4-5 jabiatiandi Israelin enabu ichakawakubainaibun Lapidotin ain Débora, ainbu unanepa Diosun jancha yuixunikatun jancha pepawen yusinkin jatu medabewakubaini Jacobun juni bake Efraínen enabun maiwan pakea mati matipa anu mae Ramá inun mae betsa Betel namakis anu paniwan nia naman uta anu tsaua jatun chakabu pewanun ika beabu xanen ibukin Déboran jatu pepa yusinpaunikiaki. Ma janu tsaua beyani uinmisxun kenakin: “Déboran paniwanki”, apaunibukiaki. 6 Xaba betsatian Jehován ma tapinmaken Jacobun juni bake Neftalín enabu Abinóamnen juni bake Barac jawen mae Quedes anua jau junun Déboran juni betsa yunua kaxun yuitana ma juken Déboran Barac yuikin:

—Israelin enabu mekenika Dios Jehován eska mia yunuikiki, ea ninkawe, mia yuinunan: “Jacobun juni bake Neftalí inun Zabulón enabu xukuabu anua 10,000 detenamenikabu katuxun Mati Tabor anu jatube katanxanwen. 7 Mati Tabor dapi paxku Quisón napaku anuxun mia detekin achinun ika Canaán nawa xanen ibu Jabínen jawen detenamenikabu xanen ibu Sísara jatun caballo tadanti detenamenikabu jawen mapuabu inun jawen detenamenikabu main mapuabuyabi jau mianu benunbun en mia jatu meshui axanaii. Jakia matube detenameaibu man jatu maemaxanaii”, akin mikidi ea yuimashinaki— aka

8 —Ea kaidan, min ebe kaya en mibe kaxanaii. Jakia min ebe kamaken en katidumaki— aka

9 Déboran kemakin yuikin:

—Peki. En mibe kaxanaii. Man jatu maemaya mia kenwanbuma jakia jau detenun ainbu anu Sísara Jehován yunuxanikiaki. Deteken dasibibun ainbu betsa kenwanxankanikiki— aka Quedes anu Baracbe Débora ma buabun 10 jadixun jau benunbun Zabulón enabu inun Neftalín enabu anu jawen jancha Baracnen jatu buma ninkatan detenamenikabu bebidan bebidanaibu pewakin jatu ichawatan 10,000 detenamenikabube Mati Tabor anu Barac mapekeaya Déboradi jabe mapekeken

11 Moisin ainen epa Hobabin enabu jawen kena betsa Quenita nawabu jawenabu betsa, jawen kena Héber jatu paxkabidanixun Saanaim anu ji ewapa kushipa dapi jatun tadi jiwe betsa betsapa ma puntenibu inikiaki, Quedes dapidan. 12 Mati Tabor Barac jawen detenamenikabube ma mapekeken Sísara banabimabu 13 ninkatan jatu detenun ixun jawen 900 hierro mane caballo tadanti mentsisipa mapubainabu inun jawen detenamenikabu main budiai mapekediaibun jatu ichawatan Haróset-goím anua jatu taxnimabaina xukudakabaini paxku Quisón napaku anu Sísaran jatu bichia 14 januxun Déboran Barac ana yunukin:

—¡Benikain ditanwen! Min Sísara detenun ikis Jehován mia maemamaikiki. Jatu medabewai min mentsisipa detenamenikabu bebun Jehová kaikiki— aka 10,000 junibube Mati Tabor anua Barac machi butebainaya 15 machatu chaipa kenujaidawen Balacnen detenamenikabu jatube detenamekin taewaibun Sísaran caballo tadanti mentsisipabu mapekebainaibu inun jawen main buaibu detenamenikabudi Jehován jatu mesewakin date paepa mistua jaska uintan jawen caballo tadantikia Sísara butui paxai kushikainaya 16 jawen caballo tadantikia detenamenika mapubainaibu inun jawen detenamenikabu paxaibu detenun ika jawenabubetan Baracnen jatu chibanbainkin jatun maewan Haróset-goím anu jikipananbu Baracnen enabun jatu detekin keyukubainkin Sísaran detenamenikabu dasibi jatu tenan keyunibukiaki, tsua jiwemamadan.

17 Canaán nawa Hasor anu xanen ibu Jabín Quenita nawabu Héberin enabube sinatanameismawen taea Sísara jadidi paxai kushikaini Héberin ain Jaelin tadi jiwe anu ma kemaya

18 uintan inun ika jawen tadi jiwe anua taxnikidan Jaelin Sísara yuikin:

—Nedi judiwe, xanen ibuun. Nedi judiwe. Ewen dateama en jiwe anu jikiwe— aka jawen tadi jiwe anu jikia junekin mai bebekantiwen achimaya 19 Sísaran yukakin:

—En unpax manujaidaii. Ea unpax amawe— aka ina awa chuchu buspuai ma bunkashai chaxuwan bichi bishtuki adushinxun bixun bebekanti bepenxun amatan ana achimaya 20 Sísaran ana yuikin:

—Min jiwe xexekaian tsauxun ea uinxunwen. Tsuada juxun mia yukakin: “¿Min jiwe anu tsua juama ixumen?” mia akabu: “Tsua juamaki”, iwanan jatu yuixanwen— itan 21 jin ikidana punu nukatan uxa chakayamaken jawen tadi jiwe punteti ji kenujaidatan jawen mastakin jawen mestenwankin nexamisbu betsa bitan jawen mastatidi bixun Sísara anu unanxubida kakain jawa banawama ja dakanu mebaunkin jawen buxka unantan ji kenujaida Sísaran ishpuxku anu timaxun unanxubima jawen mastakin ji kenujaidawen buxka pesabain maiki seuwa Sísara jawaida mawaken 22 janua Baracnen Sísara benakubidani juaya jaki nukunun ika jawen tadi jiwe anua Jael taxnikain Barac yuikin:

—Nedi judiwe, ja min benai juaidan, en mia uinmaidan— aka Barac jikikain Sísara ma mawa ji kenujaida ishchankamea daka uintan 23 jawen detenamenikabu Israelin enabun detekin keyuabuwen taexun jau punu nukanun Canaán nawa xanen ibu Jabín Jehován datejaidamaya 24 jabiatiandi Israelin enabu ana kushipakubainkin Jabín inun jawenabu ichakawakubainkin atimas jawen mae mishkiwen kenebaunibu tekebain jawen maewanyanbis Canaán nawa xanen ibu Jabín tenankin yamawanibukiaki.