaibu anu mane mimawati chadun chadun amisbu anuxun
jaska Jehován jatu maemashina inun
jaska Israelin enabu mae pexepishtabia jatun xanen ibubun jawenabubetan
Canaán nawabu detekin jatu maemashinakidi
dasibi jatu banabimai chanikubaunkanwen.
12 Bestenwen. Déboraan, bestenwen.
Bestentan jaska washinabukidi jatu kantaxunwen.
Abinóam juni bake Baracneen,
miadan, benikainkin detenamekin tsuabuda min jatu achishina jatu iyuditanwen.
13 Januxun nawa kushipabube detenamenun ika
Israelin enabu ichapa manananua detenamenikabu butubidanaibun
nawa detenamemisbu maemanun ika
ewen taea Jehován detenamenika butubidanshinabuki.
14 Jacobun bake Efraínen enabu junibu jatiditun Barac medabewai natukan napanpa anu butuaibun
jatu ichundi Jacobun bake Benjamínen enabu detenamenikabu Barac medabewai butudiabun
janua Josén baba Maquirin enabu xanen ibubu Barac medabewai butudiaibun
januadi Jacobun bake Zabulónen enabu xanen ibu bexmasbu
Barac medabewai butudiaibun
15 ja dikabi Jacobun bake Isacarin enabu xanen ibubu Débora banawabidani bekin
jawen detenamenikabu jabun medabewai Barac ichun kakin natukan napanpa pukebainkin
Canaán nawabu jatu detei buaibun Jacobun bake iyua
Rubénen enabu anua xanen ibu betsabu juinti kushipa jayabiaken jatukidi yuikin:
16 Chaxuwan mekenikabun jawen jiwe anuxun ina chaxu kena ninkabidani bebiamisken
¿jaskai nuku ninkatan beabumamen? ikaibun
jakia Rubénen enabu medanua xanen ibu betsabu datediashinabukiaki.
17 Jene Jordán ukedi kexa betsa anu
Jacobun bake Galaadin enabu jiwea Barac medabewai beabumadiki.
Jatun xaxu ewapa chaipa anu Jacobun bake Danen enabu
jatun xaxuwen besti nui bashikua
Barac medabewai buabumadiki.
Ianenwan anu janu xaxu keti amisbu anu
Jacobun bake Aserin enabu ianenwan kexa anua Barac medabewanun ika
jawa e ibaunama bashikua buabumadiki.
18 Jakia Jacobun bake Zabulónen enabu inun jawen bake Neftalín enabu debutidubu shinain
mesejaidabiai Canaán nawabu mananan jiweabube detenamekin Barac medabewashinabuki.
19 Janua Taanac anu xanen ibubu jawen detenamenikabube bei
mae betsa Meguido jatun chacha unpax betsa betsapa dapikexun jatu detetan jatun mabu binun ikaibun
Canaán nawa xanen ibubu bea detenametan
jatun plata pei jexe inun mabu pepa binun ika bebia jawa biama benushinabuki.
20 Nai anua bishin jawen bai tanabidankin
Sísara nemakin bishi chaxa kushipawen jawenabu deteaibun
21 Paxku Quisónen detenamenikabu dasibi jatu tsispubainkin
kushibainkin bukin jatu yamawashinaki.
¡Jatu jaska washinken jawa punu nukai chintuanma ikubainankanwen!
22 Detenamenika kushipabu caballoki katsaumea
caballo tae badux badux ibidani kushibidanbidanaibun
23 Jehován nai tsuman jatu yuikin:
‘Mae Meroz inun janu jiweabu chakabujaidabuki.
Israelin enabu jawa dateama detenameaibu Jehován jatu medabewaya
Meroz anu jiweabu ichabidan jatube detenamekin
Israel medabewai beama ishianbuwen taexun Jehován jatu yupua
jau nuitapa chakayamaxanunbunwen’, akin Jehován nai tsuma kushipajaidatun jatu banabimakubaunshinaki.
24-27 Unpax Sísaran yuka ina awa chuchu inankin
mane kencha jawenduaki chuchu pepa Jaelin amatan
jaska wamatan meken yusmaudiwen ji kenujaida bitan tsumatan
jawen meken yusiudiawendi jawen dayakin mastamisbu tsumatan
ji kenujaida Sísaran ishpuxkuki timabain unanxubima mastakin jawen buxka pesabain maiki seuwa
jawaida uxayastan Jaelin tae dapi mawai Sísara dabekeakeaketan
janu daka mawashinawen taexun
ja Quenita nawa ainbu Héberin ain Jaelin ainbu betsa betsapabu jatu binua pepaki.
Jael ainbu betsabu binumakin Jehován jau duawakubainunwen,
nukun tadi jiwe anu jiwebaunabu ainbuaibu jatu binua pepajaidadan.
28 Jaskaitian jawen ewan jawen bake Sísara benai jawen nui: ‘¿Jani juimenkain?’ ikin uinti xui anu texunxun uin yuka ikin:
‘¿Jaskai yane jawen caballo tadanti juama nishmaimenkain? ¿Jaskai jawen detenameti caballo tadantiya yane juamamen?’ ikaya
29-30 ainbuaibu betsa unanepatun kemakin jabiaska jawen ewan shinain keskadi yuikin:
‘En ean unanan, jatu detekin keyutan jawada pepa jatu biankin tsisputan ma jatu paxkaxunkanikiki.
Ja detenamenika tibitun ainbu bikin dayadu jatu wakin bestichai inun dabe jatu bibainbainkanikiki.
Jamen Sísaran jatu biankinan, jatun bachi jua juaya kepananyan tashipa betsa betsapaya bikiki,
ja maemanika teyabukukatsidan’, ishianki.
31 Jehováan, dasibi miki sinataibudan, jau jaskai mawai keyukubainunbunwen.
Jakia mia bechipaiaibudan, badi kushipakin chaxa wakin
keyumis keskai jau chaxajaidaxanunbunwen”, iki
Débora inun Barac kantanibukiaki.
Jatu jaska waxunima jabiatiandi ja mai pakea anu 40 año kai Israelin enabu unanuma jiwekubainibukiaki.