—Eska nukun xenipabu Israelin mekenika Dios Jehován ea yuishinaki. Matu yuinun ea ninkakanwen: “Jenewan Éufrates ukedi kexa betsaudixun matun xenipabu Térah inun jawen juni bake dabe Abraham inun Nahor jiwexun yushin betsa betsapa duawakin kenwanpaunibukiaki. 3 Jaskai jiweabun Jenewan Éufrates kexa anu jiwebiaken matun xenipabu Abraham besti katubidankin iwenixun Canaán nawabun mai pakea anu jiwemakubaunkin jawenabu jau pajaidaxanunbun jawen juni bake Isaac en inaniki. 4 Januxun Isaac yumeimaken jawen juni bake dabe Jacob inun Esaú en inandianiki. Jawen juni bake ma ewa dabeabu Esaú mananan Mati Seír mai pakea en ibuwamaniki. Jakia Jacob inun jawen juni bakebu Egipto anu bunibuki. 5 Chipu Egipto anuxun matun xenipabu ichakawaibun Moisés inun Aarón yunutan januxun jawen dateti damiwakin eandi Egipto anu jiweabu tenankin ichakawakubainkin janua matun xenipabu en jatu taxnimabidaniki. 6 Egipto anua jatu taxnimabainkin en jatu iyuaya Ianenwan Tashipaki kemai buaibun ana Egipto nawabun jatu achinun ika jatun caballo ichapaki katsumea buaibu inun caballo tadanti ichapadiki jawen bukin jatu chibanbidanaibun 7 jatuwen datekin ea yukaibun jabu inun Egipto nawabu namakis paxkakin kebenkin en meshu waniki. Chipu Ianenwan Tashipa matun xenipabu pukebainaibun Egipto nawabundi jatu chibain pukebainpananbun jenewen achimakin en jatu yamawakin keyuni jaska man unaiin. Janu tsua jiweabumanu badi ichapa en kushipa uin man jiweakeakekubidani man unandiaii. 8 Janua Jene Jordán kexa betsaudi ja Amorreo nawabun mai pakea anu en matu iwea matube detenameaibu en matu medabewakin jatu maemamaya detekin man jatu nichinkin jatun mai pakea tibi man ibuwakubidanimabuki. 9 Januxun Siporin bake Balac Moab nawabu xanen ibun matu maemakatsis ikin jau matu yupuyunun Beorin bake Balaam kenakin jawenabu Balacnen jatu imatanken 10 jakia Balaam matu yupunun ixun ea yukabia en jaska yunuamawen taexun matu yupumamakin jawen pepa jancha besti yuimakin matu yaushikin medabewakin en matu mekeyamaki. 11 Jene Jordán pukebidan Jericóki kematushitan man jatube detenameaibu en jatu ichakawakin babuwaken man jatu detekin keyuniki. Ja nawabu en jatu babuwaya Amorreo nawabu inun, Ferezeo nawabu inun, Canaán nawabu inun, Hitita nawabu inun, Gergeseo nawabu inun, Heveo nawabu inun, Jebuseo nawabu man jatu maemakin yamawaimaki. 12 Januxun man judiama bebunkidi i bina midima en yunua jatuwen datei Amorreo nawa xanen ibu dabe inun jawenabu en jatu nichian matun deteti machatu chaipawen inun matun piawen man jatu deteama ibubis jatun mae jenebaini paxayamabuki. 13 Bai man sepama inun jiwe man wama en matu ibu wamawen taexun jatun mae tibi anu jiwekin uva nishi inun aceituna ji juni betsan banani anua jawen bimi bikin ichawaxun man piaii”, akin Diosun jawen jancha ea yuishinaki.

14 Jaskaken Jehováki mesekubainxankanwen. Padanananma ikun kayabi juinti xabakabiwen Dios duawakubainxankanwen. Ukedi jenewan Éufrates inun Egipto anuxun matun xenipabun yushin betsa betsapa kenwanbiapaunibun jabu jenetan Jehová besti duawakin kenwankubainxankanwen. 15 Jakia Jehová man duawakatsi ikama jadatu yushinin jancha man chibankatsi ikimenkain, ikis katukanwen. Jenewan Éufrates ukedi matun xenipabun yushin betsa betsapa jabun kenwanpaunibudan, jabumenkain. Nenu jiwexun Amorreo nawabun yushin betsa betsapa jabun kenwainbumenkain, matun shinankanwen. Jakia en ain inun en bakebubetanan, Jehová duawakin nun chibanpakexanaii, jeneamadan— jatu waya 16 dasibibun ninkatan Josué kemakin:

—Nuku jaska shinanxunyamawe. Jehován jancha jenetan yushibu betsa betsapa nun chibankatsi ikamaki. 17 Egipto anuxun nukun ibubu tsumawatan dayajaidamakin jatu ichakawaibun nukun mekenika Dios Jehován Egipto anua nuku paxawakin nenu nukun ibubube nuku iwekubidaniki. Jabiatiandi nukun bedubi jawen kushipa pejaidawen dami betsa betsapa wakin nuku e imakubidankin janu nun kai anu inun tsuabuda nun dainbainai jatu nuku dainmakin nemaxunkin nuku mekekubidanimaki. 18 Jaska wakin nuku bebunxun na mai pepa anu jiwebaunabu nun kaikidia nawabu dasibi Jehován nuku jatu nichinxunimaki, nenu Amorreo nawabu kushipabu jiwebiaken jabudi paxawakinan. Jaska dasibi nuku axunkubainmiswen taea nukundi nun duawakatsis ikaii, nukun mekenika Jehová Diosdan. Ja besti duawakin nun chibanpakexanaii, jeneamadan— ikaibuwen taexun

19 Josuén jatu yuikin:

—Nukun mekenika Jehová tadi medibi pepa jiwemistun jawenabu yaushinikawen taexun jawada chakabu mei jaki patapakin man duawakin pewatidubumaki. 20 Jakia Jehován jancha jenetan yushibu betsa betsapa man kenwainbu matun chakabu ana buama shinankin matu duawabianixun ichakawakin matu yamajaida waxanikiki, kupikinan— jatu wa

21 Israelin enabun Josué kemakin yuikin:

—Jaska min yuiai keska nun jaskatidumaki. Jawa jeneama Jehová besti nun duawapakekatsis ikaii— akabu

22 Josué ana jatu yuikin:

—Jehován jancha besti chibanun ixun matunmebi unantinain man janchaii— jatu wa dasibibun ana yuikin:

—Jaa. Chanimaki. Jabiaskas nun shinaiin— ikaibun

23 —Jaskakenan, ikis yushin betsa betsapa dami matu anua puta keyutan matun shinan betsa watan matun xenipabu Israelin mekenika Dios Jehován jancha besti matun juinti jidabiwen shinanpakexankanwen, padanmadan— jatu wa

24 dasibibun ana yuikin:

—Jawen jancha dasibi ninkakin jawada nukun mekenika Dios Jehován nuku yunua besti nukun juinti jidabiwen duawakin nun chibanpakexanaii, jawa padanmadan— akabu

25 jabias xabatian Siquem anuxun jaska wakin duawaxanaibu Josué jawenabube yubakatan jawen yunuti inun jawen nemati jancha ichapa jatu yuikin yunutan 26 jabias jancha yunuxu Diosun jancha yusinti una medan jatu kenexuntan jawen jatube yubakani jiwe dapi ji ewapa kushipa naman mishki ewapa jatu benimatan 27 jatu dasibi ana yuikin:

—Uinkanwen. Na mishkidan, ja chanipaketi keskaki. Padananain Jehováki man chakabutidu jawen unanmati keska Jehován jawen dasibi nuku jancha waxuki, nun chakabuwaibu ja mishkipan nukukidi metutidu keskadan— jatu watan

28 januxun Josuén jatun mai pakea tibi anu jatu nichinikiaki.

29 Jatu jancha waima binupaketan Nunen bake Josué Jehován tsuma 110 año mawaken 30 Efraínen enabun maiwan pakea mananan Mati Gaas nortekidi Timnat-sérah anu jawen mai pakea janu Josuén ibuwani anu jawen yuda maiwanibukiaki. 31 Josué xanen ibuaitian Israelin enabu jatun mekenika Jehová chibankubainibukiaki. Josué jiweatian inun ma mawabiaimaken duawakin jatun Jehová jeneama inibukiaki. Janua ja xanen ibu anibu unanepa betsabundi dasibi Jehován jatu axuni shinankubaini jiweyuabundi Israelin enabun Jehová Dios chibanpakenibukiaki.

32 Egipto anua Josén xau besti bekubidanixun mae Siquem anu Hamorin juni bakebu Siquem inun jawen betsabu anua 100 oro pei jexewen bai bikin Jacobun ibuwani anu Josén xau maiwanibukiaki. Natianan, ja bai Josén bababunakiaki.

33 Aarónen juni bake Diosbe jawenabu janchaxunika Eleazar mawaken Efraínen enabun maiwan pakea mananan anu Eleazarin juni bake Finees mae betsa ibu wamani anu jawen yuda maiwanibukiaki.