Boquim mae anuxun Jehován nai tsuma kushipatun jatu ja anikiaki, na janchadan
2
Josué mawaimaken Guilgal mae anua Israelin enabu bei Boquim mae anu ma icha maniabu anu Jehován nai tsuma kushipa taxnitan jatu yuikin: “Egipto anua matun ibubu jatu paxawabidanimaxun jatube yubakakin jatu yuikin: ‘Na eska en matube yubakaidan, en matu jenetaskama iki kaii’, iwanan, 2 ‘Jamen matu ikidan, ja nawabu ja jadi mae anu jiweabube jatube yubakataskayamaxankanwen. Jaska inun, jatun yushibubun kenwanti chi tapu tibi teke keyukubainxankanwen. En matu wabidani uinkanwen. ¿Jaskai man chakabube ketaxamea jiwekatsis ikubainkanai? Man jaskaibun en matube yubakani en jakimama ixanaii’, akin en jatu wabianiken en jancha ea ninkama man ea danankanaii. 3 Man jaskamiswen taea matu bebunxun natian na nawabu texe ana jabu en ja matu nichinxunamaki. Matu padankin jabu inun jatun yushibubun bidunwen matu kebenkin akawaxankanikiki”, jatu wai4 Jehován nai tsuma kushipa janchai ma menekainaya janua Israelin enabu juinti nishmajaidatan kaxa chakayamai bis bis ikasima 5 nesebaun Jehová daewanun, iwanan, chaxuwan inun awa ichapa tesenxun chiwen Jehová menukin keyuxunibukiaki. Jaska watan ja mae kenakin: “Boquimki”, anibukiaki, nukun janchawenan, Kaxa Maedan.
Josué mawanikiaki, na janchadan
6 Janu Josué jiwexun jawen jenekin jawen jancha jatu yuishina ninkatan Israelin enabu tibi jatun mae ibubis jau tsumakin ibuwaxanunbun jatu yunua buaibun 7 Josué jiweyuken Israelin enabu Jehová Dios kenwankin duawanibukiaki. Ja dikabi ma Josué ma mawabiaimaken anibu unanepabun jaska Jehová Diosun jatunabu dami waxunkin jatu medabewakubainai uinkubidanibu jiweyuabun Israelin enabu Jehová ninkakin duawakin jeneabuma idiakubainibukiaki. 8 Jakia 110 badiya Josué mawaken 9 Efraínen enabun mati mananan anu Mati Gaas nortekidi Timnat-sérah anu jawen mae anu Josué maiwanibukiaki. 10 Ja dikabi Israelin enabu ma Josuébe jiwekubidanimabu mawadiai keyukubainaibun jabun Jehován kushipa uinibu ma debui keyudiabun chipu kainkubidanshinabu Jehovákidi inun jaska Jehován Israelin enabu medabewakubidani jabun ana jawa unanbuma jiwei taebainibukiaki.
Jehován jancha ana chibankatsi ikama jenenibukiaki, na janchadan
11 Jehován jatu uinbia jaska shinanma Israelin enabun chakabuwakin yushibubu jabun kena tibi Baal ui itsa inun, badi itsa inun, mai pepa itsadan, duawakin jatubetan kenwankin taewai 12 jatun xenipabun mekenika Dios Jehován Egipto anua jatu iwebianiken jabun ninkama ana shinankatsi ikama jenetan ja nawabu jatu dapi jiwebaunabubetan jabun yushibubu duawakin kenwankin Israelin enabun Jehová sinatamanibukiaki. 13-14 Jehová ana shinanbuma yushibubu Baal inun yunu ichapa inun inabu bake ichapa bitidu mekenika yushin jawen kena Astarté kenwainbuwen taea Israelin enabuki Jehová sinatakin jatu dapi jiwea yumetsubu jatu yunukubainaya jatun yunu inun jatun inabu jatu yumetsunkubainaibun jatu jaska wakin jatuki sinataibun jatu ichakawaibu uinbiakin jatu ana nemaxunama Israelin enabun jaskatan jawawen jatu nematidubuma ikubainibukiaki. 15 Janua jatube detenameaibutian bestikima jabu jatu kupimakin ichakawamakubainikiaki, jaska Jehová jatube bebunkidi yubakaima jatu ana medabewamadan. Jehová Diosun Israelin enabu jatu nuitapawabiakin
16 ana jatu medabewanun ixun xanen ibu unanti wanikabu betsa betsapa jatu katuxun taxnimakin yununika kushipabu jatu wa jabun Israelin enabu medabewakin tsuabunda jawenabu ichakawaibu jabube detenamekin ja xanen ibu unanti wanikan jatu nichinxunkubainkin jawenabu Israelin enabu medabewakubainbia 17 jakia ja xanen ibu unanti wanikabun jancha Israelin enabun ninkabuma patapakin Jehován jancha chibanma yushibubu betsa betsapa chibankin duawakin kenwanpaunibukiaki. Jatun xenipabun Jehován jancha ninkakin chibanpaunibu keska akama jatun bai tanama inibukiaki, betsa betsapa chibankinan. 18 Israelin enabu jatu ichakawaibun bika tenei kaxaibu ninkai jatuwen nuikin xanen ibu unanti wanika kushipa betsa katuxun taxnimatan Jehován jatu medabewakubainaya ja xanen ibu unanti wanika kushipa jiwekunkainkin Israelin enabu ichakanikabu jatu nemaxunkubainaya 19 jakia jatun xanen ibu unanti wanika kushipa tibi mawakubainaibun jatun chakabu shinain ana chintuin yushibubu betsa betsapa duawakin kenwain jatun epabu binui chakabu pikui jatun beya chakabu jenekatsi ikama inun jatun juinti kushi pewakatsi ikama ikubainibukiaki. 20-21 Jaskaken Israelin enabuki Jehová sinatakin yuikin: “Jaska jatun xenipabube en yubakabiani ea danankin en jancha ana ninkakatsis ikabumawen taexun yuda betsa betsapabu Josuén nichindiama mawaniken eandi en jatu nichinxunamaki”, ixun 22 jaska jatun xenipabu en jancha chibani keskakin Israelin enabun chibankatsi ikanimenkain, chibankatsi ikabuma daka, iwanan, jatu unanti wakin Jehován jatu uinkin manakubainikiaki. 23 Jaskawen taexun nawa betsa betsapabu Josuén jatu nichinxunama ini jiweabu jatun mai pakea anua Jehován jawaida jatu medabewakin nichinxunama idianikiaki.
***************