Janu Dioski nukuti tadi jiwe menenibukiaki, na janchadan
40
16-17 Egipto anua taxnibidanimabu badi bestichai nichintan ana badi betsa taekainaitian uxe ja dukun taeaitian inun jawen día taeaitian jaska Jehován Moisés uinmakin yunuima keska wakin janu Dioski nukuti tadi jiwe wakin nichinkin taewaima menenikiaki. 18 Moisin Dioski nukuti tadi jiwe jaska washinxun jaki taewabaunkatsi ji tuax tsaminkin keyutan jawen xau keyan keyutan januxun jawen chibu tibi beni keyutan 19 jawen tadi tuax ewapa ichapa punte pewakin tadiwen mamaki jatu mabemaxun jaska Jehován yunuima keska wakin Moisin jawenabu puntemabaunkin keyutan20 januxun mishki sapa dabe jaki jawen 10 jancha jawen yunuti inun jawen nemati ja tibi Dios yubakaima jancha Moisin bitan bau medan nanexun jawen bakebainti ji dabe bau xui anu mistutan jawen bepu kenadan, Dios nuiti watan bepukin achimatan 21 janu Jehová medibi jawen nukuti tadi jiwe medan Dios yubakati unanmati aduti bau bichikin jatu tsaunmaxun pakenkin tadiwen junekin jatu puntemakin jabias Jehová Diosun yuishina keska wakin Moisin jatu amatan
22 januxun janu Dios jaki nukuti tadi jiwe uke medan ja dukun dintu anu yusiudi nortekidi jawen kenwanti tapu jatu tsaunmakin dintu medibi xabakan jatu tsaunmatan 23 jaska Jehován yunushina keska wakin Jehová bebun pewakin jawen kenwanti misi tapu anu manchinkin kekunbaintan
24 januxun betsadi jaki nukuti tadi jiwe uke medan dintu medibi anudi tapu bebun ja dukun yusmaudi surkidi jawen kenwanti tapu jaki bin dekuti jatu tsaunmatan 25 Jehován uianyan jaska yunushina keska wakin jawen bin techiakeakexun jabiati deku keyutan 26 jawen yubani jancha unanmati aduti bau jaki juneti tadi puntea besuudi oro mane tapu pishta tsaunxun 27 jakixun ni pei ininti pepa kuati wakin jaska Jehován yunushina keska ni pei ininti eskadabes Moisin kuaxuntan
28 januxun jawen jikiti xui tadiwen kebenkin tadi jatu puntematan 29 januxun jaska Jehován yunushina keska wakin jawen jikiti xui besuudi jawen kenwanti chi tapu ewapa benanta jatu tsaunmaxun januxun Jehová benimawakin kenwankin inabu tesenxun menukin xekiwan dudu inankin keyunikiaki.
30 Jaska janu Dioski nukuti tadi jiwe inun jawen kenwanti chi tapu ewapa namakis anu janua chukiti mane kencha ewapa jatu tsaunmaxun jaki unpax jatu manemakin matawamaken 31 jaki chukiti unpaxwen Moisés inun Aarón inun jawen juni bakebu juchuki inun mepanutan 32 chipu jaska Jehová Moisés yunushina keska wai janu Dioski nukuti tadi jiwe jikikatsi inun jawen kenwanti chi tapu kemakatsi jatun tae inun jatun meken chukapaunibukiaki.
33 Jawen jenekin keyukin janu Dioski nukuti jiwe medan jawen kenwanti chi tapu jemaintin jatu wamatan jaki jatu kebenmabaunkatsi chibu jatu nichinmabaunxun tadiwen jatu dayabumatan jawen jikiti xuidi tadi betsawen jatu bepumatan
Janu jaki nukuti tadi jiwe Moisés axunshinanu nai kuinwen jua Jehová butunikiaki, na janchadan
(Nm 9.15-23)
janu Dioski nukuti tadi jiwe jidabi Moisin meneaya 34 jawaida janu jaki nukuti tadi jiwe anu nai kuinwen bututan Jehová jawen kushipawen chaxa chaxa ikin tadi jiwe medan matajaida waken 35 jaska uin Moisés jaskatan jikitima inikiaki, janu Dioski nukuti tadi jiwe mamaki nai kuinwen achimakin keyua Jehová chaxa chaxa ikin matajaida wakenan.
36-38 Badi ichapa jiwei maekubaunaibutian Israelin enabu dasibibun uiainbun janu jaki nukuti tadi jiwe medanua badidi Jehován nai kuin mamaki achima uinkin inun meshu medan chi jede jabianudi uinpaunibukiaki. Janua jatu maewakin iyuaitian ja nai kuin jiwe mamakia benibainaya Israelin enabun jatun tadi jiwe pekatan nai kuin chibain ana maekubainpaunibukiaki. Jakia nai kuin benikainamaken janu niti ika manixun nai kuin beniai Israelin enabu kayuama manayukubainpaunibukiaki.