4 ninkatan ja 12 juni katubidana jatu kenaxun 5 Josuén jatu yunukin: “Ana chintunbain Jene Jordán namakis Diosun jancha aduni bau ia mapuabu anu buxun Israelin 12 juni bake matun xenipabu tibitun enabu xukua tibibun mishki bestichai iatankanwen. 6 Ja mishki man bitanxu jawen unanmati inunbadikiki. 7 Chipu matun bakebun matu yukakin: ‘Na mishki kekua bestichai tibidan, ¿jawamen?’ ikubainaibu jawen jatu yusinkin: ‘Nun jene pukebidanaitian Jehován yubati jancha aduni bau jabu bebunkidi buaibun bai matajaidabiaken ja jene jamebi paxkaniwen taexun na mishki tibi bitan nun nichiniki’, akin man jatu yuikubainxanaii. Januxun nukunabun uinkin jau shinanpakexanunbun jabundi jatu yuinunbadikanikiki”, jatu wa

8 jawen jancha ninkaxun jaska Jehován Josué yunuxu keska wakin 12 mishki Jene Jordán namakisa Israelin enabu xukuabu tibibun jatu bixuan janu uxaibu anu buxun manchintan 9 januxun ana jene namakis anudi Jehová jatube yubakani jancha aduni bau ia mapukanxu anudi 12 mishki ewapa Josuén jatu manchinmadianikiaki. Jene medan jikibain ja mishki manchinibu mania tsuabunda uindiatidubuki.

10-11 Jaska Moisin Josué yunuima ikis jau anun Jehován Josué yunua jawenabu imakin Josuén keyudiama Jene Jordán namakis anu Diosbe jatu janchaxunikabun jawen jatube yubakani jancha aduni bau ia manayuaibun Israelin enabu jawaida jabu dukun pukebainaibun 12 ja dikabi jaska Moisin jatu yunuima keskai Rubén enabu xukua junibus inun Gadin enabu xukua junibus inun Manasésin enabu xukua junibuns jatun detenametiya bui jatunabu xukua betsabu jatu medabewai bebunkidi jabudi pukebaini 13 40,000 detenamenikabu mapeketans nawabube Jehová detenamexuni bui Jericó besusi mai panpa anu jikiaibun 14 Moisés jiwexun jatu yunua ninkai jaki mesekubidanimabu keska wamakin na jabiatian Jehován Josué amai uinkanxu jawenabundi jawen jancha ninkakin jau jakidi pe shinankubainunbun jaska Jehován amanikiaki.

15 Jehován Josué ana yuikin: 16 “Jene Jordán namakis anua jau mapekebidanunbun en jatube yubakani jancha aduni bau iabu jatu kenawe”, aka 17 Diosbe janchaxunikabu Josuén yuikin: “Jene Jordán namakis anua mapekedi bekanwen”, jatu wa 18 pukebidani jene anua jawaida mapekei metuanu maputanaibuns manankidia jene ana tuebidani matajaidanikiaki, pukediabuma ixu keskaidan.

19 Badi bena jawen uxe ja dukun jawen día 10tian Jene Jordán pukei mapekebaini mai panpa anu Jericó badi juaikidi Guilgal anu kai jikixun jatun tadi jiwe ana puntebaunabun 20 Jene Jordán namakis anua 12 mishki tunku ewapa iabainabu Josuén manchinkin sedentan 21 jawenabu yuikin: “Chipu matun bakebun man jawen ibu tibi matu yukakin: ‘Na mishki ewapa nichinkin sedenibu ¿jawamen?’ ika yuka inunbadikanikiki. 22-23 Jaska yuka ikaibun jatu yuikin: ‘Nadan, nukunabu Jene Jordán namakis netsua anua bexun manchinibuki. Jaska nukubudi Ianenwan Tashipa bai waxun Diosun netsukin taxka wa nun pukeni unantiki’, akin jatu yusinkubainunbadikanwen. 24 Diosun matu jaska waxuniwen taexun mai jidabi anu jiwebaunabun matun mekenika Dios Jehován kushipa unanxankanikiki. Jaskawen taexun matun mekenika Jehová duawakubainxankanwen, jeneamadan”, jatu wanikiaki.