Jene Jordán pukenibukiaki, na janchadan
3
uxashini penama Josué jawenabube bututan Sitim anua bui Jene Jordán pukediama jene kexa anu niti itushitan jatun tadi jiwe ana puntebaunabun 2 janua xaba dabe inun besti jatun tadi jiwe tibi anu buaketankin jatun xanen ibu bexmasbun jawenabu 3 jatu yuikubaunkin: “Nukun mekenika nukube yubakani Dios Jehován jancha aduni bau Levín enabu Diosbe nuku janchaxunikabun buaibu uintan nenua matudi bukin jatu chibanxankanwen. 4 Jakia jaskaida jatu dapijaida buama benanta duakabi bukin jatu chibankubainxankanwen, 1,000 metro niti ikubainidan. Jadidi nuku iyuaibu jatu uintan jatu chibankubainxankanwen, jadidi nuku iyuaibu ja bai man unanmakidan”, jatu wakeakeaibun5 januxun jawenabu ichawaxun Josuén jatu yuikin: “Meshukidi matun besuubi Jehován jawen kushipawen jaskabiama wakin matu dami waxunxanaiwen taexun Dioskidi besti shinain pepa bestiyukanwen”, jatu watan 6 jatube uxashini bestenkauan Diosbe jawenabu janchaxunikabudi Josuén yuikin: “Nukun mekenika nukube yubakani jancha aduni bau iabaini nukunabu bebun matu dukun pukui taebainxankanwen”, jatu wa ja jatube yubakani jancha aduni bau ji dabe jaya jawen iabaini jatunabu bebuxuni jenekidi bui taeaibun 7 januxun Jehován Josué ana yuikin: “Minabu en mia jatu kayati wamakin na jabiatian en taewaii. Unudi min xanen ibu kushipai en mia ewawamabainkin jatu uinmakubainxanaii. Jaska en Moisés medabewakubidanima keska wakin minabun bedubidi xanen ibu kushipa wakin mibe nixun en mia medabewakubainxanaii. 8 Ja dikabi en matube yubakani jancha aduni bau ja jawenabu ebe janchaxunikabun buaibu jatu yunukin: ‘Jene Jordán kexa pukui taekain jau niti ixanunbun’, jaska ea jatu yuixunwen”, aka jabias jancha jatu yunutan
9 jawenabu ichawatan Josuén jatu yuikin: “Jehová Diosun jancha ninkai eanu bekanwen”, jatu wa bea ichabu 10-13 jatu yuikin: “Uinkanwen. Mai jidabi jatun dami wani jawen ibu jatube yubakani jancha aduni bau matu bebun bebunkidi Jene Jordánkidi pukui bukanikiki. Ja bau iabaini bui Jene Jordán anu Diosbe matu janchaxunikabu pukutanaibun jene dami jamebi paxkai ja jene manankidia kushibidani niti ika pes daka uinkin Dios jiwea matube nia kakunkainai man uinxanaii. Januxun jatun matu medabewakin Canaán nawabu inun, Hitita nawabu inun, Heveo nawabu inun, Ferezeo nawabu inun, Gergeseo nawabu inun, Amorreo nawabu inun, Jebuseo nawabu matun bedubi nichinkin jatun mae tibi matu mebinxunkin matu ibuwamaxanai man uinxanaii. Jaskaken man xukua tibi anua juni bestichai tibi katukanwen, 12 juni kushipabudan. Ebe buaibu daya betsa en jatu yunuxanaii”, jatu wa
14 januxun jatu jaska washina jatun tadi jiwe pewaibun jau Jene Jordán pukei bununbun jatu bebuxunkaini Diosbe jatu janchaxunikabu Dios jatube yubakani jancha aduni bau iabaini bui 15 jeneki kematan ja jabun bau iabaini pukenun ika jatun tae pukuaibun janu jatun yunu tsekatitian jene bai matakin mai achibidanmistian ma iki jene bai matai kushipaya 16 jene dami jamebi paxkai niti iki detenamenikabun mae kushipa Saretán dapi mae betsa Adam anu manankidi chitei ian keskaya janua jene maikidi netsubaini Ianenwan Mar Muertokidi bui netsui xa ibainaya Jene Jordán namakis Dios jatube yubakani jancha aduni bau ia niti ika mapuyuabun bai mata netsui keyua mae Jericó besusi jene taxkanun Israelin enabu jawaida kapukei pukebainaibun 17 dasibi Israelin enabu pukei keyudiabumaken Diosbe jatu janchaxunikabun Dios jatube yubakani jancha aduni bau iaxun jene netsua tsusin namakis anu mapuxun jatu manayuaibun