“Badi ichapa kai ma en matu anibujaidaxunaki. Ea ninkaidakanwen. 3 Matu medabewakin nawa xukua betsa betsapa jiweabu Jehován jabu matu nichinxunaya jawen daya dasibi matuwen detenameai man uinkubidanshinaki. 4 Jene Jordán inun badi jikiaikidi ianenwan ewapa Mediterráneo namakis nawa betsa betsapabu en yamawani inun nawa betsa betsapabu nun matu nichinxundiamaki. Jatun mai pakea tibi man janu ibu waxanaibu en matu paxkaxuna jawen unantiwen bikin matunabu xukua tibi jau janu jiwekubainxanunbun man bimaki. 5 Jaska matu yubani keska wakin tsuabuda man nichindiama jatun mae tibi mebinkin matu bebunkidi Jehován jabu matu nichinxunaya jatun mai pakea tibi man ibu waxanaii.

6-7 Jaskaken nawa betsa betsapabu man nichindiama man jatu jaibuwatan, jatun yushibubu kena man yuiyamaxanun inun, jatun yushibubu datan akin juni betsa man yubamayamaxanun inun, jatun yushibubu man duawayamaxanun inun, jatun yushibubu kenwain man danti iyamaxanun, jaskawen taexun jawen unanmati una medan Moisin matu kenexuniki, matu nemakinan. Bai tanabainai keska wakin yusiudi inun yusmaudi dabekeama jaska Moisin matu kenexuni chibankin jawen nemati tibi ninkakin jawen yunuti tibi akubainkin uindapakexankanwen, kushipai mestenepaidan. 8-9 Jaska man akubainai keska wakin matun mekenika Dios Jehová jeneyamapakexankanwen, matu bebunkidi nawa betsa betsapa kushipayabu nichinxuniwen taexunan. Ja inun, matu medabewaya tsuabunda matu nematidubuma iniki. 10 Jaska matu yubani keska wakin matun mekenika Dios Jehován jatu ichakawamiswen taexun matu bestichaitun 1,000 junibu man nichintiduki, jatu kushimabainkinan. 11 Jaskaken ibubis mekekin matun mekenika Dios Jehová bechipaijaidakubainkanwen. 12 Jakia Diosun jancha chibain man chintunkin nawa betsa betsapa nenu jiwediabu jaibuwatan jatun ainbuaibu ainwankubaini jatuki man dasiaya 13 ana matu bebunkidi Jehován jatu nichinxunama ixanikiki. Shinaindaxankanwen. Jakia jisin bidun keska wakin matu yabua inun dispiwen matu kakush kakush aka keska wakin matun bedu anu muxa tekea keska wakin padankin nawa betsabun matu ichakawaibun na mai pepa matun mekenika Jehová Diosun matu ibu wamani anua man debui keyuxanaii, yamaidan. Man jaskatiduwen taexun matun mekenika Jehová Dios putataskayamaxankanwen.

14 Yuda dasibi ixanaibu keskai ikis eadi en matu mawaxunxanaii. Jawada pepa matun mekenika Dios Jehován matu yubani axunkin ma keyushinadan, matun juinti medan inun matun yushinwen man unanjaidaii. Dasibi matu axunkin jawen yubati jancha dasibi jakimama ishianki. 15-16 Jakia jawen yubani jancha danankin yushibubu bebun ana duawai man danti ixun jatu kenwanxanaya matuki dakekin matuki ana sinatajaidakin jati ikis matu duawamis keska wakin ana akama jakia betsa betsapa matu tenemakin yupukin na mai pepa matu ibu wamani anuxun tede akin Jehován matu jawaida yamawaxanikiki, kupikinan”, jatu watan