—Ikis meshu medan Israelin enabu dabe nuku june uinun ika Rahabin jiwe anu ma jikiabukiaki— aka 3 Jericó xanen ibun jatu yunua jawen detenamenikabu buxun jatun xanen ibu janchaxunkin Rahab yuikin:

—Nawa dabe mianu juxukiaki. Nedi nuku kainmaxunwen. Nuku june uinbaunun ika beabuwen taexun min jiwe anu jikikanxu nedi jatu iwewe— aka

4-6 detenamenikabu bediabuma jawaida jatu mistutan Diosun Israelin enabu duawamis Rahabin ninkaimaxun jawen jiwe sapa xeni mamaki jatu iyuxun jawen yumen wati basiwan badinwankin manchinshina naman jatu junekin adubiaxun detenamenikabu padankin Rahabin jatu yuikin:

—Chanima juni dabetun ea uinwanxuki. Jakia jadakidiada beabu en unanma ixuki. Badi jikiaya nukun mae jikiti xui tibi man bepumis ma kemaya nenua taxnibainkanxuki. Jadakidi buaibu en unanmaki. Man jatuki nukukatsis ikaidan, jawaidabain jatu chibantankanwen— jatu wa

7 jawen jancha ikunwain Jene Jordán pukea baikidi jatu achinun ika benai detenamenikabu kushibain uintankin bechiama juxun jatun mae mishki kenebaunibu anu jikiti xui tibi ma jawaida bepuabu 8 Israelin enabu dabe uxadiabuma jawen jiwe sapa xeni mamaki Rahab ana inaxun jatu yuikin:

9 —Na mai pakea Jehová Diosun matu ibu wamaikiki, en unanan. Dasibi nenu jiweabu nun datei keyuaii, matuwen taeadan. 10 Jaska Egipto anua man paxaibu Jehován Ianenwan Tashipa matu paxkaxuna man pukebidani inun Jene Jordán ukedi kexa betsaudia Amorreo nawa xanen ibu dabe Sihón inun Og jatunabube man jatu yamawaimaidan, nun unaiin. 11-12 Man jaskakubidanai ninkai nukun juinti nishma matu tsuan binutidumawen taea tsua nun ana shinan chankanbumaki. Matun mekenika Dios Jehován jamapai nai anu inun jamapai mai anu mekenika menan datan akin na jabiatian ea yubadikanwen. En matuki chanichakama adukin duawaxunwen taexun en epan enabu man duawaxanun Jehován kenawen ea yubakanwen. 13 En epa inun, en ewa inun, en puibu inun, en betsabu inun, jatun enabus jau mawayamaxanunbun man jatu deteama ixanai chanima janchawen ea yuikanwen— jatu wa

14 jawen jancha bechipaikin betsan yuikin:

—Min nukukidi jawa jatu yuiama nuku tenanbumawen taea mia inun minabudi man mawama ixanaii, nukun jiwea inananain keskaidan. Na mai pakea inun min mae Jehován nuku ibu wamaya miwen nuikin nun mia duawaxanaii, mia padanmadan— aka

15 ja mae mishkiwen kenekin kebenbaunibu mamaki ja ainbu ibuan janu jiwe waniwen taexun janu uinti xui manaundi anuxun xabakan meshu medan tsuan uianma dispiwen jatu butumakatsi 16 Rahabin ana jatu yuikin:

—Jau matuki nukuyamanunbun mananan paxai buyutankanwen. Janua xaba dabe inun besti jadi juneyuxankanwen. Matu benabaunkin keyutan chintunbidanaibun ukedi ana man pukebaintidubuki— jatu wa

17-18 jatu butediama jabun kemakin:

—Nukun detenamenikabube na mae ewapa anu nun jikiaya na uinti xui anu min nuku butuai anu jabianudi dispi tashipa paninwanxun min epa inun, min ewa inun, min puibu inun, min betsabu inun, minabun enabus min jiweanu jatu ichawaxanwen, ja dispi tashipa panian uinkin jau tsuan matu meyamaxanunan. Jaska nun mia yunuai min akamaken min nukube yubakaxu nun mia axuntidumaki. 19 Jabiatiandi tsuabuda min jiwe anua taxnibainabu nukunabun jatu deteabu minabu mawa ibubis jatuna ixankanikiki. Jakia min jiwe medanxun nukunabun minabu deteabu mawaibun chakabudan, nukuna ixanikiki. 20 Jakia ja dikabi nukukidi min xanen ibu min yuiaidan, jaska nun mibe yubakaxu nun mia apanan jaska min chanichakai unantan nun mia medabewama itiduki— aka

21 —Peki. Jaska man yuiai jau jaskaxanunwen— jatu watan nichinkin jawen jiwe manaundi uinti xui anua dispiwen jatu butea buaibun jawen uinti xui anu Rahabin dispi tashipa paniwan

22 mananan ja dabe mapekeshina jadia xaba dabe inun besti juneyuabu jenekidi bai yusiudi inun yusmaudi jatu benajaidabiabu jawa jatu bechiabuma jatu bena keyubidani atimas jatun mae Jericó anu chintunbidanaibun 23 janua mananan bushianbu bututan ja unantinanikabu jene pukebaini jatun xanen ibu Nunen bake Josué anu jikixun jatu jaska washinabu jabun banabimakin 24 bestichaitun yuikin:

—Chanimaki. Ja mai jidabi Jehován nuku ibu wamaikiki. Ja dikabi dasibi janu jiwebaunabu nukuwen taea datei jatun juinti nishmai ana kushipa jayama punu nukai keyuabukiaki— aka