Jau bununbun Jehován jatu yununikiaki, na janchadan
33
Jabiatiandi Jehován Moisés ana yuikin:—Minabu iyui nenua kadiwe. Ja dukun Abraham, ja kachu jawen bake Isaac, ana ja kachu jawen baba Jacob en yubakin: “Na mai pakea jidabi minabu en ibu wamaxanaii”, akin ja dabe inun besti jabiaskasdi en jatu yubani anu minabu Egipto anua min jatu taxnimabidanima jatu iyuditanwen. 2 En nai tsuma kushipa jau jatun matu medabewakubainun matube en yunuxanaii. Man jadidi kanun jau jatun matu bai mextemabainkin nawa tibi jatun mai pakea anu Canaán nawabu inun, Amorreo nawabu inun, Hitita nawabu inun, Ferezeo nawabu inun, Heveo nawabu inun, Jebuseo nawabu matu nichinmaxanikiki. 3 Ja mai pakea anu man kaidan, janu inapan chuchu inun buna bata jamen ichakayamai anu man piti pepa jayaxanai anu bukanwen. Jakia eadan, en matube kamaki. Minabu patapabube kakin bai namakixun en jatu yamawakatsi ikamaki.
4-5 Eska ea jatu yuixuntanwen: “Man ninkaismawen taea matube en kamaki. Chai matube kadiama: ‘Matu yamawanun’, iwanan en shinantiduki. Jaskawen dabanan en matu pewakin en jaska waxanai en unanxanun matun shinan chakabu jakimatan matun mane dauti dasibi pekakanwen, ana saweamadan”, akin jabias jancha minabu ea banabimaxuntanwen— aka butuxun jawenabu ichawaxun jaska Jehován yuixu Moisin jatu yuia jawen dateti jancha ninkatan juinti nishmajaidakin jatun mane dau yaushijaidabiakin pekakin keyunibukiaki.
6 Jaska janchawen taea Mati Horeb jawen kena betsa Sinaí anuxun jatun mane dau Israelin enabun peka keyunibukiaki.
Janu Dioski nukuti tadi jiwe taewanibukiaki, na janchadan
7 Ja mae anua janida jatu iyudiama tadi jiwe wati bixun jatun mae dapi benanta Moisin jatu puntemaxun kenakin: “Janu Dioski nukuti tadi jiwekiaki”, aniki, jaskaken Jehová anua jawen jamapaikidi unankatsi iki janu buxun manatidubudan. 8 Janua janu Dioski nukuti tadi jiwekidi Moisés kaya yudabu benia jatun tadi jiwe jikiti xui anu kaian nixun uinkin tanaibun 9 ja tadi jiwe medan Moisés jikiaya nai kuin butukidan tadi jiwe jikiti xui anu nia nai kuin medan junebia Jehová Moisésbe janchaya 10 nai kuin jaskakidan beputi anu niti ika niken yudabun uin jatun tadi jiwe jikiti xui anuxun Jehová kenwain dasibi danti ikabu
11 tsuada jawen jaibube janchamis keskai benichimea Jehová Moisésbe janchapaunikiaki. Jaskatani Moisés jawen jiwe anu chintunkidanaya janua jawen medabewanika Nunen bake bedunanan Josué ja jiwe anua kainkin jenebidanama ipaunikiaki.
Jehován besu chaxa chaxa ikai uinbiai jawen besu Moisin uintiduma inikiaki, na janchadan
12 Chipu janu Dioski nukuti tadi jiwe anuxun janchanamekin Moisin Jehová yuikin:
—Uian. “Minabu iyuxanwen”, akin min ea yuibiashinxun tsuan ea medabewaxanai min ea yunudiamaki. Jamen betsa ea yuikinan: “Min ea jaibuwani min eki chiti imis en unaiin. Min ea benimawamiski”, akin min ea yuidiashinaki. 13 Na jaska nun janchamisdan, chanimaki. Jaskawen taexun en mia ea aki ikaii. Jaskada min nukukidi shinainmenkain, juneama xabakabi ea unanmawe, nun padanananma ikunkainmis en jatu yuikubainxanunan. Ja dikabi Israelin enabu minabuki, shinanpakexanwen— aka
14 Jehován yuikin:
—Peki. Ea kayabis mibe kakin medabewakin en mia unanuma mekekubainxanaii— aka
15 Moisin kemakin:
—Peki. Mia min nukube kakatsi ikamadan, nenua nuku taxnimakin nuku nichinyamaxanwen. 16 Min nukube kama nukuwen min nuiai en unantidumaki. Jakia min nukube kai nukuwen min nuiai en unantiduki. Nukube min kaya ea inun minabudan, nawa betsa betsapabu anua mina wakin min nuku katunidan, dasibibu mai jidabi anuxun mikidi unankubainxankanikiki— aka
17 Moisin jancha ninkatan Jehován kemakin yuikin:
—Peki. Jaska min ea yukai keskadan, min ea benimawaya min kenawen en mia unainwen taexun jaska nun janchai en mia axunpakexanaii— aka
18 januxun Moisin ea akin:
—Jaskakenan, min besu chaxa chaxa ikai ea uinmawe— aka
19 —Tsuabuda en duawakatsi ikai en jatu duawamiski. Tsuabudawen en nuikatsi ikai, jatuwen en nuimiski. Ean besti en jatu katumiski. Jaskakin en kena Jehovádan, mia unanmakin min besuudi en pepa dasibi en mia dainmabainxanaii. 20 Mia xabakabi yuinun ea ninkawe. Tsuanda en besu uintan jiwepaketidumaki. Jaskaken en besu min uintidumaki.