Jaska watan maewan Ai jau ibuwaxanunbun Jehován jatu yununikiaki, na janchadan
8
Januxun Jehován Josué ana yuikin: “Ai anu jiweabuwen natian ana datei punu nukayamawe. Min junibu detenamenikabu dasibi iyui Ai anu mapekexanwen. Jadixun ean matu medabewakin Ai xanen ibu inun, jawenabu inun jawen mae inun, jawen mai pakea matu achimakin mina en mia wamaxanaii. 2 Jericó inun jawen xanen ibu man yamawashina keska wakin Ai inun jawen xanen ibu jabiaskadi waxankanwen. Jakia man ma jatu maema jatun mabu inun jatun inabu achitan matun ibu wakin bixankanwen. Jatu bepadani jatun maewan pechiudi detenamenikabu ichapa jau junexun manatanunbun, june jatu yunuwe, ikis na jabia meshu medanan”, aka3 jatun detetiya detenamenika dasibibu Ai anu jau bununbun, iwanan, 30,000 detenamenikabu katuxun meshu medan bebunkidi jau bununbun 4 Josuén jatu yunukin: “Ea ninka peidawakanwen. Ai jiweabu nun jatu detenunbun matu dukun bui jatun maewan pechiudi dapi junexun nuku manayuxankanwen. 5 Janua jatun maewan besuudia ea inun nukunabube nun kemai jaskashinabu keskakin nuku detekatsi taxnibidanaibu jatu padain paxai nun chintunkidanaya ana uatian nuku ashian keska dabanen shinain nuku detenun ika jatun mae anua kainbidanxankanikiki. 6 Nuku chibain jaskabidan nuku ashian keska wanun ika jatun maewan anua kainbidanaibun nun jatu ninikin akawanbidana nuku chibain beaibu jaska wakin padankin jatun mae anua nun jatu iwekubidanxanaii. Nun jaskai Ai anuabun uintan: ‘Jaskashinabu keskai nukuwen datei ana kushibainkanikiki’, ika 7 nuku chibain jatun mae jenebidanaibu jatu uintan nukun mekenika Dios Jehován matu medabewaiwen taea man junea anua kushibidan jatun maewan achixankanwen. 8 Jatun maewan achitan kuakin taewayuxankanwen. Jehován jancha chibankin jawen jancha en matu yunua kaneama axankanwen”, jatu watan
9 yunukin Josuén jatu nichian meshu medan june bui Ai badi jikiaikidi anu Betel inun Ai tsisumen junexun jatu bepadain buxun jabun jatu manaibun jakia Josué jawenabube niti ika uxashini 10 penaya bestentan detetiya junibu detenamenikabu ichawaxun jawen xanen ibu bexmasbubetan jatu iyui mapekei 11 Ai besusi nortekidia kematan napaku ewapa kexa betsaudi pean xubu wabu 12 meshu medan ja kachu ana 5,000 junibu detenamenikabu katuxun juni betsabu yunushinabubetan jatun maewan Ai jau june achixanunbun Josuén jabudi yunua 13 jatu padain jatun maewan nortekidi Israelin enabu detenamenikabu ichapa xabakabi manaibun jatun maewan badi jikiaikidia detenamenika betsabu junea maniabun dateama jabias meshu medan Josué ja mesti bebui napaku namakis niti ika
14 ukedi xabakabi maniabu Ai xanen ibun uinbiakin pechiudi Jordán napaku anu june manabiaibun unandiama penamajaida Ai anua juni dasibi bestentan Israelin enabu ana detenun ika jawaida jatun xanen ibube jatun maewan besusi kainbidan 15 jatube detenamei taeaibun Israelin enabun jatu padain datei keskai janu tsua jiweabumakidi kushibainaibun 16 jau jatu detekin chibanunbun jawen maewan mishki kene medanua jatun xanen ibun juni dasibi kena Josué inun jawenabu chibankin Ai xanen ibun jatun maewan anua jatu iweaya 17 jatun mae jikiti xui bepentan bepuama jenebainkin Israelin enabu dasibibu chibainbuwen taea jatun maewan anua Ai inun Betel anua juni detenamenikabu tsuan jatu meketidu jayabumaken
18 januxun Jehován Josué ana yuikin: “En mia achimaiwen taexun janu niti itan min jashiwen Aikidi metuwe”, aka jawen jashi sanankin Aikidi Josuén metua 19 juneshinabun uintan jawaida beni kushibidani jikixun jatun maewan Ai achitan chiwen kuakin taewaibun 20-21 Ai junibu natsaukekauan jatun mae kuin ichapa nai anu puebainai uin datei jani paxatidubuma Israelin enabu jabu junei bushianbun Ai ma achixun kuaibun jawen kuin uintan Israelin enabu paxai bui chintuntan Ai junibu detekin taewaibun 22 Ai mae kuakin taewatan juneshinabu taxnibidankin jatu detediabidanaibun jani paxatidubumaken nekexudi inun ukexudi jatu dasibi detebaunabu tsua paxama tsua jiweama 23 jatun xanen ibu besti jiwemakin achitan Josué anu iwenibukiaki.
24 Jatun maewan anua taxnibain jatu chibanbainabu Israelin enabun jatun machatu chaipawen Ai anuabu jatu detekin keyutan chintunbidan Ai anu jikixun dasibi jabu detebaunabu 25 Ai anu jiweabu dasibi jabiatian dete keyuabu 12,000 juni inun ainbu mawai keyuabu 26 Ai anuabu yamawakin keyudiabuma jawen jashi Josuén sananbainaya 27 jaska Jehován Josué yuishina keska wakin jatun mabu inun jatun inabu Israelin enabun bikin ibuwakin keyunibukiaki. 28-29 Jatun mabu inun jatun inabu taxnimakin keyutan jau kuakin keyununbun Josuén jatu yunua ana kuakin keyuabu dispiwen jau xanen ibu tenexnunbun jawenabu Josuén yunua ji anu duntankin Ai xanen ibu tenexabu badi jikiaya Josuén jatu ana yunua jawen yuda butexun jawen mae jikiti xui anu udentan jawen yudaki mishki tude midima puta puta akin maspu wanibukiaki. Ai anu jiwe tibi ma di iki keyuni inun mishki tude midima maspu wanibu uinpaketidubu natian uindiatidu jayaki.
Diosun yunuti inun jawen nemati Mati Ebal anuxun Josuén jatu yuixunikiaki, na janchadan
30 Diosun jatu ana medabewaiwen taexun Mati Ebal anuxun jawen kenwanti chi tapu Josuén wakin 31 Jehován tsuma Moisin Israelin enabu yunuxun jawen unanmati una medan kenekin: “Jawen mane tsatiwen mishki kedan wama jakia mishki kedanma besti manchinkin jawen kenwanti chi tapu jau apakexanunbunwen”, ani keska wakin Josuén jaska chi tapu waken Israelin enabun ina awa inun chaxuwan ichapa tesenxun jawen kenwanti inun jawen daewati wakin jabun ina Jehová menu keyuxunabu 32 januxun chi tapu mishki mania tunku betsa betsapaki Moisin jatu unanmani jancha Josuén xexakin keneai Israelin enabun uinibukiaki, na jabias jancha Moisin jatu kenexunidan. 33 Mati Guerizim inun Mati Ebal namakis napaku anu Jehová jatube yubakani jancha aduni bau ia Diosbe jawenabu janchaxunikabu mapuabu jawenabu jau pepawanunbun jaska ja dukun Moisin yununi keska wai Israelin enabu mae jidabi inun, jatun xanen ibubu inun, jatun xanen ibu bexmasbu inun, pepabu inun chakabubu unanikabu inun, jawenabu kayabi inun, yuda betsa betsapa jatube jiwekubidanaibu jatu ichawatan jatu paxkakin jatidi Mati Guerizim bebun jatidi Mati Ebal bebun mapuabu uinanandabekin ninkaibu
34 jawen unanmati jancha tibi Diosun pewati jancha inun Diosun kupiti jancha Moisin unanmani una anua jancha kushipawen Josuén dasibi jatu yuixunkin 35 Moisin yunuti inun jawen nemati jancha dasibi jawa jeneama junibu dasibi inun ainbu dasibi inun bake mishtinbu dasibi inun nawa betsa betsapabu jatube jiweabu Josuén jatu yuixunaya jawen jancha ninkanibukiaki.
***************