—Mishki sapa dabe ibubis mexte dabewe, jaska ja dukun en mia inanshina keskadan, jaki en mia ana jancha kene bena waxuainan, ja ja dukun jancha en ashian min puta dudukui sa ishian keskadan. 2 Jaska wakin pewatan penaya meshukidi mishki bena dabe bui Mati Sinaí mapetan ja mamaki ea bebun nixanwen. 3 Tsua jau mibe mapekeyamaxanunwen. Ja dikabi minabun mati uin jau mapekeyamaxanunbunwen. Jaska inun, matun inabun basi pi jau mati bebun mapuyamadiaxanunbunwen— aka

4 jaska Diosun yunushina keska wakin mishki tude sapa dabe jatiu dabes ja dukun Diosun ashian keska wakin pewatan uxashini ma penaken bututan mishki sapa dabe bena tsumatan bui Mati Sinaí anu mapekea 5-6 janua nai kuinwen Jehová bututan Moisésbe nitan ja bebun dainbainkin Moisés jui kushipawen jawen kena kayabis yuikin:

—Eadan, ¡Jehová Dios Jamebi Jiwemis en eaki! En nuikipa pepa inun en jin jinma inun en chanichakaisma inun en nuikipa itamamaki. 7 1,000ti pakea pakubainaibu en nuikipawen kaneama en jatu mekepakemiski. Jatun chakabu jakimaidan, sinatabiaibu inun chakabuaibunan. Jakia tsuanda chakabuwaken jawen kupitiwen en nuitidumaki, ja chakabu shinankin jatu kupikinan, jatun ibubu inun, jatun bakebu inun, jatun bababu inun, jatun bababun bakebu jatube en kupipakexanaii— ikaya

8 jaskai ninkatan Moisés jawaida main di itan beuxun Jehová kenwankin 9 yuikin:

—Jehováan, ¡miadan, Jehová Dios Mimebi min Jiweaki! En mia benimawamiswen taea chanima nukube kaxanwen. Ja enabu juinti kushibuki. Jaskabiaken nukun chakabu nuku buaxuntan ana minabu nuku wadiwe— aka

10 januxun Jehován Moisés ana jancha wakin yuikin:

“Natian ana minabukidi en mia yubai ea ninkaidawe. Jaska en kushipawen en matu axuain dami ichapa dasibibun uinxankanikiki, jaska nawa betsabun uianma ipaunibudan. En jatu e imaiwen taexun janida man bukubainaibu anuxun en kushipa dami ichapa nawa betsa betsapabun uinkubainxankanikiki, en pepa matu anuxun en jatu uinmakubainaidan.

11 Natian jaska en matu yunuaidan, chibankin akubainxankanwen. Eanan, jatun mae tibi matu mebinmakin matun bedubi en jatu nichinkubainxanaii, Amorreo nawabu inun, Canaán nawabu inun, Hitita nawabu inun, Ferezeo nawabu inun, Heveo nawabu inun, Jebuseo nawabudan.

12 Janu jikitan man jiwexanai anudan, jatube yubakanameyamaxankanwen, matunmebi mekeidan. Jamen man jatube yubakaidan, jatun beya matu beyawamatidubuki, chakabuwakinan, bidun medan jikia keskaidan. 13-14 Eadan, en Jehováki, en kena betsa en Dios Yaushinikawen taexun enabu yaushikin en matu mekekubainaiwen taexun jawa yushin betsa kenwanma jaska en matu yunuai keska wakin jatun kenwanti tibi tekekubainxankanwen. Jatun yushin kenwanti chi tapu tibi yamawakin jatun yushibu shinanmati mishki keyatapa mapuabu inun jatun kenwanti ji medibi mapuabu dedakin keyukubainxankanwen, mae tibi anuadan.

15 Ja dikabi ja mai pakea anu jiweabube yubakayamaxankanwen. Jabun ea danankin jamapai shadabu yushin kenwankin jatun chi tapu anuxun jatun yushibu kenwanti piti pewatan matu pimakatsi kenabu jatubetan pikin man ea jakimatidubuki. 16 Jatube man yubakaken januxun matun ainbu bake jatun juni bakebun jatu ainwantidubuki. Januxun ja nawa chipashbu jatu ainwanbu jaska jatun beya chakabu chibankin yushibu shadabu kenwankin matun juni bake padankin jatun yushibu jatu kenwanmatidubuki, matun juni bakebu jabun ea dananmakinan.

17 Ja dikabi mane payukin chakan chakan axun ja kenwanti dami ana akin metaskayamaxankanwen”, atan

18 ana jatu yuikin: “Jaska en matu yunuima jakimama matun misi xaxama pi besikin akubainxankanwen. Jatian ja misi xaxama man piaidan, ea shinankin 7 xaba akubainxankanwen. Uxe Abib anu Egipto anua en matu taxnimabidanimawen taexun año tibi uxe Abibtian apakekubainxankanwen, janu jawen unanmatikidan.

19 Ja dukun man bake wa matun juni bakebu kain taeadan, dasibi ena dukun ikubainxanikiki. Ja dikabi matun ina awa inun, matun chaxuwan inun, matun cabra benes jabu dukun kaianbu dasibi enasdiki. 20 Jakia asno bake bene ja dukun kaian enabia ibu wakatsis ikin ja asno bake xantukun chaxuwan bake bene kasmai cabra bake bene maewatan ea inankubainxankanwen. Jamen chaxuwan bake kasmai cabra bake man ea inankatsi ikamadan, asno bake kaians tetux akubainxankanwen. Ja dikabi matun juni bake tue bena ja dukun kaian enabiaken man ibuwakatsis ikin jawen xantukun chaxuwan bake man ea inantiduki. Jamen jawen inankuin man ea bexuanma matun juni bake janu eki nukuti jiwe anu iwexun man ea uinmatidumaki.

21 Semana tibi 6 xaba besti dayakubainxankanwen. Jakia séptimo xabatian ea kenwain janu xaba bestichai anu juindukunkubainxankanwen. Daya ichapa man jaya miban banaitian inun bimi tsekatitianbiaken jawen nuiyama séptimo xabatian janu juindukunkubainxankanwen, ea shinainan.

22 Ja dayakin man yunuima ja dukun xekiwan kaniai man tseka taewaxanaitianan, semana jidabi besikubainxankanwen, janu besti Besiti Semana wakinan. Ja inun, matun yunu dasibi ichawakin adu keyutan benimai besidiakubainxankanwen. Año tibi Pascuatian inun, Besiti Semanatian inun, Yunu Adukin Meneaitian shinain jaska tibi wai besikubainxankanwen, jakimamadan.

23 Man jaska tibi akin betsa betsapa wai año tibi dabe inun bestiki janu eki nukuti tadi jiwe anu bedunanbu inun juni ewabu dasibi ea Jehová Israelin enabu mekenika Dios bebun ichakubainxankanwen. 24 Man jaskakubainaibu matu bebunxun en kushipawen nawa xukuabu tibibun mae matu mebinmakin en matu nichinxunkubainkin matun mai pakea ana ewapa wakin en jatu mesewaiwen taea tsuan matun mae biantidubuma ixankanikiki. Jaska jakimama ja dabe inun bestiki ea kenwain ea beyusxuni ichai año tibi ikubainxankanwen.

25 Ea duawakin benimawanun, iwanan, matun inabu ea kuaxunkinan, jawen jimi bixun misi xaxayabi jawen jimi jusitan ea inankuinyamaxankanwen. Pascuatian Egipto anuxun matun jiwe tibi en detenika nai tsuman dunkebaini shinankin chaxuwan jiki keunxun xuitan pikin keyukin meshukidi pikatsi texe mekeyamakubainxankanwen.

26 Badi tibi dayakin matun bai anu jawada miban ja dukun man banaima iki taeai kaniai piama man ea bechipaiai ea unanmakin janu eki nukuti jiwe anu matun yunu bimi bexun jau ea bixununbun ebe matu janchaxunikabu inankuinkubainxankanwen.

Cabra bake pishta detetan jawen ibuan chuchuki jawen nami bawataskayamaxankanwen”, itan

27 Jehován Moisés yunukin yuikin:

“En yunuti inun en nemati jancha jakimatima mia inun minabu Israelin enabu dasibibube en mia jatube yubakubainxu ea kenexunwen”, akin mati anuxun Jehován Moisés yunua

28 jadia Jehová Diosbe Moisés niti ishian 40 xaba inun 40 meshu jawa piama jawa unpax akama jiweyuxun ja jawen yuba jancha yunuti inun nemati mishki tude sapa dabe benaki 10 jancha Moisin kenekin keyutan 29 Mati Sinaí anua Diosun yuba jancha unanti mishki sapa dabe bakebidani Moisés butui Jehovábe janchakunkainshinawen taea jawen besu chaxa chaxa ibiai jawa unanma jui 30 Moisés jawenabuki kemaya Aarón jawenabu Israelbubetan Moisin besu chaxa chaxa ikai uin jaki datei jaki kemabumaken 31 januxun Moisin jatu kena Aarón inun jatun xanen ibubu Moiséski kematan jabe janchai bei jaki ichabun 32 chipu jawenabu dasibi mae jidabi anua bei Moiséski ichai jaki dasidiaibun Mati Sinaí anuxun jaska Jehován jawen jancha yunushina dasibi jatu xabakabi unanmatan 33 jaska jancha jatu yui keyutan jawenabu mesewakatsi ikama jawen tadi tuaxwen beyabukuken 34 janua Jehovábe janchai kanun ixun pekabaini Dioski nukuti tadi jiwe anu jikia janu jabe janchai keyutan ana taxnitan jawada Jehován yunuxu inun nemaxu jatu unanmakubainikiaki. 35 Janua jawen besu chaxa chaxa ikai uin jaki dateaibuwen taea jawen tadi tuaxwen beyabukukunkainikiaki, janu Jehová Diosbe janchamatianan, janu Jehovábe janchai kaitian pekatantanidan.