Jaska watantankin Jericó jau ibuwaxanunbun Jehován jatu yununikiaki, na janchadan
6
Israelin enabuki datekin nemanun ixun jabu tsua kaintidubumawakin inun Israelin enabu jikitidumawakin Jericó mishki kene keyatapakauna jawen jikiti xui tibi bepukin mestenwankin keyuabun 2 Jehován Josué yuikin: “Uinwen. Jericó en mia yunuaii. Adiwe. Jawen xanen ibu inun jawen juni detenamenikabu jatu maemamatan en mia jatu mebinmaii. 3-4 Xaba tibi mae dunkei bestiwai maputantanxankanwen, 6 díadan. Matun juni detenamenikabu jawen detetiya inun en matube yubakani jancha aduni bau iabu bebunkidi 7 ebe matu janchaxunikabun chaxuwan maxun pudi ati chaan chaan akin mawakubainaibun xaba tibi dunkekin jatu iyutantanxanwen. Janua séptimo díatian ebe matu janchaxunikabun jatun chaxuwan maxun chaan chaan akin mawakubainaibun matun detenamenikabu iyukin jatu dunkemabaunxankanwen, 7kidan. 5 Jaska jatu yunushina itan itani keyutan mapubaunabun chaxuwan maxun chaan akaibu jui kain betsatanaya ninkatan dasibi jau jui kushipawen sai sai ixanunbunwen. Ja sai sai ikaibun jawen nemati mishki kenebaunibu jamebi di iki keyuaya juni dasibi jaudi besuabuudi bui jatu detenun ika mae medan jau jikibainxanunbunwen”, aka6 ninkatani juxun Josuén Diosbe jawenabu janchaxunikabu kenaxun jatu yuikin: “Jehová nukube yubakani jancha aduni bau iabainaibun chaxuwan maxun pudi ati chaan chaan akubaini matu 7 dukun bebubainkanwen”, jatu watan 7 jawenabu dasibi yuikin: “Ja mae dunkei bukanwen, ja detenamenikabu bebuaibun Jehová jatube yubakani jancha aduni bau iabainaibun jachun betsabu buaibu jatu chibanbainidan”, jatu wa
8 dasibibun ninkatan jaska jatu yunuxu keskai Diosbe jawenabu janchaxunikabun Jehová jatube yubakani jancha aduni bau iabainaibun ja 7bu bebubainkin chaxuwan maxun chaan chaan ati mawakubainaibun 9 detenamenikabu bebun jabu Diosbe jawenabu janchaxunikabu chibanbainaibun jabun jatu mekea betsan jatun yubakani jancha iabainaibu jabun pechiudixun jatu uinxunbainaibu inun chaxuwan maxun chan akin mawakin jeneabumaken 10 jabiatiandi Josuén jawen detenamenikabu jatu dasibi ana yuikin: “Matun jui jau ninkayamanunbun sai sai iyamakanwen. Ja dikabi: ‘Sai sai ikanwen’, iwanan, en matu yunudiama janchama pes buaketanyukanwen. Chipu: ‘Jui kushipawen sai sai iki keyukanwen’, akin en matu yunuxanaii”, jatu watan
Jericó maewan jatu achikin detenibukiaki, na janchadan
11 Jehová jatube yubakani jancha aduni bau Josuén jatu iamabaunkin maewan Jericó jatu dunkemabauntankin jatun tadi jiwe puntebaunshinabu anu ana jatu iwea uxashini 12-13 penaya Josué bestenxun jatu ana yunua Jehová jatube yubakani jancha aduni bau Diosbe jawenabu janchaxunikabun iabainaibun ja 7 Diosbe jawenabu janchaxunikabundi chaxuwan maxun tsuma jatu bebuxunkin chaan chaan akin mawakubainaibun inun dasibibu bebun detenamenikabu jawen detetiya jatube butani 14 xaba ja kachu Jericó ana dunkebauntani jatun tadi jiwe anu ana chintuanbu jabiaskastantankin 6 día dunkekin keyuabu
15 jakia jawen jenei séptimo díatian penamajaida bestein keyutan xaba betsatian ishianbu keskai dunkekin taewai 7ki maewan Jericó dunkebaunkin keyuaibun 16 Diosbe jawenabu janchaxunikabun chaan chaan akin jeneabuma jawen jenei séptimotian buankin chaan akin chaipa waibun Josuén jatu yunukin: “Sai sai ikanwen, na maewan Jehován ma nuku inainkikidan. 17-19 Ja mae medibiki. Ja inun, ja medan mabu Jehovánaki. Juni dabe nun yunua medabewakin ja ainbu jininipa dasibibun memis Rahabin jatu adukin juneshinawen taea Rahab inun jawen jiwe medanuabu ja besti tenanma jiwemakanwen. Januxun betsabu dasibi tenankanwen. Jakia jatun mabu dasibi medibiki, Diosunadan. Mekin bianyamakanwen. Ja mabu medibiwen kemukin bikin man ibu waken Jehová Dios man nukuki sinatamatiduki. Uindakanwen. Nukuki sinatakin nuku kupikin yuputiduki. Jakia jatun plata inun, jatun oro inun, jatun bronce mane mabu inun, jatun hierro mane mabu medibiki, dasibi Jehovánadan. Ichawatan Jehová nun aduxunxanaii”, jatu wa
20-21 Diosbe jawenabu janchaxunikabun chaxuwan maxun chaan akin chaipa waibun ninkatan kushipawen sai sai iki bis ichakayamai chaipaibun Jericó maewan mishki kenekauna di iki keyuaya jawen deteti machatu chaipaya juni tibi bebubain jiki keyutan dasibi jatu detekin junibu inun, ainbuaibu inun, bake mishtinbu inun, anibu inun, yuxabu inun, jatun ina awa dasibi inun, jatun chaxuwan dasibi, inun jatun asno dasibi yamawakin jatun maewan jidabi achiabu
22 janua juni dabetun june uinbauntanshinabu Josuén jatu yuikin: “Ainbu jininipan jiwe anu jikixun jaska man jabe yubakashina keska wakin ja ainbu inun jawenabu jatu taxnimatankanwen”, jatu wa 23 buxun Rahab inun, jawen epa inun, jawen ewa inun, jawen puibu dasibi jatunabuya jawen jiwe anua kainmatan Israelin enabun mae benanta dapi jatu mekekin iyuabun 24 jatun plata inun, jatun oro inun, jatun bronce mane mabu inun, jatun hierro mane mabu jatu ichawamaxun Josuén jatu yunua buabun Jericó maewan jidabi kuakin yamawakin keyuabu shinanxun Jehováki nukuti tadi jiwe medan jawen meketi dintu anu ja mane mabu mekekin Josuén adunikiaki. 25 Jau uintanunbun juni dabe Josuén yunua jatu juneshinawen taea Rahab inun jawenabu Josuén jatu mekekin tenanma iniwen taea ikis Israelin enabube Rahabin enabu jusini ma jiweabukiaki.
26 Jericó jatu kuamakin keyutan yupu janchawen Josuén jatu yuikin: “Uindakanwen. Na maewan Jericó jadatuda xanen ibun ana mae bena wakin beniai Jehován yupuxanikiki. Mishki kenebaunkin taewaya kupikin jawen juni bake iyua tenanxanikiki. Janu jikiti xui bebuti waya jawen juni bake jawen jenea tenandiaxanikiki”, akin nemakin jatu unanmanikiaki. 27 Jaska wakin Jehován Josué medabewaya Josuéwen datei mai pakea jidabi anuxun yuda xukua betsa betsapabun jawen kaka kena kaya ninkakin keyubaunibukiaki.