Guilgal anu jiwetan jatun jina kubichi jatu mextenibukiaki, na janchadan
5
Israelin enabu jau Jene Jordán pukenunbun Jehován nemakin jatu netsuxunshinken badi jikiaikidia Amorreo nawabu xanen ibubu inun Ianenwan Mediterráneo kexa anu jiwebaunabu Canaán nawabu xanen ibubu dasibibun jatukidi ninkatan mentsisipa detenamenikabubia jatun juinti nishmai Israelin enabuki datei punu nukai ana kushipa jayabuma Israelin enabube detenamekatsi ikama inibukiaki.2 Januxun Jehován Josué ana yuikin: “Mishki nupe ichapa wawe, kenupa wakinan. Jaska watan Israelin enabu juni tibi jatun jina kubichi bisbuma ea jatu mextemaxunwen, ea ikunwain jawen unanti wakinan”, aka
3 mishki nupe ichapa waxun Mati Aralot anuxun Josuén jatun jina kubichi jatu mextemanikiaki. 4-6 Eskawen taexun Josuén jatun jina kubichi ana jatu mextemakin taewani matu yuinun ea ninkakanwen. Israelin enabu juni dasibi jatun jina kubichi mextekeyabu Egipto anua taxnibidani janu tsua jiweabumanu bukubauni juni ewai 20 año jayabu detenamenikai taekin jabun Jehován jancha ninkakin chibanbumawen taexun mai pepa jatun xenipabu Diosun jatu yubani anu jau jabu jikiyamaxanunbun, Dios jamebi yubakai: “Mai pepa anua piti pepa shadabu jau uinyamaxanunbunwen”, ikimaxun janu tsua jiweamanuxun Diosun jatu kupia bai namakia debukubidanaibun 40 año jawenabube jatu imakubaunaya ja juni ewai mentsisipai taeaibu Egipto anuxun ma jatu jina kubichi binibu paxayamabu ja junibu jadia mawakubidanaibutian jabun bake wabu janu tsua jiweamabumanua kainkubidanaibu jatun jina kubichi mexteama ikubidanimabun 7 jaskawen taexun Josuén jatun jina kubichi jatu mextemakin janu tsua jiweabumanu ja juni ewabu mawakubidanaibutian jatun xantukun juni bake ichapa Diosun jatu pajaida wakubidanshina jawen Dios ikunwain unanmati wakin ja junibu dasibi jina kubichiyabu Josuén jatu bimakin mextemakin keyudianikiaki.
8 Jawen Dios ikunwain unanmati wakin jatun jina kubichi bikin jatu keyuabu jau xuxai isin mainyununbun jatun jiwe medanxun jatu manai mani bestiyuabun 9 januxun Jehován Josué ana yuikin: “Egipto anu jiwexun jatun chakabu tibi tapinixun man jawen ea dakewakubidanimabuki. Jakia man ma jatun jina kubichi jatu mextemawen taea en ana matuki dakeamaki, matun chakabu ana shinanmadan”, anikiaki. Jaskawen taexun ja mae kenakin: “Guilgalki”, amisbuki. Guilgaldan, nukun janchawenan, “Jatun Chakabu Putakin Tadan Keska Waniki.”
10 Jericó besusi mai panpa anu Guilgal anu jiweyukin janu taxni taebidanibu uxe babekei 14 díatian badi kaya ja Pascua ikaya jaska Egipto anuxun Jehován detenika nai tsuman jatu mabidis abaini shinankin besikin 11 ja xabatian misi xaxawatiuma inun xekiwan trigo tsui pikin taewabaini uxashini ana bestentan ja mai pepa anua piti yumemis pikin taewashina 12 ana penaya jatun piti nai anua Diosun maná dudu misi ana jayamawen taexun Canaán mai pakea anua piti shadabu janu pikin taewabainibukiaki.
Jehován nai tsumabun xanen ibube Josué janchanikiaki, na janchadan
13 Xaba betsatian Josué Jericó dapi ka niken juni betsa taxnia jawen deteti machatu chaipaya tsuma nia uintan kai jaki kemaxun Josuén yukakin:
—¿Min nukun medabenanmen? ¿Ja jabu nukuki sinataibu min jatuna daka? Jaskada kayamenkain, ea yuidiwe— aka
14 —En minama inun en jabunamadiki. Jakia Jehován nai tsuma kushipabu en jatu yunumis en jatun xanen ibu juaki— aka ninkatan danti iki beti ixun Josuén yukakin:
—En xanen ibuun, ¿jawa min ea yununun ika juamen? En min tsuma en nenuki. Ea yuidiwe— aka
15 —Janu min pai anu Diosun ma pepawadan, medibi meseki. Diosun jancha mia yuinun Dioski mesekin jawaida min bichi tae pekawe— aka ninkatan jawaida Josuén jawen bichi tae pekaxunikiaki.