—Matu medabewakubainkin en matu jawa chakabuwaismawen taexun ekidi shinankanwen, Faraón ea yuixunkinan. 5 En epabe en jabe yubakaima ma ea jenebainshina Canaán anu en mai wai kakatsis ikaii, jadi jawenabu mai wamisbu anudan, mai watani en ana chintunkatsis ikaidan— jatu wa jaska Faraón yuixunabu 6 januxun Faraónen José kemakin:

—Chanima peki. Kaxun min epa mai watanwen, jaska min epan mia yubashina keskadan— aka

7 jaska ninkatan Josén jawen epa mai wai kai jabun medabewai kakin chibanbaini Faraónen xanen ibu bexmas jawen jiwe anu jabe dayamisbu inun, xanen ibu bexmas Egipto anuabu jabe bui 8 Josén enabu inun jawen betsabu inun dasibi jawen epan enabu bukin Gosen anu jatun bakebu inun, jatun inabu besti bashiyubainaibun 9 jabiatiandi caballo tadantiyaki yuda midima inun caballoki katsaumeabu yudan kaian midimabun José chibain bui 10 mae Goren-ha-atad anu Jene Jordán anu badi juaikidi jikitan jadia Joséwen nuijaidai jabe icha kaxajaidakunkaini Josén jawen epa Jacob mai wabaintanxanun ika 7 xaba jawen epawen nui shinain kaxanikiaki.

11 Jaskaibun ja Canaán anu jiweabu jabun uinkin shinankin: “¿Jaskaida Egipto nawabu jawenabu mawa mai wai beshianbu nuichakatidubumadaka?” iwanan, janudan, Jene Jordán badi juaikidi ja mae kenakin: “Abel-misraimki”, anibukiaki, nukun janchawenan, “Egipto nawabu Nui Kaxachakatidubumaki”, akinan.

12-13 Jaska jatun epan jatu yunuima akin Jene Jordán pukebain Israelin yuda Canaán anu buxun Mamré badi juaikidi dapi Macpelá bai Hitita nawa Efrón anua jawenabu mawa janu mai wati tanpe Abrahamnen bini anu Israel jawen bakebun mai wanibukiaki, ja mai wati mishki tanpe kini medanan. 14 Jadi Josén jawen epa mai watani Egipto anu chintunkidani jawen betsabu inun ja jatibun chibanshinabuya jatun mae anu chintunibukiaki.

15 Janua jatun epa mawaimaken Josén betsabun shinan chakai yuinamekin: “Eskatianan, José nun ichakajaidawaniwen taexunan, nuku danankin nukudi kupijaidaxanikiki”, ikin 16 jawen betsabun juni betsa yunua kaxun José jabun yuixunkin: “Nukun epa ma mawa kemaxun nuku yunushinadan, 17 ¿nukun epan jancha ana mia xabakabi yuipa? akin eska mia yuikanxuki. ‘Min betsabun mia nuitapawakin mia ichakawanidan, jatuwen nuikin jatun chakabukidi en mia yuiai ana shinanyamaxanwen’, akin Jacobun nuku mia yuixunimawen taexun chanima nun mia ichakawabianiken nun mia yukai nukun chakabu ana shinanyamawe, nun min epan mekenika Diosun tsumabukidan”, ikanxu jaska yuiabu Josén ninkatan jatuwen nui kaxaya 18 janua jakimamadi jawen betsabu kayabi bua ja bebun daxka ikain beua beti ika manixun yuikin:

—Nukudan, nun min esclavoki. Nuku jaskada wadiwe— akabu

19 januxun Josén jatukidi jawa chakabu shinanma jatu yuikin:

—Eadan, en Dios keskamaki. Ewen taea datei meseyamakanwen. En matu kupiamaki. 20 Jakia matunan, chakabu shinankin man ea ichakawaniki. Jaskawen taexun Diosun ja chakabu mae wakin matu pepawaxuniki, natian man uiainan. Jati yudabu ewen taea mawama jiwekanimenkainan. 21 Jaskawen taea eki mesei dateyamakanwen, matuki pe shinankin matu inun matun bakebu en matu pimakin jiwemaidan— akin jancha pepawen jatu duawakin jawen betsabu Josén jatu daewanikiaki.

22 José inun jawen epan enabu Egipto anu jiweyukubainaibun José 110 badiyatun 23 jawen bake Efraínen bakebun bababu uinyukin jawen bake betsa Manasésin bake Maquirin bakebu uindianikiaki.

24 Januxun Josén jawen betsabu yuikin: “Mawakin en ma matu xunukatsis ikaii. En jaskabiaya Diosun matu medabewakin Egipto anua matunabu taxnimabainkin janu nukun xenipabu Abraham inun Isaac inun Jacob ja mai Diosun jatu yubani anu matunabu iyuxanikiki”, iwanan, 25 jawen betsabu inun jatunabu jatu yubakin: “Chanima jatianda Diosun matu medabewakin matu taxnimabainaya nenua en xau ea jeneama ea jadi bununbadikanwen”, jatu wa ninkaimabun jatube jiwea

26 janua José 110 badiya Egipto anua mawa jawen yuda chaputimawakin dauwen puxa keyutan yabu pewatan ji bauki jawen yuda nanenibu jawenabun jawen xau mekekubainibukiaki.