2 xaba betsatian mae Betel anua badi juaikidi mae betsa Bet-avén dapi Ai anu jau uinbauntanunbun juni eskadabes Josuén Jericó anuxun jatu yunukin: “Aikidi buxun june mapekebain uinbauntankanwen”, jatu wa ninkatan mapekebain Ai dapi june uinbauntani 3 chintunbidan Josué anu bexun betsan yuikin: “Nukunabu dasibi jau buyamaxanunbunwen. 2,000 juni detenamenikabu kasmai 3,000 besti min jatu yunutiduki, nukunabu ichapa jatu yunuamadan. Ai mae anu jiwexun jabun mekeabudan, mawaida ichapabumaki. Jatu maematan ja mae nun ibuwatidubuki”, akabu

4 jatun jancha Josuén ninkakin ikunwantan 3,000 detenamenikabus besti jatu yunua bui mapekebain jatu maemapananbun Ai junibun jatun machatu chaipawen jatu detekin maemabu Israelin enabu jatuwen datei kushibidanaibu 5 jatun mae jikiti xui dapixun jatu detetiyaxun chibanbidankin machi buteaibu jatu detekubidankin 36 Israelin enabu debuwatan Sebarim anu jatu jenebainabun jatu jaska wabu Israelin enabu dasibi datekin ma jatun kushipa benua punu nukabidanaibun

6 Josué inun jatun xanen ibubube juinti nishmajaidaxun jatun tima tadi ushnitan isin tenei keskai mai mishpu mapu tukutan Jehová jatube yubakani jancha aduni bau besuudi daxka ikain beti ika beua badi chaitanai manibai janua badi kaya 7 atimas Josuén Jehová yuikin:

—¡En peidawa! En xanen ibu Jehováan, ea ninkayuwe. Amorreo nawabun jau nuku yamawanunbun ¿jaskakin Jene Jordán min nuku pukemashinxun min jatu nuku binumaxumen? jabiaudi jene pukeama niti itan nun jiwepananan. 8 ¡Nun pemaki, Xanen Ibuun! Ma nukuki sinataibun enabu Israelbu jatu tenanbu paxai kushibidankanxuwen taexun en jawa mia yuitimaki. 9 Enabu kushibidankanxu ninkatan Canaán nawabu inun ja dapi nawa tibi dasibi nenu jiwebaunabu benimai xukui dasitan nuku dasibi detekin keyutan nukun kena ana nuku shinantimawaxankanikiki. Jaska watan min kena kushipawen min nuku iwekubidanshinadan, ¿jaskada mikidi shinanxankanimenkain?— aka

10 sinatakin Jehován Josué kemakin:

—¿Jaskai e iskidan main beti ika min dakamen? Beniwe. 11 Minabun chakabuwakin ma kaneshinabuki, en jatube yubakabiani ea chibankin axunkin pewama kanekinan. “Ja mae anua mane mabu ena bixuntan mabu betsa kua keyukanwen”, min jatu wabia jaska chakabu unanbiakin oro inun pei jexe inun tadi jawendua june yumetsuxun jawena wakin buxun jatun mae anu junebain adushinabuki. 12 Jaskawen taexun minabun jatuki sinataibu jatube detenamei kabia jatu maemama kushibidanshinabudan, ja jaska chakabuwashinabuwen taexun matu kupikin en matu yamawatiduki. Ja mabu yunukin metima en washina ja yumetsushina anua min jawaida bitan yamawamaken eandi en matu ana medabewama ixanaii, man ana detenameaitianan. Detenamei bua man ana paxa bestikunkainxanaii. 13 En matu ana medabewatidumenkain, min shinain benikain en daenun minabu dasibi ichawaxun jatu pewadiwe, eska jatu yuikinan: “Meshukidi eanu bekatsi jau petan benunbunwen. Eadan, en Israelbun mekenika Dioski. Ean jatu yuikin: ‘Israelin enabuun, ea ninkakanwen. Jericó anua mabu kua keyuti en yunubiaken kua keyuama man betsa adubainshina man jayaki. Ja mabu tsuanda bixun man kuama ishianwen taexun nawabu matuki sinataibu man ana jatu maematidumaki’ ”, akin na jabias jancha en mia yuixu ea jatu yuixuntanwen. 14 Jatu jaska watan meshukidi Israelin enabu xukua tibi nenu ea jatu uinmakin iwexanwen. Xukua betsa bestichai en katua jatu anu jatun ibuan kenawen pakeabu tibi ea jatu uinmakin iwebidanbidanxanwen. Ja pakeabu betsa bestichai en katua jawenabuya tibi ea jatu uinmakin iwebidanbidanxanwen. Jatube jiwea juni bestichai tibi en katua ea jatu uinmakin iwexunxanwen. 15 Tsuanda atimapa wakin chakabuwakin mabu medibi bishian katukin jadatuda en mia unanmaxanaii. En matube yubakabiashina en jancha danankin jawen dakewati washianwen taexun ja juni tenantan jawenabuya inun jawen mabube kuaxankanwen— aka

16 ninkatan uxashini penamajaida Josué bestentan jatu yunua jadatu juni chakabumenkain unanti wanun ixun Dioski nukuti tadi jiwe puntea besusi Israelin enabu xukua tibi jatu ichawaken Jehován ja ichabu anua Judán enabu metumakin katuma 17 januxun Josuén unantan Judán enabu anu jatun ibuan kena tibiwen pakeabu tibi Josuén jatu kekuntan jatu uinmakin Zérahn enabu Jehován katua Zérahn enabu jabu dapi jiweabu tibi Josuén jabu tibi jatu itantana Zabdín enabu Jehován katua 18 januxun Zabdín enabu anua jiwe ibu bestibu tibi Josuén jatu itantana Judán enabu Carmín bake Acán jawen juchi Zabdí inun, jawen epan juchi Zérahdan, Jehován katukin Josué unanmanikiaki.

19 Ma unanmawen taexun Josuén Acán yuikin:

—En jaibuun, ea ninkawe. Nukun xenipabu Israelin mekenika Dios Jehová pepawen duawakin kenwankin min jaska washina juneama ea yuiwe— aka

20 Acánen Josué kemakin jaskashina yuikin:

—Chanima en chaniaii. Israelin mekenika Dios Jehován jancha danain en chakabushinaki. En eska meshinaki. Mia yuinun ea ninkawe. 21 Jericó nawabu nun jatube detenameaitian jatun mabu uinbaunkin Babilonia anua tadi peyabukuti jawenduajaida inun, 200 plata pei jexe inun, oro tude pishta medio kilo binua bechixun jawen kemukin bibain en tadi jiwe medan mai pukintan ja dukun pei jexe manchintan janua oro tude janatan jamamaki peyabukutiwen achimaxun en maiwashinaki— akaya

22 jaska Josuén ninkatan jau jawaidabain bitanunbun junibu Acánen tadi jiwe anu jatu yunua kushibain jikixun mai pukinxun ja medan janu adushina ja peyabukuti jawendua inun, oro tude pishta inun, ja dukun uke medanjaida plata pei jexe adushina bechitan 23 bitan jatun xanen ibu Josué inun jatunabu ichabu anu bexun janu Dioski nukuti tadi jiwe bebun manchianbu 24 Josuén uintan Acán jawen bakebuya inun, dasibi jawen inabuya inun, jawen mabu dasibiya jau mawa napaku Acor anu iyununbun yunutan

25 jadi iyuabu Josuén Acán yuikin:

—¿Jaskakin nukuki Dios sinatamakin atimapa wakin min nuku chakabuwashinamen? Natian miadi Jehován kupiaya min nuku tenemashina keskadi miandi min meaii— akaya januxun Israelin enabu dasibibun mishki tudewen tsaka tsaka akin Acán jawen bakebuya tenankin keyuxun chiwen jatun yuda kuakin keyutan 26 achimakin mishki tude jaki puta puta akin ichapa jaki maspu wanibukiaki. Ja jaska wanibu natian uinpaketidubuki. Israelin enabuki Jehová sinatajaidashina Acán kupikanxuwen taea Jehová daenikiaki. Jaskaken ja napaku kenakin: “Acorki”, amisbuki. Nukun janchawen kenadan, “Chakabu Atimapaki” ikaki.