—Epaan, en mia jancha waii. Unu Canaán mai pakea anu mae Luz anuxun Dios kushipajaida dasibi binua eki nukutan ea duawakin eska ea jancha wakin yuikin: “Uinwen. Eanan, en mia bake ichapa inanxanaii. Min bababu paibu jabiabus en jatu xukua tibi waxanaii. Na Canaán mai pakea en jabus yunununbadiaii, niti akamadan”, ea waniki. 5 Eskaki, mia yuinun. Na min bakebu Efraín inun Manasés na Egipto anu en judiama min ea jatu bake bawaxuna kainyamabudan, ean en ibu waii. En bake Rubén inun Simeón keskai jabudi xukua tibi ixankanikiki. 6 Jakia en miki nukuaitian unudi min ea jatu bawaxunbainimadan, minaski. Jaskabia dasibi Diosun ea yubani jabun biama jakia jatun betsa Efraín inun Manasésin besti xukuabu anua jabun jatuna bixankanikiki— itan 7 jawen ain Raquelkidi shinankin yuikin: —Uian. Padán-aramkidia en chintunkidanaya bai puchinin mae Efrata kemayui ma Canaán anua min ewa Raquel mawaniki. Jabianudi en mai waniki, Efrata kemai anudan— anikiaki. Natianan, Efrata kena betsa wakin Belén wanixun kenamisbuki.

8 Januxun Israelin Josén bakebu jatu uinkin José yukakin:

—¿Nadan, tsuabu ikimenkain?— aka

9 —Nadan, en bakebuki, Egipto anuxun Diosun bebunkidi ja juni bake dabe ea jatu inanyamadan— aka jawen epan ana yuikin:

—Ja dabe nenu ea dapi jatu nichinwen, en duapa jancha en jatukidi janchakin yunuaidan— iki

10 Israel ma anibujaidai bexuxkin ana uin peamaken Josén jawen bakebu jawen epa dapi nichian jatu ikutan tantsu atan 11 jawen epan José yuikin:

—Min ma ea benuxuni dabanen en ikunkainmis en mia uiaiin. Januxun min bakebudi Diosun ea jatube mia uinmaikiki— ikaya

12 januxun jawen ibuan jawen bakebu xanshui ika Josén jatu xekakin benanta jatu nichintan jantsidi jawen ibu kenwain jawen beya keskawen main beti ika ibai benitan 13 benikauan jawen bake dabe metsuntan shinankin:

—Nukun beya chibankin en bake iyua en epan meken yusiudi bebun en nichiaiin, jau iyua dukun pewakin duajaidawanunan. Januxun en bake maxku jawen meken yusmaudi bebun en nichindiaii, jau ea dua midin waxununan— iwanan jawen bake maxku Efraín yusiudi metsuan inun jawen bake iyua ja kachukea Manasés yusmaudi metsunxun jawen epaki kema watan januxun Efraín Jacobun meken yusmaudi bebun nichinkin Manasés jawen meken yusiudi bebun jatu nichintushia 14 janua Israel jawen meken pekishkubain Efraín maxkuki jawen meken yusiudi mamepiaya janua Manasés iyuabiaken jawen meken yusmaudi mamepitan 15-16 Israelin José dukun pepawen duawakin eska wanikiaki.

17 Efraín jawen bake maxku Jacobun jawen meken yusiudi mamepia uinkin bechipaiama jawen ibuan meken yusiudi metsutan Manasés mamepinpaya 18 mestean dakaken Josén jawen epa yuikin:

—Jaskamaki, epaan. Min kaneaki. Na nekediaki iyuadan, Manasésdan, ja min meken yusiudiawen jaki mamepiwe— aka

19 jawen epan jaska wakatsi ikama nemakin yuikin:

—En unaiin, epaan. En unaiin. Ja iyua Manasésdan, jabiadi yudabu kushipabu midimadi ixankanikiki. Jakia na maxkunan, jawen betsa iyua binujaidaxanikiki. Jawenabu ichai pai yudabu xuku tibi mae midima ixankanikiki— atan

20 jabiatiandi Jacobun José ana jancha wakin yuikin:

—Diosun matu jaska duawaxanaiwen taexun matuwen taea enabu Israelbu pe yuinameaibu yuikin: “Diosun Efraín inun Manasés axuni keska wakin jau miwen taexundi adiaxanunwen, Diosunan”— akin Israelin Josén bake Efraín jawen bake iyua Manasés maemaxanai jatu yuinikiaki. 21 Januxun jawen bake José yuikin:

—Uian. En ma matu mawaxunkatsis ikaii. Jakia ewen dateyamaxankanwen. Chanima Diosun matu medabewapakekin ana nukun xenipabu jiwekubaunibu anu matu chintunwanxanikiki. 22 Miadan, min betsabu en mia jatu binumaii. Mae Siquem Amorreo nawabube yaushi detenamekin en bini en mia ja yunuaii— jatu atan