José Egipto anu jiwexun jawen ibu Jacob kenashina kanikiaki, na janchadan
46
Israelin dasibi jawen mabu pewakin keyutan jawenabube tsekekaini kai Beerseba mae anu jikitan januxun chaxuwan bake kuakin jawen epa Isaacun Dios kenwanken 2 jabianuxundi meshu medan nama keskawen Dios Israelbe janchakatsi kenakin:—Jacobuun— aka
—Eadan, en Dioski, min epa Isaacun mekenika Diosdan. Min Egiptokidi kaidan, dateama katanwen. Jadixun minabu en mia jatu pa waxunxanaii, midimajaida jatu wakinan. 4 Eadan, en mibe kaii, Egipto anudan. Jabia ea kayabistundi minabu en jatu taxnimabidanxanaii. Min jadia mawayadan, min bake Josén mia putama min jaunbia mawaxanaii— aka ninka ishin
5 janua Beerseba anua Jacob bestentan kakatsi ikaya jawen bakebun pewakin jatun epa, inun jatun bakebu, inun jatun ainbuaibu ja jaki bexanunbun asno tadantiya Faraónen jatu yunushinaki jatu nanea 6 Jacob dasibi jawenaya jawenabu inun jawen chaxuwan inun dasibi Canaán anu jiwexun mabu bimis jaya dasibiya Egiptokidi kakin 7 jawen juni bakebu inun, jawen ainbu bakebu inun, jawen baba junibu inun ainbu jatu iyui jaska kainikiaki.
8 Israelbu, Jacobun enabudan, jati kena bunibukiaki, Egiptokididan:
9 Jacobun bake iyua Rubén inun jawen juni bakebudan, jati bunibukiaki, Hanoc inun, Falú inun, Hesrón inun, Carmídan.
10 Janua ja kachu Simeón inun jawen juni bakebudan, jati bunibukiaki, Jemuel inun, Jamín inun, Óhad inun, Jaquín inun, Sóhar inun, Saúldan. Janua Saúlun ewadan, Canaán nawa ainbu inikiaki.
11 Janua Leví inun jawen juni bakebudan, jati bunibukiaki, Guersón inun, Quehat inun, Merarídan.
12 Janua Judá inun jawen juni bakebudan, jati bunibukiaki, Er inun, Onán inun, Selá inun, Fares inun, Zérahdan. Janua na dabedan, Er inun Onán Canaán anua mawanikiaki. Jawen baba Faresin bakebudan, Hesrón inun Hamul budianibukiaki.
13 Janua Isacar inun, jawen juni bakebudan, jati bunibukiaki, Tolá inun, Puvá inun, Job inun, Simrónan.
14 Janua Zabulón inun jawen juni bakebudan, jati bunibukiaki, Séred inun, Elón inun, Jahleeldan.
15 Jati juni bakebu inun jawen ainbu bake Dina Padán-aram anua Jacobun Líaki bawa jawenabudan, 33 bunibukiaki, junibu inun ainbuaibudan.
16 Janua Gad inun jawen juni bakebudan, jati bunibukiaki, Sefón inun, Haguí inun, Esbón inun, Suní inun, Erí inun, Arodí inun, Arelídan.
17 Janua Aser inun jawen juni bakebudan, jati bunibukiaki, Imná inun, Isvá inun, Isví inun, Beriá inun jatun pui Sérahdan. Jawen baba Berián bakebudan, Héber inun Malquiel budianibukiaki. 18 Janua Labánen jawen tsuma Zilpá jawen ainbu bake Lía jau dayaxunun inani janubi Lían jawen dayadu Zilpá Jacob yunua jaki bake waxuni Zilpán enabudan, 16 bunibukiaki.
19 Janua Jacobun ain Raquelin bakebudan, José inun Benjamín inibukiaki. 20 Josén bakewakin jawen ain Asenatki bakewadan, Manasés inun Efraín Egipto anua kainibukiaki. Asenatin epadan, maewan On anua jatun mekenika yushin kenwanika Potifera inikiaki.
21 Janua Benjamín inun jawen juni bakebudan, jati bunibukiaki, Bela inun, Béquer inun, Asbel inun, Guerá inun, Naamán inun, Ehi inun, Ros inun, Mupim inun, Hupim inun, Arddan. 22 Jacob inun Raquelin bakebu inun jatun bababudan, 14 bunibukiaki.
23 Janua Dan inun jawen juni bake Husim bunibukiaki.
24 Janua Neftalí inun jawen juni bakebudan, jati bunibukiaki, Jahseel inun, Guní inun, Jezer inun, Silemnan. 25 Janua Labánen jawen tsuma Bilhá jawen ainbu bake Raquel jau dayaxunun inani janubi Raquelin jawen dayadu Bilhá Jacob yunua jaki bake waxuni Bilhán enabudan, 7 bunibukiaki.
26 Jacobun enabu juni betsama jati jawen yudabuyas Egipto anu jikidan, 66 jabe bunibukiaki, jawen bakebun ainbuaibu jatu tanamadan. 27 Janua Egipto anuxun José ainyantan bakewadan, dabe inikiaki. Janua ja Jacobube Egipto anu bea Joséki dasitushiabu tanabu 70 jawenabu jabus inibukiaki.
28 Gosen anu kakin José anu bebunkidi Jacobun chanimakin Judá yunukin yuikin:
—“En ma juai ¿jani jaskapa?” ea waxuntanwen— aka kaken Gosen anu jikiaibun 29 José jawen betsan yuia unuxudi ninkatan jawen tsumabu jatu yunua jawen asno tadantiya pewaxunabu jaki inatan Gosen anu jawen epaki jaki nukui kai jaki kemaxun bechimatushitan jawen epabe ikukunan jabe teikukudabetan nui kaxa chakayamai nesetan 30 januxun jawen epa Israelin José yuikin:
—Epaan, chanima min ea jiwexunyuaki, ea kayabis ma en miki nukutushiaidan. Janunkain min bedubi en mia mawaxunxanaii— aka
31 ninkatan Josén jawen betsabu inun jawen epan enabu jatu yuikin:
—Jabianu iyukanwen. En matukidi Faraón chanixunyui kaidan. “Ma en epa inun en betsabu Canaán anua ma ebe jiweyui bekanxuki”, akin en matu yuixuni kaidan. 32 “Jatun chaxuwanyan inun jatun ina awaya inun jatun mabuya ma beabuki. Jatun dayadan, chaxuwan inun ina awa mekenika imisbuki”, en matu waxuin kaii. 33 Januxun Faraónen matu kenatan yukakin: “¿Jawa man dayamismen?” matu wa 34 unanumas yuiyamaxankanwen: “Nukudan, nun chaxuwan mekenikabuki, nukun xenipabu keskadan”, man wa matu ninkatan ja mae Gosen anu matu jiwemaxanikiki, Egipto nawabu chaxuwan mekenikabube man jusitan jiwetidubumawen taeadan— jatu watan