—Matun mae anua dayaidan, ¿jawa man imismen?— jatu wa januxun jabun Faraón kemakin:

—Xanen ibuun, min tsumabu nuku dayaidan, nun inabu mekenikabuki, nukun xenipabu ini keska dayaidan— atan

4 —Eskawen taea min mae anu mibe jiweyui nun juxuki, nukun mai pakea Canaán anua buni tenejaidai nuku inun nukun inabubetan jania jawa pitimadan— iwanan, janubi jawaida yukakin: —Xanen ibu pepatuun, ¿nukuwen dabanan ikin ja mae Gosen anu nun jiweyunun min nuku yunuyutidumen?— akabu

5 jaska wabu Faraónen José beiskin yuikin:

—Uinwen. Min epa inun min betsabudan, mibe jiwei bekanxuki. 6 Egipto jidabi min yunumiski. Jaskawen taexun Gosen mae pepa jatu yunuwe, jau jadi jiweyununbunan. Minabu juni ina awa mekea unain min ea jatu yunuxuntiduki, jabun jau en ina awa ea mekexununbunan— ikaya janua buaibun

7 januxun Josén jawen epadi xanen ibujaida Faraón anu iyudiaxun jau unanti wanun jadi uinmaya Jacobun Faraónki mesekin kenwanyan 8 januxun Faraónen yukakin:

—Anibuun, ¿min ma jati badi jayamen?— aka 9 jatun yuikin:

—En badi ichapa tekikaindiamaki, natian 130 año na mai anu maea akeakekin bika betsa betsapa tenei en jiweyuaii, en xenipabu jiweniti en badi kemadiamadan— akin

10 jaska yuitan ja bebunua kainkainkatsi Jacobun yuikin:

—Min xanen ibu pejaidaki. ¿Kayupa, en mabubu en pewayui kaidan?— aka

—Jaa, min katiduki— aka kainkainaya 11 januxun Josén jawen epa inun jawen betsabu jau janu jiweyununbun jaska Faraónen yunuxu keska wakin Egipto mai pepa jatu paxkaxunkin jatu yununikiaki, Ramsés pakeanuadan. 12 Januxun jawenabu jiweaibu Josén piti shadabu jatu pimakin dasibi jatu paxkaxunkubainikiaki.

13 Janua mai pakea Egipto inun Canaán jidabi anua jatun xekiwan keyui buni pikujaidai ana jawawen jiwetima yudabu buni paewen mawaibun 14 januxun Josén xekiwan jatu inankin Egipto anua inun Canaán anua jatun daya pei ma jatu keyu biantan Faraónen jiwe ewapa medan adushinken 15 janua Egipto anua inun Canaán anua jabun pei ma yamaken Egipto nawabu José anu buxun jaki chanikin:

—Ma nukun pei min nuku keyu bianshinaki. Nun buniwen mawaidan, pemaki. Mian nuku pimawe, nun ana pei jayamakidan— akabu

16 Josén jatu yuikin:

—Aa, ¿jaskamen, man peiumadan? En jawen taexun xekiwan matube bianananunan, matun inabudi bexun bidiakubainkanwen— jatu wa

17 jaska ninkabain Egipto nawabun jatun caballo inun, jatun chaxuwan inun, jatun ina awa inun, jatun asno bexunpakeaibuwen taexun Josén xekiwanwen taexun ina jatu biankubainkin badi bestichai nichintan 18 januxun badi betsa binukainaya ana badi betsa taxniaya ana jaki chani bexun José yuikin:

—Ana nun mia daketapa wayuaki, nun ana jawawen jaskatimajaidadan. Nun mia padanmaki. Nukun pei inun nukun inabu mina wakin min ma keyushinaki, ana jawa betsawen nukun piti nun bitimakidan. Eska besti nun jayaki, ¿nukun yuda inun nukun bai nun ja mia inantidumamen? 19 Nuku janubi biwe, nukun yuda inun nukun baidan, jawen taexun xekiwan nun pikubainunbunan. Faraónen tsumabu nuku wawe, nukun bai anuxun nun ja dayaxunkubainxanunbunan. Xekiwan min nuku inainwen jiwekin nukun bai anu banadiai nun jiwekunkainyutiduki. Min nuku jaska waya nukun bai anu jamen chaka besti beneama idiatiduki. Min nuku jaska wamaken nun mawaya nukun baidi benuxanikiki— akabu

20-21 jaska yukaibuwen taexun Egipto mai pakea jidabi Josén Faraón bixuanyan buniwen taexun jatun yuda inun jatun bai Faraón bixuntan jatu ibu wamanikiaki, Faraónen jawen dayadu esclavo wamakinan. 22 Jabun jawen yushin tibi Faraón kenwanxunmisbu mukayabu besti Faraónen jatu piti inankubaina pikubainaibuwen taexun jabun bai besti Josén jatu mebianma inikiaki.

23 Januxun Josén yudabu jatu yuikin:

—Eskatianan, matu inun matun baidan, man Faraónena bestiki. Ja bixunkin en jawena matu wamashinaki. Jaskawen taexun na xekiwan bimi janu ui ikaitian banaxankanwen. Ja benawati nun jayaki. 24 Januxun man ma pa wa tsekakin ichawakin 5 manchin jabiatiubus watan manchin bestichai Faraónen tsumabu man jatu inan jabun mekexunkubainxankanikiki. Januxun 4 manchin ja benawati inun matu inun matun bakebu mekexuntan pimakin dasibibun pi jiweyukubainxankanwen— jatu wa

25 jabu jaki shinan chankankin yuikin:

—Xanen ibuun, ¿nuku jaska wai jaska min juni pepa medabenanmen, min nuku jiwemaidan? Nun ikaii, Faraónen tsumabuidan— akabu

26 Josén jaska wakin yunuti kushipa niti ikama Egipto jidabi anu wakin 5 manchin tibi anua bestichai jau Faraón inankubainun badinunbun jatu jaska yununikiaki. Jakia jatun yushin tibi Faraón kenwanxunmisbu mukayabun jatun bai tibi jawa Faraónen jatu meanmawen taexun jabun jawa pakama inibukiaki. Na jaska yununidan, na eskatian jabias keyuama chibandiakubainkanikiki.

27 Israel jawenabuya Egipto anu jiwei buimabu janu Gosen mae ibu waima janu jiweyuxun jatun bakebu pa wai midimaibun 28 Jacob kaima jadi jiwea 17 año nichiin jadia 147 año jaya

29-30 xaba betsatian Israel jawen yuda mei ma anibujaidai babui mawakatsis ikin januxun jawen bake José chanima yuixuntanabu jua yuikin:

—Epaan, en ma mia xununkatsis ikaii, en ibubuki nukui kaidan. Chanima min ea medabewakatsis ikaidan, min mekenwen ea kishwakekin ea bakewe, nun yubakanunan— atan yuikin: —En matu mawaxuna ewen nuikin en yuda na Egipto anu ea mai wama jadi min juchi en mai wani anu jadidi ea maiwakin budiaxanwen— aka

—Dateyamawe, jaska min ea yuiai keskadan, en mia axanaidan— abia 31 jawen epan ninkamas yuikin:

—Diosun nuku uianyan ea yubawe— akawan Josén yuikin:

—Min ea jaska yukayadan, en mia yubaii, Diosun nuku uinkin ninkayadan— aka janua Israelin Dios kenwain na tsaua ibai babutan jawen dakatiki dakashinken