—Ja Moisin Egipto anua jatun nuku taxnimabidanimadan, ¿jaskashinamen? Nun unanmaki. Jaskakenan, nukun mekenika yushin betsabu wakin nuku dami waxunwen, jau jatun iyukin nuku bebuxunbainunbunan— akabu 2 jatun jancha Aarónen ninkatan jatu yuikin:

—Oro pau matun ainbuaibu anua inun, matun juni bakebu anua inun, matun ainbu bakebu anua jatu bianbaunkin keyutan nenu eanu betankanwen— jatu wa

3 jatun oro pau peka keyuabu ichawatan juni dasibibun Aarón anu bebidan bebidankin inanbidanbidanaibun 4 Aarónen bitan oro pau dasibi mishki kuajaidatan jaki payukin chakan chakan akin ina awa baketiu wakin jawen xunpin wanti inun jawen mastatiwen Aarónen datsa datsa akin xunpin wankin ina awa bake dami waken dasibibun uinkin jatu yuikin:

—Israelin enabuun, uinkanwen. Nadan, nukun mekenika yushin dioski, jatun Egipto anua nuku taxnimabidanimadan— jatu abaunaibun 5 Aarónen jaskaibu uinkin dami bebun jawen kenwanti chi tapu watan jui kushipawen jatu banabimakin:

—Meshukididan, nukun mekenika yushin Jehová Dios benimawai nun beyusxanunbun ikis dasibi pewakanwen— jatu wa

6 uxashini penaya butuxun Dios kenwanti inun jawen daewati akin jatun ina ichapa tesenxun ja chi tapu anu ina janaxun menukin keyuken yudabu dasibi tsaubaunxun pikin mabex akin keyutan dasibi benimai beyusaibun 7 janua jaskaibun Jehován Moisés yuikin:

—Uinwen. Minabu Egipto anua min jatu iweimadan, jatunmebi chakabui benukanikiki. Jatu uin jawaida butukaintanwen. 8 Jaskai pe jiwebaintidubu en jancha dama en jatu yuibiashina jawaida ea jenei paxkatan orowen ina awa bake dami waxun inankuin inankin yuinaka menu keyukin yuikin: “Israelin enabuun, ninkakanwen. Egipto anua nukun mekenika yushinen nuku iweimatun dami itsaki”, akin ma yuibaunkanikiki, minabunan— 9 akin ana yuikin:

—Ja yudabu en jatukidi shinainan, mawa juinti kushijaidabu en jatu uiaiin. 10 Jawa jatuwen nuiyamawe, natian en jatuki sinatajaidaiwen taexun en jatu yamawaidan. Jatu yamawatan mia pajaida wakin minabu en mia ichapa waxunxanaii, jatu kushipa wakinan— aka

11 jawen mekenika Dios Jehováki datekin daewanun ixun Moisin eska jancha yuikin:

—Jehováan, Egipto anua minabu min kushipawen jatu uinmakin min jatu iweimadan, ¿jaskai min jatuki sinata chakayamai? 12 Egipto nawabun mikidi shinan chakakin: “Jehován jadixun jatu padantan mati matipa anuxun tenanun ixun jatu iyuimaxun mai jidabi anua jatu yamawashinaki”, ikin mikidi yuitidubuki. Mikidi jaska janchatidubuken jaska jatuki sinatai jenei bextekediwe, minabu min jatu chakabuwatikidi min shinanxudan. 13 Shinanwen. Miki chiti ikabu Abraham inun, jawen bake Isaac inun, jawen baba Israelin mia ninkapaunibu ja dabe inun besti ana shinankubainwen, jatu jakimamadan. Mian kayabis jabu tibi yubakin: “Bishiti wakin minabu en pajaidawakin na mai pakea jidabi en jatu yunua ibu wakubainxankanikiki”, jatu wakin min kenawen min jatu yubaniki. Jaska min yubani jakimama min shinan betsa wawe, jatuki sinatakin yamawamadan— aka

14 Moisin jancha ninkatan jaska jatu chakabuwati janchaxu Jehován shinan betsa wai bextekeaya 15-16 mishki sapa dabe waxun uke dabebi bishakin jawen jancha keneshinxun Diosun Moisés inan mebintan Moisés dabekekainkin jawen yunuti inun jawen nemati jancha unanti mishki sapa dabe bakebidani butukidanaya 17 januxun jawenabu sai sai ikaibu Josuén ninkakin Moisés juai yuikin:

—Nukun mae anua detenamei sai sai ikaibu en ninkaii— aka

18 jakia Moisin kemakin:

—Jaskamaki. Jatu binutan benimai sai sai ikaibu inun ma jatu deteabu bis bis ikaibudi en ninkamaki. Betsajaida en ninkaii— aka

19 jatun uxati tadi jiwe puntebaunabu anu jikitushitan ina awa bake oro dami kenwain nawaibu bechitan uin jatuki sinatakin mati tenanmanxun mishki sapa dabe bakebidanxu sanantan Moisin puta dudukui sa iki keyuaya 20 jaska watan jawaida oro dami washianbu Moisin tsumaxun chi anu napua oro dami ma menu keyua jatu dudumaxun janu unpax bimisbu anu jawen dudu jene anu sa sa akin jatun chakabu jatu unanmakin unpax oro dami duduyabi Moisin Israelin enabu dasibi jatu amakin keyutan 21 ja jaska jatu wamashinakidi jawen betsa Aarón Moisin ja akin:

—¿Yudabun mia jawa chakabuwamabu jatuwen datekin Dioskidi min jatubetan jawa chakabujaidawashinamen?— aka

22 Aarónen Moisés bepadankin kemakin:

—En xanen ibuun, eki sinatayamawe, na yudabun chakabu bechipaikin amisbudan, min unainwen taeadan. 23 Jabun ea yuikin: “Min betsa Moisinan, Egipto anua nuku iwebiaima jaskashinamenkain nun unanmaki. Jaskakenan, nukun mekenika yushibu dami nun uinkubainxanun nuku axunwen, jau jatun nuku mekebainkin iyuxanunan”, ea wabu 24 ea jaska yunuabu jatu yuikin: “Man tsuabuda oro pau jayabudan, ea bexunkanwen”, en jatu wa ichawatan ea inanbu chi jede ji ikai namakis en napua ja oro dami ina awa bake keska jamebi taxnishinaki— aka

25 juni betsa betsapabu Israelin enabuki sinatamisbu jatuki kaxetidubu Moisin unankin inun Aarónen jatu mekekin jatu jawa nemama jatun chakabu besti chibain beyakunkainai Moisin xabakabi uintan 26 jatun mae kexa nixun jui kushipawen jatu yuikin:

—Tsuabunda man Jehová chibankatsis ikaidan, nedi ea anu ichai bekanwen— jatu jawenchains akawan Levín enabu junibu dasibi bei Moisés anu ichaibun 27 Moisin jatu yuikin:

—Israelin enabun mekenika Jehován jancha matu yuinun ea ninkakanwen. Matun mane detenameti kenu chaipa bitan tadi jiwe tibi anu jikikubaunkin ja oro ina awa bake dami jabuan kenwain beyusi jenekatsi ikabuma jatuwen nuiama jatu detekin keyubauntankanwen, min betsabu inun, min jaibuaibu, inun mia dapi jiwebaunabudan— jatu wa

28 jaska Moisin jatu yunua ninkatan Israelin bake Levín enabun jabu chakabui patapaibu detekin 3,000 junibus tenankin Moisin yunua axunkin menexunabu 29 januxun Levín enabu Moisin yuikin:

—Natian Jehován jancha chibankin matun bakebu inun matun betsabu kupikin man jatu detexuwen taexun natian Jehován matu duawakubainxanun ika matu kushipawakin katuxuki— jatu wa

30 uxashini ana penaya jawenabu dasibi Moisin ana jatu yuikin:

—Jawen jancha danankin dami yushin watan kenwainan, Jehová ichakawai man jaki kaxejaidashinabuki, chakabujaidaidan. Nukun mekenika Jehová anu ana mapekexun daewakin matun chakabu jau matu buaxunun en matu yukaxuni kaii. En jancha ninkatan Jehován ana matu kupiama ixanimenkain, matun chakabu ana shinanmadan— jatu watan

31 Jehová anu ana mapekexun yuikin:

—Chanimajaida yudabun min jancha danain chakabujaidakin oro yushin dami watan ja kenwanshinabuki. 32 Jabiaskabiaken eanan, en mia jatu ea axuaiin. Min jatun chakabu buakin ana shinanma min jatu kupiamadan, jaska peki. Jamen jatun chakabu shinankubainkin min jatu kupikatsi ikaidan, minabu jawen tanati una anua en kena min eki kenenidan, en kena ea tede adiawe— aka

33 januxun Jehován Moisés kemakin:

—Jaskamaki. Tsuabunda ea danain chakabuwaibu besti jabuna besti en tede akubainxanaii. 34 Jakia natianan, en jatu kupiyuamaki. Jakia jadi en mia yuima anu minabu jatu iyuditanxanwen. Jau jatun mia medabewai bebuxunkainun en nai tsuma kushipa en mia yunuxunaii. Janu yudabu dasibi en jatu unanti waitian jabu chakabunibu jatun chakabuwen taexun en jatu kupixanaii— atan

35 januxun Israelin enabun jabun ja ina awa oro dami Aarónen jatu axunshina kenwanshinabu shinankin jawen jatu kupikin isin paepa jatu yununikiaki.