2 “En tsuma Moisés ma mawashinaki. Jene Jordán mian minabu jatu pukemabainxanwen. Maiwan pakea en matu ibuwamaxanai anu jaudi minabu Israelin enabu dasibi jatu iyuxanwen. 3-4 Jatixun tsua jiweabumanu kexa inun Líbano mai mati matipa pakea kexa inun badi juaikidi jenewan Éufrates kexa Hitita nawabun mai pakea badi jikiaikidi Ianenwan Mediterráneo ewapajaida kexa kesukauna ja dasibi namakis matun maiwan pakea ixanikiki. Ja kesukauna anu janu man nixanai anu jaska en Moisés yubani keska wakin en matu ibuwamakubainxanaii. 5 Min jiweyua jatube detenameaya tsuanda mia binutidubumajaidaki. En Moisés medabewakubidani keska wakin jabiaskadi en mia medabewakubainxanaii, putakin jawa jenebainamadan. 6 Ja min xenipabu jatu ibu wamakatsi en jatu yubani anu minabu iyukin mai pakea tibi min jatu ibuwamakin paxkaxunxanaiwen taea kushipai jawa dateama chintuntaskayamaxanwen. 7 Jaska besti en mia yunuaii. Kushipajaidai jawa dateama janida min kai anu unanepai ja min janu kai anu inun min jawada akai anu ja baiwen kai yusiudi inun yusmaudi dabekeama keskakin jawen yunuti jancha inun jawen nemati jancha en tsuma Moisin mia yusinmadan, chibanjaidakubainxanwen. 8 Na jabias yusinti janchakidi xaba inun meshu medan shinankin jakidi minabube janchakin jenetaskayamaxanwen. Jaska wakubaini unanepakin en jancha min akubaintiduki. 9 Janida min kai anudan, eadan, min medabenan Jehová Dios en mibe kaya juinti nishmai jawa dateama kushipai mentsisipakunkainxanwen, ean en mia yunukin nichiainwen taeadan”, aka

10 januxun jawenabu xanen ibu bexmasbu dasibi ichawaxun Josuén jatu yunukin: 11 “Matunabu anu kakunkaunkin jatu yunukin: ‘Jaudi nukun mekenika Dios Jehován nuku ibuwamaxanai anu jawen kushipakain nun jatu mae mebin bununbun matun piti bawakin pewatan mabudi dasibi pewakanwen. Xaba dabe inun bestitian Jene Jordán nun pukei bukanaii’, akin kaxun jatu yunukanwen”, jatu watan

12 januxun Israelin bake iyua Rubénen enabu pakubainaibu xanen ibubu inun jawen bake betsa Gadin enabu pakubainaibu xanen ibubu inun jawen bake Josén enabu paxkani, jawen bake Manasésin enabu pakubainaibu xanen ibubu besti Josuén jabudi yuikin:

13 —Jehován tsuma Moisin matu yubakin: “Jene kexa nekedia matun mekenika Dios Jehován nawabun mai pakea ma matu mebinxunshinaki. Natian matunabu ukedi jiwexanaibu anu man jatu medabewakin keyutiduki. Jaska watani man bea na mai pepa nekedi Diosun matu ibuwamakin keyushina anu janu chintunkidan man janu juindukunxankanaii”, akin matu yuimadan, ikis shinankanwen. 14 Jaskaken nenu na mai pakea anu Moisin ma matu ibuwamaima anu matun ainbuaibu inun matun bakebu inun matun inabu bashiyubainxankanwen. Matu juni kushipa detenamenikabu besti matun detetiya bui matunabu xuku betsabube jusikain bebunkidi puketan jatubetan nawabu detekin jatu nichinxunkin medabewayukubainxankanwen. 15 Janida Jehová Diosun jatu ibuwamaxanai anu jabudi juindukunun ikaibu jaska matu waxuinma keska wakin Jehován jatu medabewakin keyuken jatianda besti nekedi Jene Jordán badi juaikidi Jehován tsuma Moisin matu ibuwamaima anu matun mai pakea anu jiwei man chintunxanaii, janu juindukuinan. Matunabu xukua betsabu jatun mai pakea tibi ibu wakin keyudiabuma jatu medabewayukubainxankanwen— jatu wa

16 Josuén jancha ninkatan xanen ibu dasibibun jabiaskadi shinainbun xanen ibu betsabu janchaxunkin Josué kemakin:

—Jawada jaska shinankin min nuku yunua nun mia axunkubainxanaii. Janida min nuku yunuai nun kakunkainxanaii. 17 Moisin jancha nun ninkakubidanshina keska wakin miandi min nuku yunuai nun mia chibandiakubainxanaii. Eskakidi nun mia shinaiin. Moisés medabewakin amakubidanshina keska wakin min mekenika Jehován jau mia medabewadiakubainunwen. 18 Tsuabunda min yunua danankin mia axuanma jau mawaxanunbunwen. Jakia mia ikidan, nuku xanen ibuxuni kushipai datetaskayamaxanwen— akabu