Jaskanunbadiaibu jawen jenekin Jacobun jawen bakebu jatu jancha wanikiaki, na janchadan
49
januxun ana betsatian Jacobun jawen juni bake dasibi kenaxun jatu yuikin: “Ea anu ichakanwen. Man jaskanunbadiai matu bebunkidi yuinun ea ninkai bekanwen”, jatu wa ichabu 2 januxun jatun epan jatu yuikin:“En bakebuun, en matun epa Jacobki. En Israeldan, ea dapi ichaxun ea ninkakanwen”, ikin,
3 ja dukun jawen bake iyua Rubén yuikin:
“Epaan, min en bake iyuaki.
Ja dukun miki dukun dayai taekin
en kushipa bedunantun mia bawai en miki jinin taeniki.
Jaskawen taexun mia kushipawakin mia mekebaun en mia jatu binumaniki.
4 Jakia min ana jatu binui jaskatidumaki.
Mia ikidan, eskatian min jene bai matatan kushipamis keskaki,
tsuan mia nemapainun jaska shinanma
en ainin dayadu esclavabe eunbi chutakin
min ea dakejaidawaniwen taeadan”, atan
5-6 januxun Simeón inun Leví ja dabe jatu yuikin:
“Matudan, man jabias xankinki naneaki.
Matun detetiya mapua shinan chakakin
man jatu itimaska wabaunmiski.
Pubein jatuki sinatakin
junibu jatu tenantan
jatun ina awa man jatu bishten bishten akaniki,
man jatu jaska wain pe dabanenan.
Man jaska waniwen taea matunabube man ichaxun shinain anu en matube nashui itidumaki, dabinan”, iwanan,
7 “Man chakabu puben sinatapabuki.
Jaskawen taexun matunabu en sa axanaii,
matun betsabu manibaunabube matu jusikinan.
Matun chakabuwen taexun jau Diosun matu yupukin manakuxanunwen”, jatu atan
8-12 januxundi Judá yuikin:
“Epaan, miadan, min en bakeki.
Min betsabun mia duawakin
mia kenwanxankanikiki.
Miki sinataibu maemanun ixun min jatu temusxanaii.
Inu leónen baken mibikin achixun pia keska wai inun,
ana jawa bika teneama
yani wa inu betsa león ewapa keska min dakayuxanaii,
tsuan mia chikishwamadan.
Judáan, tsuan taska min kushipa minabu anua jatu mebintidubumaki.
Min mekenwen min xanen ibun mane mestenti min jayayukunkainxanaii.
Jakia ja mestenti ibu kayabi juxun minabu anua jatu mebinken
ja mae anuabun ja xanen ibu waxun kenwankin chibankubainxankanikiki.
Uva taxuki jawen asno bake tenextan
jawen tadi uva bimi tsinia tashipa buspuaiwen chukaxanikiki.
Jawen bedu jawendua uva jene keska meshupa inun,
jawen xeta awa chuchu keska juxupajaida inunbadixanikiki”, atan
13 januxun Zabulón yuikin:
“Epaan, miadan, ianenwan kexa minabu jiwexankanikiki,
janu xaxu ewapabu keti ikai anudan.
Minabun mai pakea kesuadan, mae ewapa Sidón anu inunbadikiki”, atan
14 januxun Isacar yuikin:
“Epaan, miadan, min dayakapaki,
yuinakapan xankama bumis keskadan.
15 Mae jawendua bechitan janu dayai
janu juindukunkatsi mabu xankama peubidankin
minabu jatu esclavo tsuma watan jatu yunua jawa yuiama minabun jatu dayaxunkubainxanikiki”, atan
16 januxun Dan yuikin:
“Epaan, minabu ikidan, janubi jawenabu xanen ibuxunxankanikiki, Israelin enabu xukua bestidan.
17 Dunu pianan bai kexa manixun
caballo tae chipun mextea keska wakin
ja juni jaki tsaua buaibu
minabun jatu pakexanikiki, jatu maemakinan”, akin
18 jawen mekenika Dios datan akin:
“Jehováan, min ea mekekubainxanai en mia manajaidaii”, itan
19 januxun Gad yuikin:
“Epaan, minabudan, nawa kushipabu bexun
jatun mae anuxun yumetsukin minabu jatu detebainxankanikiki.
Jakia jatu manakukin
minabun jatu chibanbainxanikiki, jatu maemai bukinan”, atan
20 januxun Aser yuikin:
“Epaan, mianan, misi betsa betsapa kemutapa ichapa minabu jayaxankanikiki.
Xanen ibun piti pepa jawendua jaya
jaska besti bawatan pi minabu jiwexankanikiki”, atan
21 januxun Neftalí yuikin:
“Epaan, miadan, chaxu betsa gacela tsuan achitiduma keskai
jawama nixun bake pepa jawendua bawai minabu jiwexankanikiki”, atan
22 januxun José yuikin:
“Epaan, miadan, miban jene kexa nia
min bimi paipaimaya keska
min punyan bukun ja kenekaunaki
min puea bimi xankama dunua keskawen taea minabu pajaidaxankanikiki.
23 Piayabun jatu danankin bechipaiama
minabuki pia bishkukin bikawabiabun
24 jakia jatun punyan punxukuama kushipakin
minabun jatu maemakubainxankanikiki.
¡Jacobun Dios kushipadan, pejaidaki!
Israelin mekenika kushipa en kenwaiin.
25 En mekenika Diosun mia ea medabewaxunmis en kenwaiin.
Dios kushipajaida dasibi binuatun
jau mia inun minabu duawakubainxanunwen.
Nai anua minabu jamapai inankin
jene medanua jatu inandiakin
bake ichapa jatu bawamakin
chuchu midima jatun bakebu amakin
jau minabu duawapakexanunwen”, akin
26 “Eanan, mia duawakinan,
en ibubun ea duawani keskama jatu
binumakin en mia pepawakin duajaidawaii.
Min betsabu anua mia katutan
Diosun mati jawa niti ikama bawanitun mia inun minabu pakubainaibu
jau matu duawakubainxanunwen”, atan
27 januxun Benjamíndi jawen jenekin yuikin:
“Epaan, miadan, min pubenki, kaman inu keskadan.
Jaskai jatuki sinataibu penaya jatube detenamekin
jatu maematan badi kaya jatun mabu ichawatan
minabun paxkakubainxankainikiki”, akin jaska jatu jancha wanikiaki.
28 Jatibuki, Israelin 12 juni bakebu xukua tibi jatun ibuan jabu tibi jau jaskanunbadinunbun jatu jancha tibi yuikin yunua akeakenidan.
Jacob mawashina mai wanibukiaki, na janchadan
29-32 Ana betsatian Jacobun jawen bakebu jancha wakin jatu yunukin: “Matu xunubaini ma enabuki en nukui kakatsi ikaii. En mawaya mishki kini tanpe medan en epabe ea mai wai buxankanwen. Canaán mai pakea anu Mamré dapi Macpelá bai depi mishki kini tanpe medan ea mai wai buxankanwen, mai wati bai bikatsi ikin peiwen taexun Hitita nawa Efrón anua en juchi Abrahamnen bini anudan, janu jawenabu mawa mai wapaketi bini anudan. Ja mai bikin taewaxun janu dukun jawen ain Sara mawa mai waniki. Janua jadi mawa jabianudi mai wadianibuki. Januxun en ibubu Isaac inun Rebeca mawa jabianudi en jatu mai waniki. Eandi en ain Lía mawa jabianudi en mai wadianiki. Ja mai wati anudan, jabianudi jatube ea mai wai buxankanwen”, jatu watan
33 janua Jacob jawen bakebu jancha wakin menetan ana dakai petan mawaya